Akũ Apasa Naafolɔmɔi Anaa yɛ France

YEHOWA ODASEFOI ni yɔɔ France lɛ bafee mɛi ni akɛ apasa wiemɔi folɔɔ amɛnaa babaoo nyɛsɛɛ nɛɛ. Akɛni adafitswaa woji kɛ redio mli saji kɛ osharai ni ba nyɛsɛɛ nɛɛ ni kɔɔ teemɔŋ jamɔ kui ni yɔɔ Europa kɛ Japan lɛ ahe lɛ tsu nii hewɔ lɛ, amɛgbɛ saji ni ejaaa ni kɔɔ Odasefoi ahe amɛshwã. Amɛwie amɛhe yɛ gbɛ ni ejaaa nɔ akɛ jamɔ kui ni da ni he yɔɔ oshara fe fɛɛ lɛ ateŋ ekome.

Bɔni afee ni ajaje saji lɛ, Yehowa Odasefoi ŋma dɛhiɛmɔ wolo ko ni ha sanebimɔi tamɔ enɛɛmɛi ahetoo: Namɛi ji Yehowa Odasefoi? Ani amɛji Kristofoi? Ani amɛkpɛlɛɔ tsofafeemɔ nɔ? Mɛni hewɔ amɛyaa shia kɛ shia lɛ? Mɛɛ gbɛ nɔ atsɔɔ akɛ shika fiɔ amɛ nitsumɔ lɛ sɛɛ? Yehowa Odasefoi ahe baa sɛɛnamɔ kɛhaa akutso lɛ yɛ mɛɛ gbɛ nɔ?

Abatsɛ dɛhiɛmɔ wolo ni tsɔɔ saji amli yɛ France wiemɔ mli nɛɛ akɛ Jehovah’s Witnesses—What You Need to Know (Yehowa Odasefoi—Nɔ ni Ehe Hiaa ni Ole). Bɔni afee ni aha gbɔmɛi babaoo anine ashɛ dɛhiɛmɔ wolo lɛ nɔ bɔ ni sa lɛ, ato tafãa he gbɛjianɔ. Aja nɔ ni fa fe ekomekomei akpekpei nɛɛhu kɛjɛ May 13 kɛbashi June 9, 1996.

Gbɔmɛi pii ahiɛ sɔ dɛhiɛmɔ wolo nɛɛ, ni maŋ onukpai fata he. Beni kpokpaa wulu nɔ bɛgwafoi lɛ ateŋ mɔ kome kane dɛhiɛmɔ wolo lɛ sɛɛ lɛ, eŋma akɛ: “Wiemɔi ni awie ashi Yehowa Odasefoi lɛ wo mimli la waa. Mihiɛ ebasɔ nyɛ nikee kɛ pɛsɛmkunya su ni bɛ nyɛ nitsumɔ lɛ he lɛ shii abɔ.” Europa Mlawolɔi Agwabɔɔ lɛ mli nyo ni kane dɛhiɛmɔ wolo lɛ ŋma akɛ: “Gbɔmɛi lɛ ateŋ mɛi ni fa le bɔ ni amɛaatsɔɔ sɔrɔtofeemɔ ni kã Kristofoi akuu ni nyɛfata he lɛ kɛ teemɔŋ jamɔ kui lɛ ateŋ lɛ jogbaŋŋ.”

Odasefonyo ko kɛ dɛhiɛmɔ wolo lɛ ha osɔfo ko ni he amrɔ nɔŋŋ yɛ Brittany. Osɔfo lɛ kɛɛ: “Miijie nyɛyi yɛ nɔ ni nyɛfeɔ lɛ hewɔ.” Kɛkɛ ni ekɛfata he akɛ: “Miwoɔ misafoŋbii lɛ hewalɛ ni amɛhere nyɛ kɛba amɛshiai amli ni amɛha nyɛ kɔfe nyɛnu. Nyɛbaanyɛ nyɛkɛɛ mɛi ni nyɛkɛkpeɔ lɛ akɛ nyɛba mishia. Miisumɔ ni makɛɛ nyɛ hu akɛ, misumɔɔ nyɛ woji lɛ akanemɔ.”

Beni Protestantnyo ko nine shɛ dɛhiɛmɔ wolo lɛ nɔ yɛ Alsace lɛ, eŋma Buu Mɔɔ Asafo lɛ wolo, ni eebi ni akɛ lɛ abakase Biblia lɛ. Eŋma akɛ: “Akɛni milaaje hekɛnɔfɔɔ fɛɛ ni miyɔɔ yɛ misɔlemɔ lɛ mli hewɔ lɛ, miikpa mumɔŋ shishijee hee gbɛ.” Yɛ apasa ni akɛfolɔɔ amɛnaa yɛ bei komɛi amli lɛ fɛɛ sɛɛ lɛ, Yehowa Odasefoi ni yɔɔ France—yɛ anɔkwale mli lɛ, yɛ je lɛŋ fɛɛ lɛ—yaa nɔ amɛyeɔ amɛbuaa gbɔmɛi koni amɛbaná Nyɔŋmɔ yiŋtoi ahe anɔkwale nilee, taakɛ akɛmamɔ shi yɛ Biblia lɛ mli lɛ.—2 Timoteo 3:16, 17.