Maŋtsɛyeli Jajelɔi Bɔ Amaniɛ

Anɔkwale lɛ ni Akɛaashɛ Gbɔmɛi Sɔrɔtoi Fɛɛ Ŋɔɔ

BƆFO Paulo ji Nyɔŋmɔ Maŋtsɛyeli lɛ jajelɔ ni yɔɔ ekaa. Eŋmɛɛɛ gbɛ ni shitee-kɛ-woo atsĩ nitsumɔ ni akɛwo edɛŋ akɛ eshiɛ “sanekpakpa lɛ” naa. (1 Korintobii 9:16; Bɔfoi lɛ Asaji 13:50-52) Paulo wo mɛi krokomɛi hewalɛ ni amɛnyiɛ enɔkwɛmɔ nɔ lɛ sɛɛ.—1 Korintobii 11:1.

Ale Yehowa Odasefoi yɛ je lɛŋ fɛɛ yɛ ekaa ni amɛkɛbɔɔ mɔdɛŋ yɛ amɛshiɛmɔ lɛ mli lɛ he. Yɛ anɔkwale mli lɛ, amɛkɛ mɛi krokomɛi wieɔ yɛ “be kpakpa” kɛ “haomɔ be” fɛɛ mli, koni amɛkɛtsu ‘kaselɔ feemɔ’ nitsumɔ ni Nyɔŋmɔ kɛwo amɛdɛŋ lɛ he nii. (2 Timoteo 4:2, NW; Mateo 28:19, 20) Akɛ shɛɛ sane ni he hiaa waa, ni kɔɔ Nyɔŋmɔ Maŋtsɛyeli lɛ he lɛ miishɛ gbɔmɛi ni yɔɔ jalɛ tsuii lɛ aŋɔɔ, yɛ shikpɔji ni amɛkɛ shitee-kɛ-woo kpeɔ yɛ nɔ lɛ po anɔ, taakɛ niiashikpamɔ ni nyiɛ sɛɛ lɛ tsɔɔ lɛ.

◻ Gbekɛ nuu ko ni eye afii 12, ni amɛyɔɔ ŋshɔkpɔ ko nɔ yɛ Pasifik anaigbɛ, he ni atsĩ Yehowa Odasefoi anitsumɔ naa yɛ lɛ, na akɛ nanemɛi fɔji sɔŋŋ ji mɛi ni ebɔle ehe kɛkpe yɛ skul lɛ. Eklasbii lɛ ateŋ mɛi pii shɛreɔ zigaret, amɛkaneɔ bɔlɛnamɔ he woji, amɛhaoɔ tsɔɔlɔi lɛ, ni amɛsumɔɔ nɔmɔ. Shihilɛ lɛ mli wo wu aahu akɛ gbekɛ nuu lɛ bi etsɛ kɛji ebaanyɛ eshi jɛmɛ kɛya skul kroko. Shi, bɔ ni tsɛ lɛ kɛ ebinuu lɛ susu saji ahe lɛ, kɛ jwɛŋmɔ ni ehiɛ lɛ kpaaa gbee, ejaakɛ enu he akɛ skulbii ni yɔɔ skul krokomɛi ni bɛŋkɛ jɛmɛ lɛ amli lɛ ajeŋba efeŋ sɔrɔto. Shi kɛlɛ, mɛɛ gbɛ nɔ ebaatsɔ eye ebua ebi lɛ?

Tsɛ lɛ kai akɛ eyɛ wolo ko yɛ shia ni aŋma kɛha gbekɛbii. Ewekunyo ko ni ji Yehowa Odasefonyo kɛke lɛ. No hewɔ lɛ etao wolo lɛ, ni beni ena lɛ, lɛ hu ekɛha ebinuu lɛ. Wolo lɛ gbɛi ji Questions Young People Ask—Answers That Work.a Yitso ni ji “Mɛɛ Gbɛ nɔ Matsɔ Makpee Tipɛŋfoi Anɔnyɛɛ Naa?” lɛ titri ye ebua gbekɛ nuu lɛ waa. Jeee akɛ etsɔɔ lɛ bɔ ni ehe hiaa ni ehiɛ bulɛ ni eyɔɔ kɛha ehe lɛ mli kɛkɛ, shi moŋ etsɔɔ lɛ bɔ ni eeefee etsɔ ŋaa gbɛ nɔ ekɛɛ dabi, kɛji mɛi krokomɛi ka akɛ amɛaanyɛ enɔ ni ekɔ gbɛ ko ni nilee bɛ mli. Gbekɛ nuu nɛɛ tsɔ Ŋmalɛ mli shishitoo mlai ni yɔɔ wolo lɛ mli lɛ nɔ ekase bɔ ni eeefee ekpee tipɛŋfoi anɔnyɛɛ naa yɛ omanyeyeli mli.

Beni tsɛ lɛ kadi enɛɛmɛi kɛ tsakemɔi kpakpai krokomɛi yɛ ebinuu lɛ he lɛ, ekpɛ eyiŋ akɛ ebaakane wolo lɛ. Bɔ ni ená ŋaawoo kpakpa ni yɔɔ wolo lɛ mli lɛ he miishɛɛ sɔŋŋ hewɔ lɛ, tsɛ lɛ kɛɛ Yehowa Odasefoi akɛ akɛ lɛ abafee shia Biblia mli nikasemɔ. Sɛɛ mli lɛ, eweku lɛ mli bii krokomɛi bafata ehe yɛ nikasemɔ lɛ mli. Mɛni jɛ mli ba? Gbekɛ nuu lɛ, kɛ enyɛmi nuu fioo, kɛ etsɛ, kɛ gbekɛ nuu lɛ nii kɛ enaa ji Yehowa Odasefoi amrɔ nɛɛ.

◻ Yɛ nakai shikpɔŋ lɛ nɔŋŋ nɔ lɛ, awo Yehowa Odasefoi enyɔ tsuŋ yɛ bɔ ni amɛboɔ Biblia shishitoo mlai atoi kɛmɔɔ shi lɛ hewɔ. Shi kɛlɛ, amɛhaaa amɛshihilɛ nɛɛ aje amɛnijiaŋ wui yɛ ekaa ni amɛkɛaawie Nyɔŋmɔ Maŋtsɛyeli lɛ he lɛ gbɛfaŋ. Amɛyanina tsuŋwoo he lɛ nɔkwɛlɔi lɛ ekome ni eŋmɛ amɛ gbɛ akɛ amɛfee Nuntsɔ lɛ Gbɛkɛnaashi Niyenii lɛ kaimɔ lɛ yɛ jɛmɛ. Kwɛ bɔ ni amɛna miishɛɛ waa beni gbokɛlɛfoi 14 jie miishɛɛ kpo yɛ Biblia lɛ he, ni amɛfata Odasefoi lɛ ahe kɛha nifeemɔ ni he hiaa nɛɛ! Yɛ amɛ jiemɔ sɛɛ lɛ, amɛteŋ mɛi komɛi tee nɔ amɛkase Biblia lɛ ni amɛkɛ Yehowa Odasefoi bɔ.

Yehowa Odasefoi naa amanehulu yɛ shikpɔji ni fa fe 25 nɔ, yɛ amɛnitsumɔ lɛ naatsii loo shitee-kɛ-woo loo yiwaa sɔrɔtoi ahewɔ. Shi kɛlɛ, taakɛ bɔfoi lɛ fee lɛ, “amɛfɔ̃ɔɔ nitsɔɔmɔ kɛ Yesu Kristo shiɛmɔ.”—Bɔfoi lɛ Asaji 5:42.

[Shishigbɛ niŋmai]