‘Nyɔŋmɔ Abo Mibaa’

KAAI kɛ nɔnyɛ̃ɛi miifa daa nɛɛ yɛ “jaramɔ bei” nɛɛ amli. Akɛ nɔkwɛmɔ nɔ lɛ, ekolɛ, abaaka wɔ anɔkwayeli akwɛ yɛ nitsumɔ he. Ekolɛ, wɔnanemɛi skulbii baaka wɔ jeŋba hetsemɔ amɛkwɛ. Ni jeŋ ní ekpɔtɔ yɛ jeŋba mli lɛ kaa wɔ emuuyeli mlihiɛmɔ ekwɛɔ shii abɔ.—2 Timoteo 3:1-5.

Biblia ŋmalɔ Asaf hu hi shi yɛ be ni efɔŋfeemɔ efa mli. Etipɛŋfoi lɛ ekomɛi kɛ amɛjeŋbai gbohii lɛ po shwã. Asaf ŋma akɛ, “hewɔ lɛ, amɛkuɛnii ji hewoo, yiwalɛ eha amɛhe tamɔ mama. Amɛyeɔ mɛi ahe fɛo, ni amɛkɛ yitso fɔŋ wieɔ amimyeli wiemɔi, amɛfaa amɛhe amɛwieɔ.” (Lala 73:6, 8) Ani ofɔɔ subaŋ nɛɛ namɔ?

Kɛha gbɔmɛi ni sumɔɔ akɛ amɛaafee nɔ ni ja lɛ, jeŋba ni tamɔ nɛkɛ haoɔ amɛ waa, ni ejeɔ amɛnijiaŋ wui po. Asaf kɛ awerɛhoyeli wie akɛ, “minaa nɔ̃ daa jenamɔ, ewa tsɔ̃ ha mi.” (Lala 73:14, 16) Ekolɛ, bo hu obaanu he nakai, shi onijiaŋ akaje wui! Asaf nyɛ edamɔ egbii lɛ amli yiwalɛ nifeemɔi lɛ anaa, ni bo hu obaanyɛ ofee nakai. Shi yɛ mɛɛ gbɛ nɔ?

Asaf bayɔse akɛ, anyɛŋ ana anɔkwa jalɛsane yɛ adesa nɔyeli ni yeee emuu nɛɛ shishi kɔkɔɔkɔ. (Lala 146:3, 4; Abɛi 17:23) No hewɔ lɛ, yɛ nɔ najiaŋ ni eeefite ebe, ehewalɛ, kɛ enibii ni jara wawai ni ekɛbɔ mɔdɛŋ ni eha akpa efɔŋ feemɔi ni ebɔle ehe kɛkpe lɛ, ekɛ ejwɛŋmɔ ma ekɛ Nyɔŋmɔ teŋ wekukpaa lɛ nɔ. Asaf kɛɛ: “Mi lɛ, Nyɔŋmɔ ŋɔɔ hilɛ hi ha mi; mikɛ Nuntsɔ [Maŋtsɛ, NW] Yehowa efee mibobaahe.”—Lala 73:28.

Ŋmɛnɛ, mɛi ni kɛ amɛhe woɔ nitsumɔ mli nifeemɔi fɔji amli lɛ náa heloonaa nii babaoo. Ekolɛ, mɛi pii kɛ bulɛ ni amɛbɛ kɛha Nyɔŋmɔ jeŋba he mlai lɛ po baashwã. Shi, amɛyeŋ omanye kɛyaŋ naanɔ. Asaf tsɔɔ akɛ, “Hɛɛ, okɛ amɛ eto hei ni shãmɔɔ trotro, oŋɔɔ amɛ otswiaa shi, ni amɛkumɔɔ dukuduku.”—Lala 73:18.

Hɛɛ, yɛ Nyɔŋmɔ be ni sa mli lɛ, abaafo ojotswaa, awuiyeli, kɛ juu kɛ fɔ̃, ní nibii fɔji fɛɛ ni afeɔ ni biɔ ni anɔkwa Kristofoi akwa lɛ fata he lɛ asɛɛ. Biblia lɛ ewo shi akɛ: “Efɔŋfeelɔi lɛ, aaafolɔ amɛ ashwie; shi mɛi ni kwɛɔ Yehowa gbɛ lɛ, shikpɔŋ lɛ aaatsɔ amɛ nɔ̃.” (Lala 37:9) Dani enɛ aaaba lɛ, nyɛhaa wɔhaa lalatsɛ lɛ wiemɔi lɛ ajijea, mɔ ni kɛɛ: “Yehowa ji mitɛsaa kɛ mimɔɔ kɛ miherelɔ, mi-Mawu, mitɛsaa ni wa ni mibaa lɛ abo, mitsɛ̃ŋ kɛ miyiwalaheremɔ akolonto, mimɔɔ ni kwɔ.”—Lala 18:3.