Ani Abaajie Nibii ni Tamɔ Enɛ Kɛjɛ Wɔshihilɛ Mli Kwraa Gbi Ko?

HE FƐƐ HE ni wɔɔtsɔ wɔhe kɛya gbii etɛ nɛɛ lɛ, wɔnaa béi, nɔmɔ, kɛ ta he mfonirii. Shi ejeee wolo tɛtrɛɛ nɛɛ yiŋtoo akɛ ekɛ nibii babaoo baafata adafitswaa fɔŋ ni ole momo lɛ he. Shi moŋ, kɛ hoo lɛ, nɔ ni eje kpo ni yɔɔ krɛdɛɛ nɛɛ baatsɔɔ bo anɔkwalei enyɔ komɛi ni shɛjeɔ mɔ mii. Klɛŋklɛŋ nɔ lɛ ji akɛ, blema gbalɛi ni yɔɔ Biblia lɛ mli lɛ gba wɔyinɔ nɛɛ mli adafitswaa ni hãa mɔ he jɔ̃ɔ ehe lɛ efɔ̃ shi diɛŋtsɛ; nɔ ni ji enyɔ lɛ, akɛ nɛkɛ gbalɛ wolo nɛɛ nɔŋŋ gba gbi ko ni shihilɛi ni tamɔ nɔ ni afee he mfoniri yɛ biɛ lɛ baafee tsutsu nii ni eho etee lɛ hu afɔ̃ shi. Tai bɛ dɔŋŋ. Okpɛlɛmii atswiamɔ, gbɔmɛi ni atswiaa amɛ tu ni agbeɔ amɛ, okpɛlɛmii bibii ni afũɔ yɛ shikpɔŋ, loo mɛi ahegbeyeiwoo bɛ dɔŋŋ. Awũsai ni ehao loo abobalɔi ni bɛ shihilɛ he hu bɛ dɔŋŋ. Jeŋ ni anɔkwa toiŋjɔlɛ ni hãa mɔ tsui nyɔɔ emli baahi shi. Ani obaasumɔ ni ona be ni tamɔ nɛkɛ? Wɔmiiwo bo hewalɛ ni osusu nɔ ni Biblia lɛ yɔɔ kɛɛmɔ lɛ he. Obaaná miishɛjemɔ babaoo yɛ mli fe bɔ ni osusu he pɛŋ akɛ ooonyɛ oná.