Gbalashihilɛ ko Ni Eye Afii 403 lɛ Ebote Haomɔ Mli

YƐ Sweden lɛ, Sɔlemɔ kɛ Maŋ lɛ kɛ nɔ ni fa fe afii 400 sɔŋŋ ena wekukpaa ni bɛŋkɛ kpaakpa mli ŋɔɔmɔ. Amrɔ nɛɛ jamɔ kɛ nɔyeli teŋ gbalashihilɛ lɛ miigbɔjɔ.

Ato Lutheran jamɔ shishi akɛ Maŋ lɛ jamɔ yɛ afi 1593 mli, ni abi ni Swedenbii fɛɛ atsɔmɔ emli bii ni abaptisi amɛ. Afii komɛi asɛɛ, yɛ 1850 afii lɛ amli lɛ, afee tsakemɔ ko. Ehe ehiaaa ni abaptisi Swedenbii dɔŋŋ; shi kɛlɛ, atee nɔ abu amɛ akɛ Lutheran Sɔlemɔ lɛ mli bii lolo. No hewɔ lɛ, abi ni amɛwo shika ni ji amɛ nyɔmɔwoo ni amɛwo enɔ too lɛ mli oha mlijaa 1 koni amɛkɛfi sɔlemɔ lɛ sɛɛ, ni amɛwo maŋ sɔɔmɔi komɛi ni sɔlemɔ lɛ kɛhaa lɛ hu he nyɔmɔ. Nyɛsɛɛ nɛɛ nɔŋŋ lɛ, akɛ tsakemɔ kroko hu ba. Kɛjɛ 1952 kɛbaa nɛɛ, Swedenbii baanyɛ agbala amɛhe shi kɛjɛ sɔlemɔ lɛ mli yɛ mla naa, koni nakai feemɔ ajie amɛ kɛjɛ sɔlemɔ toowoo lɛ mli babaoo mli.

Hewalɛ ni Lutheran Sɔlemɔ lɛ yɔɔ yɛ mɛi anɔ yɛ Sweden lɛ eba shi kwraa yɛ nyɛsɛɛ afii nɛɛ amli. Anyɛɛɛ atsĩ enɛ naa, ejaakɛ gbɔmɛi ni yɔɔ Sweden lɛ mlijaa oha mli 10 ji gbɔi ni ebahi maŋ lɛ mli, ni amɛjeee Lutheran jamɔ lɛ mli bii, ni Yudafoi, Katolikbii, kɛ Muslimbii fata he. Enɛ hewɔ lɛ, yɛ 1996 afi lɛ shishijee gbɛ lɛ, Swedenbii amlijaa oha mli 86 pɛ yaa Lutheran Sɔlemɔ lɛ, ni yibɔ lɛ kã he eeba shi lolo.

Shikpilikpii-feemɔ ni yaa hiɛ nɛɛ kɛ béi miiba Sɔlemɔ lɛ kɛ Maŋ lɛ teŋ. Amrɔ nɛɛ, ajaje atsɔɔ momo akɛ ehe ehiaaa ni maŋtsɛ lɛ afee Lutheran jamɔ lɛ mlinyo, ni abuuu bii ni fɔlɔ ni ji Lutheran jamɔ lɛ mlinyo ko fɔɔ lɛ akɛ amɛji Lutheran Maŋ Jamɔ lɛ mli bii dɔŋŋ. Kɛfata he lɛ, taakɛ The Dallas Morning News lɛ tsɔɔ lɛ, beni aaashɛ afi 2000 lɛ, “esa akɛ maŋ lɛ mli jamɔ kui kɛ maŋ lɛ abu nii babaoo ni amrɔ nɛɛ eji sɔlemɔ lɛ nɔ lɛ he akɔntaa ni amɛja. Esa akɛ sɔlemɔ lɛ atse shika ni efiteɔ daa afi, ni ji dɔlai akpekpei akpei 1.68, ni abuaa emli babaoo naa kɛtsɔɔ too ni awoɔ nɔ lɛ nɔ kwraa.” Yɛ afii oha nɛɛ naagbee lɛ, sɔlemɔ lɛ baahala lɛ diɛŋtsɛ esɔfonukpai agbɛnɛ.

Yɛ be mli ni shikpilikpii-feemɔ kɛ amɛyifalɛ ni baa shi lɛ haoɔ Kristendom lɛ, belɛ Yehowa Odasefoi ni yɔɔ Sweden lɛ miiya nɔ amɛmiishwere. 1997 Yearbook of Jehovah’s Witnesses bɔɔ amaniɛ akɛ Nyɔŋmɔ Maŋtsɛyeli lɛ he shiɛlɔi 24,487 yɛ nakai shikpɔŋ lɛ nɔ, ni nɔ ni miihe ashɛ amɛyifalɛ nɛɛ mlijaa oha mli 10 miishiɛ akɛ be-fɛɛ gbɛgbalɔi sɔɔlɔi. Mɛnɛɛmɛi ateŋ mɛi pii miiya hiɛ kɛmiishɛ sɔɔmɔ hegbɛi wuji ahe. Akɛ nɔkwɛmɔ nɔ lɛ, yɛ 1995 kpokpai wuji anɔ kpeei ni Yehowa Odasefoi fee lɛ ashishi lɛ, gbalashihilɛ mli hefatalɔi 20 kɛ amɛ gbɛbimɔ woji ni amɛŋmala lɛ hã kɛha maŋsɛɛ sanekpakpa shiɛmɔ lɛ he tsɔsemɔ yɛ Buu-Mɔɔ Biblia Gilead Skul lɛ. No mli lɛ, Swedenbii ni egbe nikasemɔ naa yɛ klas sɔrɔtoi ni afee momo lɛ amli lɛ aaashɛ mɛi 75 yɛ ni miisɔmɔ akɛ maŋsɛɛ sanekpakpa shiɛlɔi yɛ je lɛŋ hei sɔrɔtoi fɛɛ. Ŋwanejee ko bɛ he akɛ, amɛ nɔkwɛmɔ nɔ kpakpa kɛ woji ni amɛŋmalaa, kɛ saramɔi ni woɔ mɔ hewalɛ lɛ ena hewalɛ ni kanyaa mɔ yɛ nakai mɛi heei ni susuɔ nɛkɛ hegbɛ kpele nɛɛ he lɛ anɔ waa.

Enɛ hewɔ lɛ, beni Kristendombii akpekpei abɔ lɛ naa amanehulu kɛ mumɔ ni ekumɔ lɛ, belɛ Yehowa Odasefoi ‘miila kɛ tsuijurɔ.’—Yesaia 65:13, 14.

[Shikpɔŋ he mfoniri ni yɔɔ baafa 30]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Sweden