‘Amɛyɛ Miishɛɛ akɛ Amɛaaye Amɛbua Mɛi Krokomɛi’
NƐKƐ ji bɔ ni New York Maŋtiase lɛ mli polisinyo ko wie yɛ Yehowa Odasefoi ahe. No mli lɛ ekɛ Kathleen, be-fɛɛ sɔɔlɔi ni amɛjɛ amɛsuɔmɔ mli amɛtu amɛhe amɛha ni amɛsɔmɔɔ yɛ Yehowa Odasefoi ajeŋ fɛɛ nitsumɔ he yitso ni yɔɔ Brooklyn, New York, lɛ ateŋ mɔ kome miiwie.
Beni ekpa nitsumɔ shwane, yɛ gbo be mli hulutsoo gbi ko ni jeŋ edɔ nɔ lɛ, Kathleen ta tso sɛi kakadaŋŋ ko nɔ, yɛ Shisheramɔ He ni bɛŋkɛ jɛmɛ lɛ. Eebo wiemɔi ni amɔmɔ awo kasɛt nɔ ni akɛbuɔ toi naa aboɔ toi lɛ eko toi. No mli lɛ aato paapa, ni basara maŋtiase lɛ sɛɛkuu he gbɛjianɔ yɛ hɛlikopta shidaamɔ he ni yɔɔ East River yɛ faa lɛ sɛɛ ni enaa lɛ nɔ. Bulɔi miibu ehe waa yɛ he fɛɛ he, ni polisifoi komɛi miiya kɛmiiba yɛ Shisheramɔ He lɛ. Amɛteŋ mɔ kome ba Kathleen ŋɔɔ ni ebi lɛ nɔ ni efeɔ yɛ jɛmɛ. Kathleen ha hetoo akɛ: “Miibo Russia wiemɔ ko ni amɔmɔ awo kpãa nɔ toi. Ole, Yehowa Odasefoi lɛ ateŋ mɔ kome ji mi, ni miisumɔ ni makase Russia wiemɔ, koni mikɛ mɛi ni wieɔ Russia wiemɔ ni amɛbahi maŋ nɛɛ mli lɛ agba Nyɔŋmɔ Maŋtsɛyeli lɛ he sanekpakpa lɛ he sane.”
Polisinyo lɛ ha hetoo akɛ ehiɛ etee nɔ esɔ Yehowa Odasefoi fiofio yɛ afii 15 ni eho ni ebatsɔ polisinyo yɛ New York Maŋtiase lɛ mli lɛ mli. Ekɛɛ akɛ: “Minaa Yehowa Odasefoi akɛ Nyɔŋmɔ jamɔ ni ato he gbɛjianɔ jogbaŋŋ, ni emli bii lɛ yɛ miishɛɛ akɛ amɛkɛ anɔkwayeli aaaye abua mɛi krokomɛi ni yɔɔ akutso lɛ mli lɛ.”
Ale Yehowa Odasefoi yɛ jeŋ fɛɛ, yɛ shia kɛ shia shiɛmɔ nitsumɔ ni amɛtsuɔ lɛ hewɔ. (Bɔfoi lɛ Asaji 20:20) Yɛ be mli ni amɛkɛ amɛnine tsɔɔ Nyɔŋmɔ Maŋtsɛyeli lɛ akɛ tsabaa kome pɛ kɛha naagbai ni haoɔ adesai lɛ, amɛyeɔ amɛbuaa gbɔmɛi hu koni amɛha amɛshihilɛ ahi kɛtsɔ hewalɛ ni amɛwoɔ amɛ koni amɛkɛ Biblia mli shishitoo mlai atsu nii yɛ amɛ daa gbi shihilɛ mli lɛ nɔ. Akɛ nɔkwɛmɔ nɔ lɛ, Odasefoi lɛ woɔ fɔlɔi ahewalɛ koni amɛha shihilɛ ni yɔɔ shia lɛ mli lɛ afee nɔ ni hi kɛha nikasemɔ. Amɛwoɔ aŋkroaŋkroi ahewalɛ ni amɛye anɔkwa, ni amɛbo mla toi, amɛwoɔ amɛ hewalɛ ni amɛkase nitsumɔi kɛ hesaai ni nitsumɔtsɛ baana akɛ ehe miihia.
Hɛɛ, Yehowa Odasefoi yɛ miishɛɛ waa akɛ amɛaaye amɛbua gbɔmɛi ni yɔɔ akutso lɛ mli lɛ, koni amɛha amɛshihilɛ aya hiɛ. Akɛ miishɛɛ miifɔ bo nine ni ohere nɔ ni akɛhãa bo ni nyiɛ sɛɛ nɛɛ nɔ.