Maŋtsɛyeli Jajelɔi Bɔ Amaniɛ

Ena “Adiagba Kome ni Jara Wa”

“ŊWƐI maŋtsɛyeli lɛ tamɔ guɔyelɔ ko ni taoɔ adiagbai fɛfɛji, ni beni eyana adiagba kome ni jara wa lɛ, etee ni eyahɔ̃ɔ nii fɛɛ ni eyɔɔ lɛ, ni ekɛ he.” Kɛtsɔ wiemɔi nɛɛ anɔ lɛ, Yesu fee bɔ ni Nyɔŋmɔ Maŋtsɛyeli lɛ jara wa kɛteke nɔ ha lɛ he nɔkwɛmɔ nɔ. (Mateo 13:45, 46) Bei pii lɛ, ebiɔ afɔleshaai kpele diɛŋtsɛ yɛ mɛi ni yɔseɔ Maŋtsɛyeli lɛ jara walɛ lɛ agbɛfaŋ koni amɛnine ashɛ nɔ. Afee enɛ he nɔkwɛmɔ nɔ kɛtsɔ niiashikpamɔ ni nyiɛ sɛɛ ni jɛ Pingtung County, Taiwan lɛ mli.

Yɛ 1991 mli lɛ, Owula kɛ Awula Lin je shishi amɛkɛ Yehowa Odasefoi bɔi Biblia lɛ kasemɔ. Be ni maŋ lɛ mli osɔfo ko ná ele lɛ, ebɔ mɔdɛŋ koni eha amɛbafata esɔlemɔ lɛ he. Akɛni owula kɛ awula Lin hɔ̃ɔ kpolotooi kɛ dɔkɔdɔkɔi alá yɛ maŋ lɛŋ jara lɛ nɔ hewɔ lɛ, amɛkpɛ amɛyiŋ akɛ amɛbaabi osɔfo lɛ jwɛŋmɔ yɛ he. Eha hetoo akɛ: “Nɔ fɛɛ nɔ ni Nyɔŋmɔ efee lɛ baanyɛ afee niyenii kɛha gbɔmɔ.” Yɛ gbɛ kroko nɔ lɛ, Odasefoi lɛ wo amɛ hewalɛ koni amɛsusu nɔ ni Nyɔŋmɔ Wiemɔ lɛ yɔɔ kɛɛmɔ lɛ he. Amɛkase akɛ Yehowa Nyɔŋmɔ buɔ lá akɛ eyɛ krɔŋkrɔŋ, ejaakɛ “bɔɔ nɔ lɛ wala lɛ ji lá lɛ.” (3 Mose 17:10, 11 The New English Bible) Belɛ esa akɛ anɔkwa Kristofoi ‘ahi . . . lá.’ (Bɔfoi lɛ Asaji 15:20) Nɔ ni jɛ Ŋmalɛi lɛ amli taomɔ yɛ sane nɛɛ mli ba ji akɛ, owula kɛ awula Lin kpɛ amɛyiŋ akɛ amɛbaakpa lá lɛ hɔ̃ɔmɔ, eyɛ mli akɛ enɛ ji nɔ ni haa amɛnáa shika. Shi kɛlɛ, yɛ be fioo ko mli lɛ, amɛkɛ kaa ni naa wa waa kpe lolo.

Dani amɛaakase anɔkwale lɛ, no mli lɛ, owula kɛ awula Lin edũ betel ŋmɛ 1,300 yɛ amɛshikpɔŋ nɔ. Eyɛ mli akɛ ebaahe afii enumɔ dani sɛɛnamɔ aaaba tsei lɛ ahe moŋ, shi owula kɛ awula Lin baanyɛ akpa gbɛ akɛ amɛbaaná $77,000 daa afi kɛji akɛ tsei lɛ wo jogbaŋŋ. Yɛ be mli ni klɛŋklɛŋ nikpamɔ be lɛ shɛɔ lɛ, ebabi ni owula kɛ awula Lin lɛ afee yiŋkpɛɛ ko ni he hiaa. Amɛ́kase kɛjɛ amɛ Biblia mli nikasemɔ lɛ mli akɛ, esa akɛ Kristofoi atsuu amɛhe ‘kɛjɛ heloo kɛ mumɔŋ fɛɛ he muji mli’ kɛtsɔ amɛhe ni amɛaatsi kɛaajɛ subaŋi ni he tseee tamɔ tawa shɛremɔ, tsofai ni akɛtsuɔ nii yɛ gbɛ fɔŋ nɔ, kɛ betel ŋmɛ kpemɔ he loo ni aaaha nakai nifeemɔi lɛ aya hiɛ lɛ nɔ. (2 Korintobii 7:1) Mɛni amɛbaafee?

Owula Lin kpɛ eyiŋ akɛ ebaakpa nikasemɔ lɛ, yɛ nɔnyɛɛ ni enáa yɛ ehe nilee ni gbaa enaa lɛ hewɔ. Yɛ nɛkɛ be nɛɛ mli lɛ, Awula Lin hɔ̃ɔ betel ŋmɛ ní ena kɛjɛ amɛtsei lɛ ekomɛi ni edara lɛ anɔ, ni ená sɛɛnamɔ ni fa fe $3,000. Enɛ ji gbɛkpamɔ ko kɛkɛ ni tsɔɔ nɔ ni etsɛŋ ni amɛbaaná kɛji akɛ amɛbaabaa amɛtsei lɛ ayi. Shi kɛlɛ, Owula Lin he nilee tee nɔ ehao lɛ lolo.

Sane nɛɛ hao lɛ aahu kɛyashi gbi ko lɛ, ekɛɛ Odasefoi ni yɔɔ jɛmɛ lɛ koni amɛfolɔ betel ŋmɛ tsei ni eyɔɔ lɛ amɛshwie shi amɛha lɛ. Odasefoi lɛ tsɔɔ mli akɛ eji lɛ diɛŋtsɛ eyiŋkpɛɛ ni sa akɛ etsu he nii; no hewɔ lɛ, ebaabi ni ‘etere lɛ diɛŋtsɛ ejatsu’ ni efolɔ tsei lɛ eshwie shi lɛ diɛŋtsɛ. (Galatabii 6:4, 5) Amɛwo lɛ hewalɛ koni ekai shiwoo ni yɔɔ 1 Korintobii 10:13, ni kɛɔ akɛ: “Kaa ko bako nyɛnɔ ni jeee gbɔmɔ he nɔ; shi anɔkwafo ji Nyɔŋmɔ, mɔ ni haŋ aka nyɛ fe bɔ ni nyɛaanyɛ, shi moŋ ekɛ kaa lɛ nɔŋŋ aaaje gbɛ aha nyɛ ni nyɛje mli hu, koni nyɛnyɛ mli nyɛmɔ.” Odasefoi lɛ hu kɛlɛ susu nii ahe, amɛkɛɛ: “Kɛ wɔfolɔ otsei lɛ wɔshwie shi wɔha bo lɛ, ekolɛ obaashwa ohe, ni obaashwa wɔ yɛ nii ni eŋmɛɛ bo lɛ hewɔ.” Yɛ be fioo ko sɛɛ lɛ, Awula Lin hiɛ tsɛ̃ yɛ tsɔne ko ni akɛ gbaa tsei agbɛɛmɔ hewɔ. Ewu kɛ gbekɛbii lɛ miifolɔ betel ŋmɛ tsei lɛ kɛmiishwie shi!

Owula Lin yɔse akɛ, Yehowa yeɔ E-shiwoo mli anɔkwa. Ená nitsumɔ ni ha ena henilee kpakpa mli ŋɔɔmɔ, ní ha ena hegbɛ koni enyɛ ebatsɔ Yehowa yijielɔ. Abaptisi lɛ yɛ Yehowa Odasefoi a-kpokpai bibii anɔ kpee ko shishi yɛ April 1996 mli.

Hɛɛ, Owula Lin “hɔ̃ɔ nii fɛɛ ni eyɔɔ lɛ” yɛ gbɛ ko nɔ, ni ekɛ he “adiagba kome ni jara wa.” Amrɔ nɛɛ, ena hegbɛ ni ekaaa akɛ eeená ekɛ Yehowa Nyɔŋmɔ teŋ wekukpaa kpakpa, ni eeesɔmɔ yɛ E-Maŋtsɛyeli lɛ he nibii amli.