Jenamɔi ni Anyɛɛɛ Awɔ ni He Ba Sɛɛnamɔ

MAŊTSƐMƐI po nyɛɛɛ awɔ jenamɔi. Persia nɔyelɔ ko ni náa mɛi anɔ hewalɛ waa ni ji Ahashwerosh ni hi shi yɛ afii ohai enumɔ D.Ŋ.B. lɛ ná eko mli niiashikpamɔ. Ekolɛ akɛni esusuɔ akɛ eku ehiɛ eshwie nitsumɔ ko nɔ hewɔ lɛ, akane maŋtsɛyeli he saji ni aŋmala ashwie shi lɛ aha lɛ. Ená ele akɛ anɔkwa sɔɔlɔ ko ni ji Mordekai eha gbele nigii ni akɛbaaba mɔ ko nɔ lɛ he ni akpaŋɔ lɛ efee yaka shi awoko ehiɛ nyam. Ahashwerosh tswa efai shi akɛ ebaajaje tɔmɔ nɛɛ amrɔ nɔŋŋ. Bɔ ni enifeemɔi lɛ ahe ba sɛɛnamɔ eha Nyɔŋmɔ webii lɛ tsɔɔ akɛ ajɛ ŋwɛi akudɔ wɔ ni maŋtsɛ lɛ nyɛɛɛ awɔ lɛ.—Ester 6:1-10.

Yehowa Odasefoi asafo ni yɔɔ South Africa maŋ Hermanus lɛ ŋshɔ lɛ naa lɛ yɛ nɔ ni amɛbaadamɔ nɔ amɛkai Biblia mli sane nɛɛ. Tsutsu ko lɛ amɛkpeɔ yɛ asa ni amɛhai lɛ mli. Amɛbɔ mɔdɛŋ afii babaoo koni amɛhe shikpɔŋ koni amɛma amɛ diɛŋtsɛ amɛ Maŋtsɛyeli Asa. Yɛ naagbee lɛ, Maŋ Gwabɔɔ lɛ kɛ shikpɔŋ ko ni hi jogbaŋŋ lɛ ha amɛ yɛ afi 1991 mli.

Shi kɛlɛ, mɛi komɛi te shi amɛwo shikpɔŋ nɛɛ ni ahɔɔ ahaa Yehowa Odasefoi lɛ. Beni ashashao shi nyɔji babaoo sɛɛ lɛ, akɛɛ asafo lɛ akɛ akɛ naatsĩi ko eba ni tsɔɔ yɛ mla naa akɛ esa akɛ amɛ afii etɛ dani ahɔɔ shikpɔŋ lɛ aha sɔlemɔi lɛ, ni aŋmɛɛɛ gbɛ ni akɛ shikpɔŋ lɛ aha dɔŋŋ. Asafo lɛ ŋma wolo ekoŋŋ yɛ May 1993 ni ebi koni gwabɔɔ lɛ asusu amɛ yiŋkpɛɛ lɛ he ekoŋŋ. Amɛnine shɛ woloŋmaa ni wiemɔ-muu ni haa wolo ni amɛŋma lɛ hetoo lɛ yɔɔ mli lɛ nɔ, ni kɛɔ akɛ akɛ naatsĩi lɛ miitsu nii lolo.

Yɛ nakai afi lɛ October mli lɛ, gwabɔɔ lɛ mli bii lɛ ateŋ mɔ kome nyɛɛɛ awɔ gbɛkɛ ko. Nɔ ni ekɛ be lɛ tsu ji akɛ, eekwɛ saji memeji komɛi ni asusu he be ko yɛ kpee ko ni gwabɔɔ lɛ fee lɛ mli lɛ amli koni ekwɛ kɛji saji komɛi yɛ ni ehe miihia ni asusu he lo. Wolo ni Odasefoi lɛ ŋma ni amɛkɛmiibi ni gwabɔɔ lɛ asusu eyiŋkpɛɛ lɛ he ekoŋŋ lɛ gbala ejwɛŋmɔ. No hewɔ lɛ ekpɛ eyiŋ akɛ ekɛ sane lɛ baafata kpee ni amɛbaafee, ní nyiɛ sɛɛ lɛ mli saji ni abaasusu he lɛ ahe. Eesumɔ ni etsɔɔ mli akɛ Yehowa Odasefoi ebi koni akɛ shikpɔŋ lɛ aha amɛ dani akɛ naatsĩi lɛ ba shikpɔŋ lɛ nɔ yɛ sɔlemɔi lɛ ahewɔ.

Etsɛɛɛ ni akɛ nakai shikpɔŋ lɛ nɔŋŋ ni be ko lɛ akɛha amɛ yɛ 1991 lɛ ha asafo lɛ ekoŋŋ! Eyɛ gbɛjegbɛ wulu lɛ nɔ, ni asafo lɛŋ bii kɛ mɛi ni yɔɔ wiemɔ lɛ he miishɛɛ lɛ yaa mli ni nɔ ko kwraa etsĩii amɛnaa. Amɛma Maŋtsɛyeli Asa fɛfɛo, ni ajɔɔ nɔ aha Yehowa yɛ October 5, 1996.

Beni asafo lɛ hao yɛ wɔ ni gwabɔɔ lɛ mli nyo lɛ nyɛɛɛ awɔ gbɛkɛ lɛ he naagba lɛ he lɛ, anɔkwale ni eji akɛ eba mli nakai po yɛ Maŋtsɛ Ahashwerosh gbɛfaŋ lɛ baanyɛ ashɛje emii. Ni nɔ ni jɛ mli ba yɛ saji enyɔ lɛ fɛɛ mli lɛ he ba sɛɛnamɔ. Eka shi faŋŋ akɛ asafo ni yɔɔ Hermanus lɛ ahiɛ sɔ Maŋtsɛyeli Asa, ni ji anɔkwa jamɔ kɛ teokrase tsɔsemɔ shikwɛ̃ɛhe yɛ ŋshɔnaa maŋ ni ehe gbɛi waa nɛɛ mli lɛ ni amɛ diɛŋtsɛ amɛná lɛ he waa.—Hebribii 10:24, 25.