“Nyɛsɔ̃mɔa Nuntsɔ lɛ, Kristo”

GBƆMƐI akpekpei abɔ eŋmɛ amɛtsui shi yɛ nyɔŋyeli jatsũ lɛ shishi yɛ yinɔsane be fɛɛ mli. Akɛ nɔkwɛmɔ nɔ lɛ, Israelbii lɛ na nɔ̃ babaoo yɛ Mizraim nyɔji anɔkwɛlɔi lɛ adɛŋ, afii akpei abɔ ni eho nɛ. Taakɛ Biblia lɛ kɛɔ lɛ, “amɛto nyɔji-akpalalɔi yɛ Israelbii lɛ anɔ, koni amɛkɛ nitsumɔi ni tsiitsii awa amɛyi,” titri lɛ ŋtayaai afeemɔ.—2 Mose 1:11, The Jerusalem Bible.

Ekolɛ gbɔmɛi tsuŋ nyɔ̃ji anitsumɔ yɛ nakai shishinumɔ diɛŋtsɛ naa, yɛ maji pii amli ŋmɛnɛ, shi ehe miihia ni gbɔmɛi kɛ ŋmɛlɛtswai pii atsu tɔlɛ nitsumɔi—yɛ bei komɛi amli lɛ yɛ shihilɛi ni ehiii—shishi. Amɛyɛ jatsũ ni tsii ni abaanyɛ atsɛ lɛ shika helɛtemɔ mli nyɔŋyeli shishi.

Shi kɛlɛ, nyɔŋyeli kome ko yɛ ni etsiii, Bɔfo Paulo wo nanemɛi heyelilɔi lɛ hewalɛ akɛ: “Nyɛsɔmɔa Nuntsɔ lɛ, Kristo.” (Kolosebii 3:24, NW) Mɛi ni halaa akɛ amɛaatsɔmɔ Kristo nyɔji lɛ naa heyeli kɛjɛɔ amɛ jatsũi ni tsii lɛ ashishi. Yesu diɛŋtsɛ kɛɛ akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsũi fe nyɛ lɛ, ni maha nyɛ hejɔɔmɔ. Nyɛwoa mipã lɛ nyɛfɔa nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaana hejɔɔmɔ nyɛaaha nyɛsusumai lɛ. Ejaakɛ mipã lɛ teremɔ waaa, ni mijatsũ lɛ etsiii.”—Mateo 11:28-30.

Kristo apã lɛ nɔkpɛlɛmɔ haaa mɔ ko aye ehe kɛjɛ gbɛnaa nii ni kã mɔ ko nɔ akɛ eha eweku lɛ amɛ heloonaa hiamɔ nii lɛ he. (1 Timoteo 5:8) Shi, ekɛ heyeli kɛmiijɛ heloonaa nibii asɛɛdii ni elalaa mɛi ahe lɛ hãa. Ní amɛaaha heloonaa nibii afee amɛ miishɛjemɔ nii titri yɛ shihilɛ mli lɛ, Kristofoi naa tsui ni nyɔɔ mɔ mli yɛ shihilɛ mli nibii ni he hiaa kɛkɛ lɛ ahe.—1 Timoteo 6:6-10; okɛto 1 Korintobii 7:31 he.

Kristofoi naa hejɔɔmɔ hu kɛjɛɔ Nyɔŋmɔ Maŋtsɛyeli lɛ he “sanekpakpa” lɛ shiɛmɔ he gbɛnaa nii ni kã amɛnɔ lɛ tsumɔ mli. (Mateo 24:14) Enɛ kɛ miishɛɛ kɛ tsui ni nyɔɔ mɔ mli diɛŋtsɛ baa!

Esa akɛ wɔda shi akɛ wɔbaanyɛ ‘wɔsɔ̃mɔ Nuntsɔ lɛ, Kristo’!

[He ni Mfoniri ni yɔɔ baafa 32 lɛ Jɛ]

Pictorial Archive (Near Eastern History) Est.