Ani Okaiɔ?

Ani onyã Buu-Mɔɔ ni baa nyɛsɛɛ nɛɛ lɛ akanemɔ he? Kɛji nakai ni lɛ, eeefee bo miishɛɛ akɛ oookai nɔ ni nyiɛ sɛɛ nɛɛ:

◻ Mɛni ji Hela wiemɔ pa·rou·si’a ni akɛtsu nii yɛ Mateo 24:3, 27, 37, 39 lɛ shishi?

Vine Expository Dictionary of New Testament Words lɛ kɛɔ akɛ: “PAROUSIA . . . tsɔɔ shishɛɛ kɛ nibii ni nyiɛɔ ba ni aba lɛ sɛɛ lɛ fɛɛ hu.” No hewɔ lɛ, ejeee be mli ni ashɛ shi kɛkɛ, shi ba ni aba kɛjɛ be mli ni abashɛ shi lɛ nɔ kɛyaa.—8/15, baafa 11.

◻ Mɛɛ gbɛ nɔ atsɔ ‘afo no gbii lɛ anɔ kpitioo’ koni anyɛ ahere “heloo” ko yiwala yɛ klɛŋklɛŋ afii oha lɛ mli, ni mɛɛ gbɛ nɔ ebaatsɔ eba mli yɛ gbɛ ni da nɔ? (Mateo 24:22)

Yɛ afi 66 Ŋ.B. lɛ, Romabii lɛ fo Yerusalem hekawoo lɛ nɔ kpitioo, ni no ŋmɛ gbɛ ni “heloo” ni ji Kristofoi jo foi. Nakai nɔŋŋ hu wɔkpaa gbɛ akɛ abaafo tutuamɔ ni baa Babilon Kpeteŋkpele lɛ nɔ lɛ nɔ kpitioo. Nɛkɛ gbɛ nɔ abaatsɔ ahere Kristofoi ni afɔ amɛ mu lɛ kɛ amɛnanemɛi lɛ ayiwala kɛjɛ hiɛkpatamɔ ni aaaba amɛnɔ lɛ mli.—8/15, baafai 18-20.

◻ Mɛni esa akɛ efee wɔnifeemɔ kɛ mɔ ko bɔi Kaimɔ nibii lɛ eko yeli loo ekpa nakai feemɔ?

Ehe ehiaaa ni enɛ agba Kristofoi komɛi anaa. Yesu kɛɛ: “Miji tookwɛlɔ kpakpa lɛ, ni mile mɛi ni ji mimɛi.” Nakai nɔŋŋ wɔyɔɔ nɔmimaa akɛ, Yehowa le mɛi ni ehala amɛ diɛŋtsɛ akɛ emumɔŋ bii lɛ. (Yohane 10:14; Romabii 8:16, 17)—8/15, baafa 31.

◻ Mɛni ji Mose Mla lɛ yiŋtoo titri?

Klɛŋklɛŋ lɛ, etsɔɔ Israelbii lɛ bɔ ni Mesia lɛ, ni baakpɔ amɛ kɛjɛ amɛ eshafeemɔ shihilɛ lɛ mli lɛ he hiaa amɛ. (Galatabii 3:24) Mla lɛ tsɔɔ Nyɔŋmɔ gbeyeishemɔ kɛ toiboo hu, ni eye ebua Israel koni amɛtsi amɛhe kɛjɛ jeŋmaji ni ebɔle amɛ lɛ anifeemɔi ni ekpɔtɔ lɛ ahe. (3 Mose 18:24, 25)—9/1, baafa 9.

◻ Mɛni ji kpaŋmɔ hee lɛ yiŋtoo? (Yeremia 31:31-34)

No ji ni ena maŋtsɛmɛi kɛ osɔfoi amaŋ ni baajɔɔ adesai fɛɛ. (2 Mose 19:6; 1 Petro 2:9; Kpojiemɔ 5:10)—9/1, baafai 14, 15.

◻ Mɛni hewɔ esa akɛ wɔkase nifeemɔ ni ji faikpamɔ lɛ?

Faikpamɔ baanyɛ aye abua ni eba piŋmɔ ni emuu ni ayeee kɛbaa lɛ shi, ni ebaanyɛ etsa mɛi ni amɛteŋ efite. Fai fɛɛ fai ni wɔkpaa lɛ ji heshibaa he nikasemɔ, ni etsɔseɔ wɔ koni wɔnu mɛi krokomɛi ahenumɔi ahe babaoo.—9/15, baafa 24.

◻ Ani Noa gbii lɛ amli jeŋ muu fɛɛ Nu Afua lɛ ji yinɔsane mli anɔkwa sane?

Hɛɛ. Abaanyɛ ana blema saji ni kɔɔ jeŋ muu fɛɛ nu afua he lɛ yɛ je lɛŋ he fɛɛ he, kɛjɛ Amerika maji lɛ anɔ kɛyashi Australia. Bɔ ni saneyitso nɛɛ egbɛ eshwã waa lɛ fiɔ anɔkwale ni eji akɛ jeŋ muu fɛɛ nu afua ko ba lɛ sɛɛ, taakɛ abɔ he amaniɛ yɛ Biblia lɛ mli lɛ. (1 Mose 7:11-20)—9/15, baafa 25.

◻ Mɛni yɔɔ gbɔfeelɔ ni aji lɛ mli? (Romabii 12:13)

Atsɔɔ “gbɔfeemɔ” shishi kɛjɛ Hela wiemɔ ko ni hiɛ shishifai wiemɔi enyɔ ni eshishi ji “suɔmɔ” kɛ “gbɔ” mli. No hewɔ lɛ, gbɔfeemɔ shishinumɔ titri ji “suɔmɔ kɛha gbɔi.” Shi ekɔɔ babaoo he fe suɔmɔ ni damɔ shishitoo mla, ni ajieɔ lɛ kpo akɛ gbɛnaa nii ni kã mɔ nɔ lɛ nɔ. Edamɔ suɔmɔ, hedɔɔ, kɛ naanyobɔɔ diɛŋtsɛ nɔ.—10/1, baafa 9.

◻ Mɛni ji Paulo naataomɔ ni kɔɔ gbalashihilɛ kɛ oshijayeli he, ni yɔɔ eklɛŋklɛŋ wolo ni eŋma eyaha Korintobii lɛ, yitso 7 lɛ?

Gbalashihilɛ ja yɛ mla naa, ni yɛ shihilɛi komɛi amli lɛ, esa kɛha mɛi komɛi. Shi kɛlɛ, ŋwanejee ko bɛ he akɛ oshijayeli he yɛ sɛɛnamɔ kɛha Kristofonyo nuu loo yoo ni miisumɔ ni esɔmɔ Yehowa ni nibii pii akawo lɛ ahuntoo lɛ.—10/15, baafa 13.

◻ Mɛɛ gbɛ nɔ onukpa ko tsɔɔ ekwɛɔ “lɛ diɛŋtsɛ eshiabii”? (1 Timoteo 5:8)

Esa akɛ onukpa ‘akwɛ lɛ diɛŋtsɛ emɛi’—eŋa kɛ agbɛnɛ ebii—yɛ heloo naa, mumɔŋ, kɛ henumɔŋ.—10/15, baafa 22.

◻ Mɛɛ gbɛ nɔ Yehowa tsɔɔ ekɛ miishɛjemɔ haa etsuji?

Nyɔŋmɔ mumɔ krɔŋkrɔŋ lɛ tsuɔ nii akɛ “miishɛjelɔ.” (Yohane 14:16, NW shishigbɛ niŋmaa) Gbɛ kroko ni Nyɔŋmɔ tsɔɔ nɔ ekɛ miishɛjemɔ haa ji kɛtsɔ Biblia lɛ nɔ. (Romabii 15:4) Nyɔŋmɔ le wɔ aŋkroaŋkro hiamɔ nii, ni ebaanyɛ ni ekɛ wɔ atsu nii ni wɔshɛjeshɛje wɔhe mii, tamɔ bɔ ni Paulo na miishɛjemɔ kɛtsɔ Tito amaniɛbɔɔ ni kɔɔ Korintobii lɛ ahe lɛ nɔ lɛ. (2 Korintobii 7:11-13)—11/1, baafai 10, 12.

◻ Bɔ ni Paulo tsɔɔ bɔ ni Yehowa ji akɛ “musuŋtsɔlɛi atsɛ” ni anaa yɛ 2 Korintobii 1:3 lɛ tsɔɔ mɛni?

Hela gbɛi ni atsɔɔ shishi akɛ “musuŋtsɔlɛi” lɛ jɛ wiemɔ ni akɛtsɔɔ awerɛho ni ayeɔ yɛ mɔ kroko piŋmɔ he lɛ mli. No hewɔ lɛ, Paulo tsɔɔ bɔ ni Nyɔŋmɔ mlijɔlɛ henumɔi kɛha E-tsuji anɔkwafoi fɛɛ ni miipiŋ yɛ amanehulu mli lɛ ji lɛ mli.—11/1, baafa 13.

◻ Israelbii ni hi ŋmãa yɛ daa afi Kpatamɔ Gbi lɛ nɔ lɛ tsu mɛni he nii? (3 Mose 16:29-31; 23:27)

Ŋmãa ni ahiɔ lɛ tsirɛ Israelbii lɛ ni amɛhiɛ ahi esha shihilɛ ni amɛyɔɔ mli kɛ bɔ ni kpɔmɔ he hiaa amɛ lɛ nɔ babaoo. No nɔ amɛtsɔ amɛjie amɛ awerɛho kɛha amɛhe eshai kɛ tsuitsakemɔ yɛ Nyɔŋmɔ hiɛ lɛ kpo.—11/15, baafa 5.

◻ Mɛni mla ni akɛha gbekɛbii: “Kaimɔ o-Bɔlɔ lɛ yɛ obalahiiaŋ gbii lɛ amli” lɛ tsɔɔ? (Jajelɔ 12:1)

Wolo ko tsɔɔ mli akɛ, bei pii lɛ, Hebri wiemɔ ni atsɔɔ shishi akɛ “kaimɔ” lɛ tsɔɔ “jwɛŋmɔ lɛ hedɔɔ kɛ nifeemɔ ni fataa nikaimɔ he.” No hewɔ lɛ, mla nɛɛ toiboo tsɔɔ babaoo fe Yehowa he ni ajwɛŋɔ kɛkɛ. Ekɔɔ nifeemɔ he, ni aaafee nɔ ni saa ehiɛ.—12/1, baafa 16.