Namɔ Shiwoi Anɔ Obaanyɛ Okɛ Ohiɛ Afɔ̃?
YƐ AFI 1893 mli lɛ, kuu ko ni feɔ gbɔmɛi 74 ni tsuɔ adesai ahilɛ-kɛhamɔ he nii kpe yɛ Chicago World’s Fair kpeehe lɛ koni amɛsusu wɔsɛɛ be he. (Atsɔɔ he ni eyɔɔ lɛ yɛ yiteŋgbɛ.) Beni amɛkwɛɔ wɔsɛɛ be afii 100 kɛyashi afi 1993 lɛ, amɛgba shihilɛi ni nyiɛ sɛɛ nɛɛ amɛfata ekrokomɛi ahe, akɛ: “Gbɔmɛi pii baahi shi ni amɛna afii 150.” “Gbokɛlɛfoi atsũi efeŋ nɔ ni fa, ni abaasusu gbalamlitsemɔ he akɛ ehe ehiaaa.” “No mli lɛ nɔyeli lɛ eha eshihilɛ efee mlɛo, akɛni anɔkwa agbojee haa nibii feɔ mlɛo be fɛɛ be lɛ hewɔ.”
Nakai nɔŋŋ yɛ 1967 mli lɛ, wolo ko ni egbɛi ji The Year 2000 lɛ gba akɛ: “Beni afi 2000 aaashɛ lɛ, kɔmpiutai baanyɛ atamɔ, akanya, loo afee nɔ ni fe nilee mli nyɛmɔi ‘ni tamɔ adesa nɔ̃’ lɛ, ni ekolɛ enyɛmɔi yɛ nibii fɛfɛji ni akaa yiŋ awieɔ lɛ kɛ enaakpɛɛ nifeemɔi fata he.” “Jwɛŋmɔ ni ahiɛ akɛ robɔt loo tsɔnei ni afee ni tsuɔ shia lɛ mli nitsumɔ titri ni jara waaa lɛ . . . tamɔ nɔ ni baanyɛ aba beni afi 2000 aaashɛ.”
Nyɛ ni adesa nyɛɛɛ ana nibii ni baaba wɔsɛɛ lɛ kɛ Nyɔŋmɔ nyɛmɔ yeee egbɔ kwraa. Akɛ nɔkwɛmɔnɔ lɛ, okɛ nɔ ni tsɔ hiɛ ni agba afɔ shi lɛ ato nɔ ni Biblia lɛ gba efɔ shi, ni miihe ashɛ afii ohai 20 ni eho nɛ, ni kɔɔ wɔgbii nɛɛ ahe lɛ ato he okwɛ: “Gbɔmɛi aaatsɔmɔ hesuɔlɔi, shikasuɔlɔi, shwalɔi, hewolɔi, musubɔlɔi, fɔlɔi anɔ toigbolɔi, trumui, mɛi ni he tseee, mɛi ni edɔɔɔ mɔ he, kpaŋmɔ mlikulɔi, oshekuyelɔi, mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, sɛɛgbɛtsɔɔlɔi, yiwalɔi, henɔwolɔi, mɛi ni sumɔɔ shwɛmɔ-kɛ-ŋɔɔmɔ fe Nyɔŋmɔ, mɛi ni hiɛ Nyɔŋmɔjamɔ su, shi amɛkwa emli hewalɛ lɛ.”—2 Timoteo 3:1-5.
Biblia gbalɛ nɛɛ ni kɔɔ “naagbee gbii” lɛ ahe lɛ ji babaoo ni eba mli yɛ wɔgbii nɛɛ amli lɛ ateŋ ekome pɛ. Nyɔŋmɔ Wiemɔ lɛ gba akɛ, nɔ ni baafata ba ni Yesu eba lɛ he “okadi” lɛ he ji jeŋ ta, hɔmɔ, tsɛŋemɔ helai, shikpɔŋhosomɔi, kɛ Nyɔŋmɔ Maŋtsɛyeli lɛ he sanekpakpa lɛ shiɛmɔ yɛ jeŋ fɛɛ.—Mateo 24:3-14; Luka 21:11.
Bɔ ni Nyɔŋmɔ shiwoi baa mli anɔkwale pɛpɛɛpɛ lɛ tsirɛ Biblia mli niŋmalɔ ko ni ejaje afii ohai abɔ ni eho nɛ akɛ: “Nibii kpakpai fɛɛ ni Yehowa, nyɛ-Nyɔŋmɔ lɛ wie yɛ nyɛhewɔ lɛ, emli ekome folo ekaaa shi, fɛɛ eba mli eha nyɛ, emli ekome folo ekaaa shi.”—Yoshua 23:14.
Hɛɛ, wɔbaanyɛ wɔna nɔmimaa akɛ, etsɛŋ ni Nyɔŋmɔ shiwoi lɛ fɛɛ baaba mli. Nyɔŋmɔ Maŋtsɛyeli lɛ kɛ hela, efɔŋfeemɔ, tsofai fɔji kɛ nitsumɔ, hɔmɔ, kɛ ta baaba naagbee—shikpɔŋ muu lɛ fɛɛ baatsɔ paradeiso. (Lala 37:10, 11, 29; Kpojiemɔ 21:3, 4) Obaanyɛ ohe gbalɛ nɛɛ ni baaba mli anɔkwale lɛ oye! Ebaa kɛjɛɔ wɔ-Bɔlɔ lɛ, “ni maleee lɛ” ŋɔɔ.—Tito 1:2; okɛto Hebribii 6:13-19 he.
[He ni Mfoniri ni yɔɔ baafa 32 lɛ Jɛ]
Cleveland State University Archive