‘Wɔmiitao Gbɔmɛi ni Yeɔ Anɔkwa’

ANƆKWAYELI faaa yɛ ŋmɛnɛ je nɛɛ mli. Ni kɛlɛ, eji shishijee taomɔ nii kɛha Kristofoi. Paulo ŋma akɛ: “Wɔmiitao akɛ wɔba wɔjeŋ kɛ anɔkwayeli yɛ nii fɛɛ mli.” (Hebribii 13:18, NW) Enɛ ji nɔ ni Wilma, ni eji Yehowa Odasefoi ateŋ mɔ kome yɛ Faenza, Italy lɛ, taoɔ ni efee.

Il Resto del Carlino adafitswaa wolo lɛ tsɔɔ mli akɛ, beni ena shika kotoku ko ni shika babaoo yɔɔ mli, yɛ shwapo wulu ko ni yɔɔ emaŋtiase lɛ mli lɛ agbo lɛ naa lɛ, ekɔ kɛyaha polisifoi lɛ “ni shishashaomɔ ko bɛ mli,” koni anyɛ akɛku sɛɛ akɛha nɔtsɛ.

Beni maŋtiase nɔkwɛlɔ lɛ nu enɛ he lɛ, eŋma wolo kuku kɛyaha Wilma ni ekɛda lɛ shi. Eŋma akɛ: “Mijɛ mitsui mli fɛɛ miida bo shi waa, yɛ Maŋtiase lɛ gbɛi amli, yɛ onifeemɔ ni hi jogbaŋŋ kɛmɔ shi nɛɛ he. Wɔ maŋtiase fɛfɛo, ni ji Faenza miitao gbɔmɛi kpakpai ni yeɔ anɔkwa.”

Kɛji aná ale wɔ nifeemɔi kpakpai lɛ jio, anaaa ale jio, esa akɛ wɔbɔ mɔdɛŋ waa ni wɔye anɔkwa. Taakɛ Ŋmalɛi Krɔŋkrɔŋi lɛ woɔ ŋaa lɛ, “wɔmiibɔ mɔdɛŋ ni wɔfee nɔ ni ja, jeee yɛ Nyɔŋmɔ hiɛ pɛ kɛkɛ, shi moŋ yɛ gbɔmɛi ahiɛ hu.”—2 Korintobii 8:21, The Jerusalem Bible.