Kane ni Baakudɔ Bo yɛ Wala Gbɛ Nɔ

“YEHOWA, mile akɛ gbɔmɔ gbɛ bɛ lɛ diɛŋtsɛ edɛŋ, ni adesa ni nyiɛ nɛɛ, bɔ ni eeetsɔ ejaje enajifamɔi eha lɛ, ebɛ edɛŋ.” (Yeremia 10:23) Kɛtsɔ nɛkɛ wiemɔi nɛɛ anɔ lɛ, gbalɔ Yeremia tsɔɔ akɛ adesai nyɛŋ akudɔ wala gbɛ yɛ omanyeyeli mli ni ayeee abuaaa amɛ. Nɛgbɛ abaanyɛ aná nakai yelikɛbuamɔ lɛ yɛ? Lalatsɛ lɛ ha hetoo yɛ esɔlemɔ kɛha Yehowa Nyɔŋmɔ lɛ mli akɛ: “Owiemɔ lɛ ji kane ha minane kɛ la hu yɛ mitempɔŋ lɛ nɔ.”—Lala 119:105.

Mɛi ni jeɔ Nyɔŋmɔ Wiemɔ, ni ji Ŋmalɛ Krɔŋkrɔŋ lɛ kasemɔ shishi, ni amɛkɛ nɔ ni ekɛɔ lɛ tsuɔ nii lɛ baafee tamɔ mɔ ko ni jeɔ gbɛfãa shishi leebi mra. Yɛ shishijee mli lɛ, enyɛɛɛ ena nii jogbaŋŋ ejaakɛ duŋ ewo. Shi be ni hulu lɛ jeɔ shishi akɛ eeete shi lɛ, enaa nii waa fiofio. Naagbee lɛ, hulu lɛ tsoɔ waa. Enaa nɔ fɛɛ nɔ fitsofitso yɛ faŋŋ mli. Nakai nɔkwɛmɔnɔ lɛ haa akaiɔ Biblia mli abɛbua ko: “Jalɔi atempɔŋ lɛ tamɔ la ni kpɛɔ ni eyaa nɔ ekpɛɔ aahu kɛyashiɔ shwane fintiŋŋ.”—Abɛi 4:18.

Ni mɛi ni kpooɔ Nyɔŋmɔ gbɛtsɔɔmɔ lɛ hu? Biblia lɛ kɛɔ akɛ: “Mɛi fɔji agbɛ lɛ tamɔ duŋ kpii, amɛleee nii ni amɛtɛrɛɔ po.” (Abɛi 4:19) Hɛɛ, mɛi fɔji lɛ tamɔ nuu ni tɛrɛɔ yɛ duŋ lɛ mli lɛ. Omanye ní etamɔ nɔ ni amɛyeɔ waa lɛ po yɛ kuku, ejaakɛ “nilee loo sanesɛɛkɔmɔ loo ajina ko bɛ ni kɛ Yehowa aashi mple.”—Abɛi 21:30.

No hewɔ lɛ, nyiɛmɔ Nyɔŋmɔ Wiemɔ, Biblia lɛ mli gbɛtsɔɔmɔ lɛ sɛɛ. Kɛji ofee nakai lɛ, obaana akɛ wiemɔi ni yɔɔ Abɛi 3:5, 6 lɛ ji anɔkwale: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛi fɛɛ mli, ni lɛ eeejaje otempɔŋi lɛ!”