Amɛdamɔ Shi Shiŋŋ yɛ Nazi Yiwaa Mli

EMUUYELI ni gbeyeishemɔ bɛ mli ni Yehowa Odasefoi ni yɔɔ Nazi Germany lɛ hiɛ mli lɛ jeɔ kpo faŋŋ akɛ nɔ ko ni yɔɔ sɔrɔto kwraa, yɛ gbɛhe ni Kristendom sɔlemɔi lɛ kɔ lɛ he. Ni yinɔsane he nilelɔ, John Weiss kadi enɛ yɛ ewolo ni ji Ideology of Death lɛ mli. Eŋma akɛ:

“Yɛ 1934 mli lɛ, Evangelical sɔlemɔ lɛ ma nɔ mi akɛ esa akɛ ‘Lutheran jamɔ lɛ mli bii ahere’ Nazibii lɛ ‘atuu,’ ni amɛda ‘Nuntsɔ Nyɔŋmɔ lɛ’ shi akɛ eha Germanbii lɛ ‘nuntsɔ ofe ni yɔɔ krɔŋkrɔŋ ni anyɛɔ akɛ he fɔ̃ɔ enɔ.’ . . . Protestant osɔfonukpa ko ŋma wolo eyaha esɔfo lɛ akɛ, ‘Nyɔŋmɔ tsu [Hitler] kɛba wɔŋɔɔ.’ ” Weiss tee nɔ akɛ: “German Methodist sɔlemɔ lɛ . . . kɛ Osɔfonukpa Dibelius kpã gbee akɛ Hitler ehere Germany yiwala kɛjɛ Bolshevik maŋ hiɛ atuatsemɔ ni baa lɛ mli ni ekɛ toiŋjɔlɛ kɛ shifimɔ eba . . . Mormon sɔlemɔ lɛ wo emli bii lɛ ŋaa akɛ Hitler ni aaate shi awo lɛ lɛ ji Mormon mla lɛ mlikũu.” Ni ekɛfata he akɛ: “Akɛɛ Katolikbii akɛ eji gbɛnaa nii ni yɔɔ krɔŋkrɔŋ akɛ amɛaabo nɔyeli hee lɛ toi, ni eji nitsumɔ ni agbalaaa he shi kɛjɛɛɛ he kɔkɔɔkɔ, yɛ be mli ni osɔfoi lɛ ele nibii ni ehiii ni ba yɛ bokagbɛ lɛ fɛɛ sɛɛ.”

Shi Yehowa Odasefoi hu? Nilelɔ Weiss tsɔɔ mli akɛ, “akɛ kuu lɛ, Yehowa Odasefoi pɛ ji mɛi ni damɔ shi shiŋŋ amɛshi Nazibii lɛ.” Nilelɔ Weiss tee nɔ akɛ, awo “akpei abɔ tsuŋ, ni kɛlɛ abaanyɛ aŋmɛɛ Odasefonyo fɛɛ Odasefonyo ni akɛ lɛ aaaya gboklɛfoi ansaraŋ lɛ he kɛ ekɛ ewaonaa gbɛi wo wolo ni tsɔɔ akɛ ekwa ehemɔkɛyeli lɛ shishi pɛ.”

Nilelɔ Weiss wie emuuyeli mli ni Yehowa Odasefoi lɛ hiɛ lɛ he akɛ: “Amɛ nɔkwɛmɔnɔ lɛ feɔ faishitswaa ni ekaaa kɛ ekãa ni mra be mli Kristofoi lɛ yɔɔ, dani etsɔ̃ jamɔ ni ato ama shi ni kɛ ehe woɔ kwasafo shihilɛ mli nibii amli lɛ baha suɔmɔ ni ayɔɔ akɛ aŋmɛɛɛ sane he ni akɛsaa lɛ nɔ. Protestant osɔfo ko ŋma yɛ amɛhe akɛ, ‘Jeee sɔlemɔi wuji lɛ, shi moŋ mɛi ni agbeɔ amɛhe guɔ ni ayeɔ amɛhe fɛo nɛɛ ji mɛi ni damɔ shi klɛŋklɛŋ amɛshi Nazi daimonio lɛ mlifu, kɛ mɛi ni yɔɔ ekãa bɔ ni amɛkɛ amɛhemɔkɛyeli aaate shi awo lɛ.’ ”