Maŋtsɛyeli Jajelɔi Bɔ Amaniɛ
“Nyɛhaa Nyɛla Atsoa Yɛ Gbɔmɛi Ahiɛ”
YESU kɛɛ ekaselɔi lɛ yɛ e-Gɔŋ nɔ Shiɛmɔ lɛ mli akɛ: “Nyɛji je lɛŋ la lɛ.” Etee nɔ ewo amɛ hewalɛ akɛ: “Nyɛhaa nyɛla atsoa yɛ gbɔmɛi ahiɛ, koni amɛna nyɛ nifeemɔ nii kpakpai lɛ, ni amɛwo nyɛtsɛ ni yɔɔ ŋwɛi lɛ hiɛ nyam.”—Mateo 5:14-16.
Anaa Yehowa Odasefoi ni yɔɔ Italy lɛ anifeemɔ nii kpakpai lɛ faŋŋ. Akɛ nɔkwɛmɔ nɔ lɛ, amɛ jeŋba kpakpa ni anaa yɛ be mli ni amɛyaa amɛ daa afi kpeei wuji lɛ kɛ yijiemɔ haa Nyɔŋmɔ, taakɛ amaniɛbɔi ni nyiɛ sɛɛ lɛ yeɔ he odase lɛ:
▪ Yoo ko ni yɔɔ Terni, yɛ Italy lɛ, kɛ afii babaoo ye ebua ebiyoo ni amɛkɛtsu niyeli he bibioo ko ni yɔɔ shwɛmɔ he lɛ masɛi yɛ nakai maŋtiase lɛ mli lɛ he nii. Egba akɛ: “Mikadi sɔrɔtofeemɔ agbo yɛ mɛi ni baa jɛmɛ kɛhaa bɔɔltswaa shwɛmɔi kɛ kpeeyalɔi ni baa Yehowa Odasefoi akpeei ni amɛfeɔ yɛ jɛmɛ lɛ ateŋ. Odasefoi lɛ kɛ hiɛshikamɔ tsuɔ nii waa yɛ amɛhesaamɔ mli, ni amɛyeɔ anɔkwa ni amɛjieɔ bulɛ kpo hu. Bei pii lɛ, misusuɔ bɔ ni gbɔmɛi ni hiɛ hewolonɔ sui sɔrɔtoi nyɛɔ amɛkɛ amɛhe hiɔ shi jogbaŋŋ nɛkɛ lɛ he.
“Gbi ko lɛ Odasefonyo ko wa mi edamɔ shi yɛ gbɛjegbɛ lɛ he ni ebi mi akɛ ani mile Nyɔŋmɔ gbɛi lo. Mileee, ni akɛni mile akɛ gbɔmɛi kpakpai ji Yehowa Odasefoi hewɔ lɛ, mikpɛlɛ nɔ akɛ ebasara mi. Miyɛ sanebimɔi ni kɔɔ shihilɛ ni gbohii lɛ yɔɔ mli lɛ he, ni ejɛ Biblia lɛ mli eha hetoo. Mishashaooo shi kwraa ni mikpɛlɛ Biblia mli nikasemɔ nɔ, ni otsii enyɔ sɛɛ lɛ mibɔi kpeei yaa.
“Mibiyoo lɛ te shi ewo mi kɛjɛ shishijee, shi mijeŋba kɛ mifaishitswaa lɛ tsake esubaŋ. Nyɔji nɛɛhu nɛ ni mibɔi nikasemɔ. Ŋmɛnɛ, mibiyoo lɛ kɛ ewu lɛ, kɛ Odasefoi ni bayeɔ nii yɛ amɛ niyeli he bibioo lɛ wieɔ wiemɔi ni tsɔɔ hiɛsɔɔ ni amɛyɔɔ kɛha amɛ. Mi lɛ, abaptisi mi yɛ kpee wulu ko ni afee yɛ shwɛmɔ he nɛɛ mli lɛ shishi.”
▪ Yɛ kpee wulu ko ni afee yɛ Roseto degli Abruzzi lɛ sɛɛ lɛ, onukpa ni kwɛɔ shikpɔŋ ni mɛi bafeɔ buui bibii yɛ nɔ, ni amɛhiɔ jɛmɛ be kukuoo lɛ, wie akɛ: “Miyɔse akɛ Yehowa Odasefoi yeɔ anɔkwa waa yɛ nɔ fɛɛ nɔ ni amɛfeɔ mli. Nyɛsɛɛ otsi lɛ, amɛteŋ mɛi 40 bahi mishikpɔŋ ni mɛi bafeɔ buui yɛ nɔ lɛ nɔ, ni amɛhaaa mi naagba ko kwraa. Nɔ ni tamɔɔɔ mɛi krokomɛi lɛ, amɛ pɛ ji mɛi ni baa ni amɛkɛɔ mi kɛji mɔ ko fata amɛhe yɛ amɛtsu ni tsɔne gbalaa lɛ loo amɛbuu lɛ mli. Yɛ mikome migbɛfaŋ lɛ, amɛji mɛi ni baa biɛ lɛ ateŋ mɛi ni hi fe fɛɛ ni manyɛ mana.”
▪ Yɛ nakai kpee lɛ nɔŋŋ sɛɛ lɛ, gbɔiatoohe nɔkwɛlɔ ko wie akɛ: “Yehowa Odasefoi fɛɛ he jɔ. Amɛbɛ hoo kɛ basabasa, ni amɛwɔɔ mra. Amɛmli jɔ lɛlɛŋ, ni amɛyeɔ anɔkwa, ni amɛbaa amɛjeŋ jogbaŋŋ hu. Eji mɔ fɛɛ mɔ tamɔ amɛ kulɛ, ebaafee fɛo waa diɛŋtsɛ. Mɛi krokomɛi lɛ juɔ nɔ fɛɛ nɔ—kpuji, plɛtei bibii ni akɛ zigaret naa lamulu woɔ mli, kɛ wolo ni akɛsaa he yɛ niiasɛɛ kɛ sikle po! Nakai nɔ ko kwraa bako yɛ nyɛ gbɛfaŋ dã. Kɛ́ nyɛbii lɛ jie daaŋ-jiemɔ nii kɛjɛ friji lɛ mli gbɛkɛnaashi lɛ, migbaaa mihe naa miyakwɛɛɛ akɛ mɛni amɛjie lɛ. Amɛ diɛŋtsɛ amɛbuɔ akɔntaa ni amɛnaa nyɔmɔ ni amɛhiɛ mi lɛ, ni amɛbawoɔ amrɔ nɔŋŋ. Miheɔ amɛ miyeɔ waa diɛŋtsɛ. Kwɛ bɔ ni ebaafee miishɛɛ eha kɛji mɛi krokomɛi lɛ hu tamɔ nakai! Miná ni kulɛ mɛi fɛɛ ni baa biɛ lɛ ji Yehowa Odasefoi.”
Ale Yehowa Odasefoi jogbaŋŋ yɛ Italy, taakɛ ale amɛ yɛ shikpɔŋ lɛ nɔ hei krokomɛi babaoo lɛ. ‘Amɛbaa amɛjeŋ jogbaŋŋ yɛ jeŋmajiaŋbii lɛ ateŋ’ ni amɛkɛ nakai feemɔ jieɔ anɔkwa Nyɔŋmɔ lɛ, mɔ ni gbɛi kã amɛnɔ lɛ yi.—1 Petro 2:12.