Maŋtsɛyeli Jajelɔi Bɔ Amaniɛ
Nyɔŋmɔ Wiemɔ Mli Hetsuumɔ Nɔ ni Yɔɔ Hewalɛ Lɛ
ABƆ amaniɛ akɛ mɛi ni kɛ tsofai tsuɔ nii yɛ gbɛ ni ejaaa nɔ lɛ ateŋ mɛi babaoo kuɔ amɛsɛɛ kɛyaa amɛtsofai ni amɛkɛ tsuɔ nii yɛ gbɛ ni ejaaa nɔ lɛ sui amli ekoŋŋ kɛ́ ajie amɛ kɛjɛ helatsamɔhei lɛ nɔŋŋ lɛ. Shi bei pii lɛ, Nyɔŋmɔ Wiemɔ lɛ nyɛɔ etsuɔ nɔ ni helatsamɔhei nyɛɛɛ atsu. (Hebribii 4:12) Nyɔŋmɔ Wiemɔ lɛ kɛ emumɔ lɛ eye ebua mɛi babaoo ni amɛye tsofai fɔji kɛ nitsumɔ lɛ nɔ kunim, koni amɛkɛ ŋaawoo nɛɛ atsu nii: “Nyɛhaa wɔtsuua wɔhe kɛjɛa heloo kɛ mumɔ fɛɛ he muji mli, ni wɔgbe hetsemɔ naa yɛ Nyɔŋmɔ gbeyeishemɔ mli.”—2 Korintobii 7:1.
Afee enɛ he nɔkwɛmɔnɔ kɛtsɔ niiashikpamɔ ko ni jɛ Myanmar lɛ nɔ. Nuu ko ni kɛ afii babaoo mia ehiɛ waa koni ekpa tsofai ni akɛ tsuɔ nii yɛ gbɛ ni ejaaa nɔ lɛ gba akɛ: “Mibatsɔ mɔ ni kɛ tsofai ni akɛ tsuɔ nii yɛ gbɛ ni ejaaa nɔ beni mina afii nyɔŋma-kɛ-etɛ kɛyaa lɛ. Yɛ bei babaoo mli lɛ, mibɔɔ mɔdɛŋ koni matsi mihe kɛjɛ he, shi minyɛɛɛ mafee. Bɔni afee ni manyɛ maye mabua mihe yɛ tsofai ni akɛ tsuɔ nii yɛ gbɛ ni ejaaa nɔ lɛ su lɛ mli hewɔ lɛ, mibɔi juu. Nɔ ni jɛ mli ba ji akɛ, yɛ 1988 mli lɛ, awo mi tsũŋ afi kome.
“Beni ajie mi kɛjɛ tsũŋwoo mli nɔŋŋ lɛ, mibɔi mitsutsu nanemɛi lɛ kɛ bɔɔ ekoŋŋ. No sɛɛ etsɛɛɛ lɛ, miku misɛɛ kɛtee tsofai ni akɛ tsuɔ nii yɛ gbɛ ni ejaaa nɔ su lɛ mli ekoŋŋ. Nɛkɛ mɔ diɛŋtsɛ hiɛ ni ekpataa nɛɛ ha weku lɛ mli bii kɛ mi kpa bɔɔ yɛ nɔ fɛɛ nɔ mli. Kɛfata he lɛ, atuatsemɔ su ni miyɔɔ lɛ ha mɛi pii ni yɔɔ akutso lɛ mli lɛ bɔi mi gbeyeishemɔ, ni amɛhu amɛbɔi amɛhe tsimɔ kɛjɛ mihe.
“Kɛkɛ ni gbi ko lɛ, nɔ ni anyɛŋ atsĩ naa lɛ ba—mipiŋ yɛ tsofa ko ni mikɔ fe nine lɛ mli. Akɛ mi ku sɛɛ kɛtee tsũŋwoo mli ekoŋŋ, shi yɛ nɛkɛ be nɛɛ mli lɛ afii etɛ. Eyɛ mli akɛ shihilɛ yɛ tsũŋwoohe lɛ bɛ mlɛo kwraa moŋ, shi minyɛ mihi shi yɛ gbɛ ko nɔ kɛ̃.
“Beni mijɛ tsũŋwoo mli kɛba ekoŋŋ lɛ, mibi ni miweku lɛ kɛ mitsutsu tɔmɔi lɛ ake mi. Amɛjɛ mɔbɔnalɛ mli amɛkpɛlɛ minɔ ekoŋŋ, shi shikome ekoŋŋ lɛ, nanemɛi tsɔ miyiŋ ni miku misɛɛ kɛtee mitsutsu gbɛi lɛ ahe ekoŋŋ.
“Naagbee mli lɛ, minaa jie yi etsɔɔ maŋ lɛ mli osɔfo ko ákɛ esa akɛ maya Biblia skul ko. Osɔfo lɛ kpɛlɛ nɔ. Shi, dani mabɔi yaa lɛ, minyɛkwɛ ni eji Yehowa Odasefoi lɛ ateŋ mɔ kome lɛ kɛɛ mi akɛ kɛ́ miisumɔ ni makase Biblia lɛ lɛɛlɛŋ lɛ, no lɛ esa akɛ mikɛ Odasefoi lɛ akase nii.
“Mitee Maŋtsɛyeli Asa lɛ nɔ, ni akɛ mi tsɔɔ nuu ko ni kpɛlɛ nɔ akɛ ekɛ mi baakase Biblia lɛ. Mɛi ni ba lɛ ateŋ mɛi babaoo kɛ miishɛɛ ŋa mi ni amɛha mihiɛ mɛ.
“Beni mibɔi Biblia lɛ kasemɔ ni mibɔi Kristofoi akpeeiyaa sɛɛ lɛ, Nyɔŋmɔ ni asumɔɔ ni abɛŋkɛ lɛ kpaakpa lɛ baye suɔmɔ ni yɔɔ akɛ akɛ he aaawo tsofai ni akɛ tsuɔ nii yɛ gbɛ ni ejaaa nɔ mli lɛ najiaŋ. Afi kome sɛɛ lɛ, mitee hiɛ kɛyashɛ he ni mijɔɔ miwala nɔ miha Yehowa Nyɔŋmɔ, ni mifee mihenɔjɔɔmɔ lɛ he okadi kɛtsɔ nu mli baptisimɔ nɔ.
“Nyɛsɛɛ nɛɛ, beni miyaa shia kɛ shia lɛ, mikɛ mitsutsu nanemɛi ni mikɛ amɛ bɔ yɛ tsofai ni akɛ tsuɔ nii yɛ gbɛ ni ejaaa nɔ lɛ mli lɛ ateŋ mɔ kome kpe. Enyɛɛɛ enu tsakemɔi ni sa kadimɔ ni mifee lɛ shishi. Enɛ gbele gbɛ kɛha odaseyeli, ni minyɛ migba lɛ Maŋtsɛyeli hiɛnɔkamɔ lɛ he sane.
“Miná anɔkwa yiŋtoo kɛ shishinumɔ ni yɔɔ shihilɛ mli lɛ. Miida Nyɔŋmɔ shi yɛ eyelikɛbuamɔ kɛ eŋaawoo ni yɔɔ e-Wiemɔ lɛ mli lɛ, ni amrɔ nɛɛ minyɛɔ miyeɔ mibuaa mɛi krokomɛi ni amɛtsiɔ amɛhe kɛjɛɔ su ni ji tsofai ni akɛ tsuɔ nii yɛ gbɛ ni ejaaa nɔ ni fiteɔ mɔ lɛ mli lɛ he.”