“Nyɛyafea Jeŋmaji lɛ Fɛɛ Amli Mɛi lɛ Kaselɔi”

“NO HEWƆ lɛ nyɛyaa ni nyɛyafea jeŋmaji lɛ fɛɛ amli mɛi lɛ kaselɔi, nyɛbaptisia amɛ yɛ Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli.” Nɛkɛ ji bɔ ni New World Translation (Jeŋ Hee Shishitsɔɔmɔ) lɛ tsɔɔ Yesu famɔ ni yɔɔ Mateo 28:19 lɛ shishi eha. Shi kɛlɛ, awie ashi nɛkɛ shishitsɔɔmɔ nɛɛ. Akɛ nɔkwɛmɔnɔ lɛ, jamɔ mli wolo bibioo ko tsɔɔ akɛ: “Shishitsɔɔmɔ pɛ ni Hela ŋmalɛ lɛ ŋmɛɔ gbɛ ji: ‘Nyɛyafea jeŋmaji lɛ fɛɛ kaselɔi!’ ” Ani enɛ ji anɔkwale?

Nɛkɛ shishitsɔɔmɔ, “Nyɛyafea jeŋmaji lɛ fɛɛ kaselɔi” lɛ, jeɔ kpo yɛ Biblia shishitsɔɔmɔi babaoo mli ni eji ŋmalɛ ni yɔɔ Hela mli nɛɛ mli wiemɔi lɛ eko fɛɛ eko shishitsɔɔmɔ ŋmiiŋmi. No hewɔ lɛ, mɛɛ nɔdaamɔnɔ yɔɔ shishitsɔɔmɔ, “Nyɛyafea jeŋmaji lɛ fɛɛ amli mɛi lɛ kaselɔi, nyɛbaptisia amɛ” lɛ kanemɔ he? Emli sane lɛ ni. Wiemɔ ni ji “nyɛbaptisia amɛ” lɛ kɔɔ aŋkroaŋkroi ahe yɛ faŋŋ mli, shi jeee jeŋmaji. Germany nilelɔ Hans Bruns wie akɛ: “[Wiemɔ] ‘amɛ’ lɛ kɔɔɔ jeŋmaji (Hela wiemɔ lɛ kɛ mligbalamɔ ni yɔɔ faŋŋ ko haa) lɛ ahe, shi moŋ gbɔmɛi ni yɔɔ jeŋmaji lɛ amli.”

Kɛfata he lɛ, esa akɛ asusu gbɛ nɔ ni atsɔ atsu Yesu famɔ lɛ he nii aha lɛ he. Wɔkaneɔ yɛ nɔ ni kɔɔ Paulo kɛ Barnaba sɔɔmɔ nitsumɔ lɛ he yɛ Derbe, maŋ ni yɔɔ Asia Bibioo lɛ mli akɛ: “Beni amɛjaje sanekpakpa lɛ amɛtsɔɔ maŋ lɛ ni amɛha mɛi pii etsɔmɔ kaselɔi lɛ, amɛku amɛsɛɛ kɛtee Listra kɛ Ikoniom kɛ Antiokia.” (Bɔfoi lɛ Asaji 14:21) Kadimɔ akɛ Paulo kɛ Barnaba fee gbɔmɛi ni yɔɔ Derbe lɛ ateŋ mɛi komɛi kaselɔi, shi jeee Derbe maŋ lɛ.

Nakai nɔŋŋ, yɛ nɔ ni kɔɔ naagbee be lɛ he lɛ, Kpojiemɔ wolo lɛ gba akɛ, jeee akɛ jeŋ muu lɛ fɛɛ baasɔmɔ Nyɔŋmɔ, shi moŋ “asafo babaoo . . . ni jɛ jeŋmaŋ fɛɛ jeŋmaŋ kɛ akutsei kɛ maji kɛ maji anɔ wiemɔi amli” baafee enɛ. (Kpojiemɔ 7:9; wɔma efã ko nɔ mi.) No hewɔ lɛ, abu New World Translation lɛ bem akɛ ‘Ŋmalɛ fɛɛ Ŋmalɛ ni jɛ Nyɔŋmɔ mumɔ lɛŋ’ shishitsɔɔmɔ ko, ni akɛ he fɔ̃ɔ nɔ.—2 Timoteo 3:16.