Anɔkwayeli Kɛtsɔ Heniianaa loo Nihalamɔ Nɔ?
“EYƐ mli akɛ yɛ fɔmɔsu naa lɛ, miyeee anɔkwale moŋ, shi bei komɛi lɛ mifeɔ nakai kɛtsɔɔ heniianaa nɔ.” Nɛkɛ ji bɔ ni Autolycus ni yeee anɔkwale lɛ kɛɔ yɛ The Winter’s Tale ni William Shakespeare ŋma lɛ mli. Enɛ feɔ bɔ ni adesa gbɔjɔmɔ yɔɔ kɛjɛ shishijee—nɔ ni tsirɛɔ wɔ kɛyaa efɔŋ feemɔ he, ni jɛɔ ‘kutumpɔo tsui’ lɛ mli lɛ he mfoniri. (Yeremia 17:9; Lala 51:7; Romabii 5:12) Shi, ani enɛ tsɔɔ akɛ wɔbɛ nɔ ni wɔbaahala yɛ sane lɛ mli? Ani subaŋ kpakpa ji heniianaa sane ko kɛkɛ? Dabi kwraa!
Dani Israelbii lɛ aaabote Shiwoo Shikpɔŋ lɛ nɔ lɛ, Mose kɛ amɛ wie beni amɛbɔ ŋsara yɛ Moab ŋa kpalanaa lɛ nɔ lɛ. Ekɛ nihalamɔi sɔrɔtoi enyɔ ni yɔɔ faŋŋ shwie amɛhiɛ. Amɛbaanyɛ amɛbo Nyɔŋmɔ kitai lɛ atoi ni amɛnine ashɛ jɔɔmɔ nɔ loo amɛkpoo, ni amɛkpa esha mli yibii fɔji lɛ. (5 Mose 30:15-20) Amɛyɛ hegbɛ ni amɛhalaa emli eko.
Ákɛ gbɔmɛi ni yeɔ amɛhe lɛ, wɔ hu wɔyɛ nɔ ni wɔbaahala. Mɔ ko mɔ ko—ni Nyɔŋmɔ fata he—enyɛɛɛ wɔnɔ ni wɔfee ekpakpa loo wɔfee efɔŋ. Shi kɛlɛ, mɛi komɛi baanyɛ abi yɛ gbɛ ni ja nɔ akɛ, ‘Kɛ wɔtsui edɔ kɛtee efɔŋ feemɔ he lɛ, te wɔɔfee tɛŋŋ wɔfee ekpakpa hu?’ Ojogbaŋŋ, nyanyɔŋ he tsofatsɛ kwɛɔ nyanyɔji lɛ jogbaŋŋ koni ena kɛji fɔlɔ yɛ mli loo efite, dani efeɔ he nɔ ko. Nakai nɔŋŋ ehe hiaa ni wɔpɛi wɔ mfoniri-feemɔŋ tsui lɛ mli jogbaŋŋ, ni wɔtao gbɔjɔmɔi kɛ jeŋba fitemɔ. Mɛni hewɔ? Ejaakɛ Yesu kɛɛ akɛ, “tsui mli ni susumɔi fɔji, gbɔmɔgbee, gbalafitemɔi, ajwamaŋbɔi, juu, amale odaseyelii kɛ musubɔi jɛɔ.”—Mateo 15:18-20.
Bɔni afee ni nyanyɔŋ he tsofatsɛ ko abaa nyanyɔŋ ko yi lɛ, esa akɛ efamɔ nɔ ni enaa akɛ efite lɛ fɛɛ kɛmɔ shi. Nakai nɔŋŋ faishitswaa kɛ nitsumɔ he miihia koni akɛjie “susumɔi fɔji” kɛ nibii fɔji ni ashweɔ lɛ fɛɛ kɛjɛ tsui lɛ mli. Kɛtsɔ Nyɔŋmɔ Wiemɔ lɛ, ni ji Biblia lɛ ni wɔɔkane ni wɔjwɛŋ nɔ lɛ nɔ lɛ, jeee wɔ-Bɔlɔ lɛ gbɛ̀i pɛ wɔbaleɔ, shi moŋ wɔkaseɔ ekpakpafeemɔ hu.—Yesaia 48:17.
Israel Maŋtsɛ David kɛ ehe ha yelikɛbuamɔ ni he hiaa lolo yɛ ta ni ewuɔ koni efee nɔ ni ja lɛ mli. Esɔle akɛ: “Nyɔŋmɔ, bɔɔ tsui ni he tse ohã mi, ni ofee mumɔ ni fiɔ shi ehee yɛ mimli!” (Lala 51:12) Hɛɛ, kɛtsɔ wɔhe ni wɔkɛaafɔ̃ Yehowa Nyɔŋmɔ nɔ yɛ sɔlemɔ mli lɛ nɔ lɛ, wɔ hu wɔbaanyɛ wɔye nibii ni tsirɛɔ wɔ koni wɔfee efɔŋ lɛ anɔ kunim, ni wɔná “mumɔ hee” ni wɔfee ekpakpa. Yɛ nɛkɛ gbɛ nɔ lɛ, wɔshiŋ anɔkwayeli wɔhaŋ heniianaa. Ebaafee nɔ ni wɔhala.
[Mfoniri ni yɔɔ baafa 21]
Taakɛ eji yɛ David sane lɛ mli lɛ, sɔlemɔ kɛha Yehowa baanyɛ aye abua wɔ ni wɔfee ekpakpa