Kitai Nyɔŋma Lɛ

ENGLAND osɔfonukpa ni yɔɔ Gloucester lɛ yɔse akɛ osɔfoi ni fa fe fã ni yɔɔ esɔlemɔ lɛ nɔyelihe lɛ nyɛɛɛ akɛɛ Kitai Nyɔŋma lɛ kɛjɛ amɛjwɛŋmɔ mli, ni amɛteŋ oha mlijaa 10 leee he ni amɛbaanyɛ amɛna yɛ, yɛ Biblia lɛ mli. Shi enɛ ba mli afii 450 ni eho nɛ. Ani shihilɛ lɛ etsake yɛ no sɛɛ agbɛnɛ? Dabida—taakɛ nyɛsɛɛ nɛɛ nibii amlipɛimɔ ni atoko he gbɛjianɔ jogbaŋŋ ni afee yɛ Anglikan osɔfoi lɛ ahe, ni Sunday Times lɛ jie lɛ kpo lɛ tsɔɔ lɛ.

Yɛ emli osɔfoi 200 ni abibii amɛ saji lɛ ateŋ lɛ, oha mlijaa 34 pɛ baanyɛ akɛɛ Kitai Nyɔŋma lɛ fɛɛ ni amɛnaa tɛɛ shi. Yɛ mɛi ni eshwɛ lɛ ateŋ lɛ, mɔ kome susu akɛ naatsii nibii fa babaoo tsɔ yɛ mli, ni mɔ kroko kpoo amɛ akɛ amɛhe ehiaaa kɛha ŋmɛnɛŋmɛnɛ beaŋ jeŋba he naagbai.

Ani ole Kitai Nyɔŋma lɛ loo he ni abaana yɛ? Aŋmala yɛ 2 Mose lɛ mli, yɛ Biblia mli wolo ni ji enyɔ lɛ, yitso 20 lɛ mli klɛŋklɛŋ kukuji 17 lɛ. Mɛni hewɔ okaneee amɛ? Gbɛ kuku ni aaatsɔ nɔ akɛbua amɛnaa nɛ. Klɛŋklɛŋ ejwɛ lɛ kɔɔ jamɔ ni wɔkɛhaa Nyɔŋmɔ lɛ he, enumɔ lɛ maa weku shihilɛ nɔ mi, nɔ ni ji ekpaa kɛyashi nɛɛhu lɛ kɔɔ wɔkɛ wɔnyɛmimɛi ateŋ sharamɔ he, ni nyɔŋma lɛ yɛ sɔrɔto, ehaa wɔpɛiɔ wɔ diɛŋtsɛ wɔtsui lɛ mli koni wɔkɛtao wɔsusumɔi amli. Gbɛ ni Kristofoi baanyɛ atsɔ nɔ amɛkɛ shishitoo mlai nɛɛ atsu nii ni efee kuku lɛ nɛ.

Klɛŋklɛŋ: Okɛ hetuu-kɛhamɔ aha wɔ Bɔlɔ lɛ. Enyɔ: Okɛ amagai akatsu nii yɛ jamɔ mli. Etɛ: Buu Nyɔŋmɔ gbɛi lɛ ni okɛ woo aha lɛ daa. Ejwɛ: Ŋɔɔ be ni okɛjwɛŋ mumɔŋ nibii ahe, ni okaha nɔ ko miigbala ojwɛŋmɔ. Enumɔ: Gbekɛbii, nyɛkɛ bulɛ ahaa nyɛfɔlɔi. Ekpaa: Kaagbe gbɔmɔ. Kpawo: Kwa gbalafitemɔ. Kpaanyɔ: Kaaju. Nɛɛhu: Wiemɔ anɔkwale. Nyɔŋma: Kwa hiɛkɔɔ.

Kitai Nyɔŋma lɛ ji mla gbɛjianɔtoi ni akɛha Mose lɛ fã. Shi shishitoo mlai ni yɔɔ mli lɛ kɔɔ be fɛɛ be he. (Romabii 6:14; Kolosebii 2:13, 14) Yɛ yiŋtoo nɛɛ hewɔ lɛ, Yesu sɛɛnyiɛlɔi lɛ tsɛ ŋmalɛi ayisɛɛ kɛjɛ Kitai Nyɔŋma lɛ mli. (Romabii 13:8-10) Kwɛ bɔ ni shihilɛ baanyɛ afee nɔ ni miishɛɛ babaoo yɔɔ mli—kɛ shweshweeshwe—kɛ́ mɛi fɛɛ kɛ bulɛ ha ŋwɛi mumɔ naa tsirɛmɔ shishitoo mlai nɛɛ ni amɛhi shi yɛ naa ŋmɛnɛ lɛ!