Oblayoofro ko Gbalashihilɛ?

Bɔni afee ni ahã gbeekpãmɔ aba Maria ni akɛɛ eji daa oblayoofro lɛ kɛ gbalashihilɛ mli ni ekɛ Yosef bote lɛ teŋ lɛ, nitɛŋlɔi kɛ mɛi ni kɛ tsei gbɔɔ nibii lɛ ateŋ mɛi pii efee Yosef he mfoniri akɛ nuu ni eda yɛ afii amli. Amɛsusu akɛ Yosef tamɔ mɔ ko ni kwɛɔ Maria nɔ diɛŋtsɛ fe ewu. Shi Paapa John Paul II Kɛ sane lɛ he susumɔ kroko ba nyɛsɛɛ nɛɛ. Esusuɔ akɛ Yosef “jeee nuu ni eda yɛ afii amli yɛ nakai be lɛ mli.” Shi moŋ, “emuuyeli yɛ emligbɛ, ni ji Nyɔŋmɔ nikeenii lɛ hã ekɛ Maria hi gbalashihilɛ mli yɛ hedɔɔ mli ni amɛnaaa bɔlɛ.”

Kɛji akɛ Maria miisumɔ ni ehi shi akɛ oblayoofro daa lɛ, mɛni hewɔ eha atsɛ ehe baa mɔ? Paapa lɛ ha hetoo akɛ: “Abaanyɛ asusu akɛ, beni atsɛɔ ehe baa lɛ, no mli lɛ gbeekpãmɔ ko yɛ Yosef kɛ Maria teŋ ejaakɛ amɛto gbɛjianɔ akɛ ebaahi shi akɛ oblayoofro.”

Shi, Biblia lɛ kɛ sane lɛ hãa yɛ gbɛ ni yɔɔ sɔrɔto nɔ. Mateo sane lɛ kɛɔ akɛ Yosef “leee lɛ aahu kɛyashi efɔ ekromɔ binuu lɛ.” (Mateo 1:25, Catholic New American Bible, wɔma efã ko nɔ mi.) Yɛ Yesu fɔmɔ sɛɛ lɛ, Yosef kɛ Maria gbalashihilɛ lɛ efeee oblayoofro nɔ̃ dɔŋŋ yɛ gbɛ ko kwraa nɔ. Enɛ he odaseyeli kome ji akɛ, yɛ sɛɛ mli yɛ Sanekpakpa lɛ mli saji lɛ amli lɛ, atsɔɔ akɛ Yesu yɛ nyɛmimɛi hii kɛ yei.—Mateo 13:55, 56.

No hewɔ lɛ, yɛ be mli ni Biblia lɛ kɛɔ akɛ Maria ji oblayoofro beni efɔ Yesu lɛ, nɔ ko bɛ ni abaadamɔ nɔ akɛɛ akɛ ehi shi akɛ oblayoofro yɛ eshihilɛ be ni ekɛ Yosef yɔɔ lɛ mli.