Aagbala “Nu ni Mli Kwɔ” Kɛmiije Kpo

BIBLIA mli abɛ ko kɛɔ akɛ: “Gbɔmɔ tsuiŋ yiŋtoo tamɔ nu ni mli kwɔ; shi mɔ ni kɔɔ sane sɛɛ lɛ, egbalaa kɛjeɔ kpo.” (Abɛi 20:5) Yɛ Biblia bei amli lɛ, ewa waa akɛ aaana nu fe bɔ ni eji yɛ shikpɔji pii anɔ ŋmɛnɛ. Beni Yesu kɛ Samariayoo lɛ wie lɛ, no mli lɛ eesha nu kɛmiijɛ Yakob nubu lɛ mli, nubu ni mlikwɔlɛ shɛɔ mitai 23 lɛ!—Yohane 4:5-15.

Taakɛ Abɛi 20:5 lɛ tsɔɔ lɛ, sanesɛɛkɔmɔ ni he hiaa koni akɛpɛi susumɔi kɛ henumɔi ni yɔɔ mɔ ko tsui lɛ mli tɔɔ lɛ tamɔ mɔdɛŋbɔɔ ni ebiɔ ni akɛgbala nu kɛjɛ nubu mli lɛ pɛpɛɛpɛ. Enɛ ji anɔkwale yɛ shihilɛi babaoo amli. Akɛ nɔkwɛmɔnɔ lɛ, ekolɛ ole mɛi komɛi ni amɛkɛ afii babaoo ena nilee kɛ niiashikpamɔ babaoo. Kɛji mɛnɛɛmɛi sumɔɔɔ ni amɛjɛ amɛsuɔmɔ mli ni amɛkɛ ŋaawoo ni abiko amɛ aha lɛ, ekolɛ ehe baahia ni ogbala amɛ kɛje kpo. Kɛtsɔ miishɛɛ kpo ni ooojie, sanebimɔi, kɛ ŋaa gbɛ ni oootsɔ nɔ okɛpɛi nii amli lɛ nɔ lɛ, no lɛ taakɛ eji lɛ, ooshiu ogoga oowo nilee nubu ni mli kwɔ mli.

Anyɛɔ akɛ ŋaawoo ni yɔɔ Abɛi 20:5 lɛ hu tsuɔ nii yɛ weku lɛ mli. Bei pii lɛ, anuɔ ni ŋamɛi miikɛɛ akɛ: “Miwu ekɛɛɛ mi bɔ ni enuɔ he ehaa!” Wu ko baanyɛ akɛɛ akɛ: “Miŋa kɛ mi kpaa wiemɔ!” Yɛ shihilɛi ni tamɔ enɛ mli lɛ, sanesɛɛkɔmɔ he miihia koni akɛgbala susumɔi ni yɔɔ hefatalɔ lɛ tsuiŋ tɔɔ lɛ kɛje kpo. Bei pii lɛ, sanebimɔi ni ŋaa yɔɔ mli (Ani okɛ naagbai komɛi kpe yɛ gbi lɛ mli? Mɛni ba? Mɛɛ gbɛ nɔ manyɛ maye mabua yɛ?) baanyɛ eje sanegbaa ni jɛ tsuiŋ lɛ shishi. Ni aaajie sanesɛɛkɔmɔ ni tamɔ nɛkɛ kpo lɛ baawaje gbalashihilɛ ekomefeemɔ kpaa lɛ, kɛha wu kɛ ŋa fɛɛ sɛɛnamɔ.