Ama Hegbɛ ni Ayɔɔ akɛ Aleɔ Nɔ ni Abaafee lɛ Nɔ Mi Ekoŋŋ
KOJOMƆ wiemɔ ni Saneyeli He ni yɔɔ Messina, yɛ Italy lɛ Shishijee Saji Amlitaomɔi he Kojolɔ lɛ jaje nyɛsɛɛ nɛɛ ema nɔ mi ekoŋŋ akɛ, nɔ ni helatsɛ ni eda lɛ sumɔɔ ni afee yɛ helatsamɔ mli lɛ he gbɛnaa nii fimɔɔ datrɛfoi lɛ. Akɛ sanejajemɔ lɛ ha yɛ sane ni kɔɔ Yehowa Odasefoi lɛ ateŋ mɔ kome he lɛ mli.
Yɛ January 1994 lɛ, akɛ Antonino Stellario Lentini, Odasefonyo ni eye afii 64 ni yeɔ hela ni haa mɔ hoɔ lá babaoo tsɔ̃ lɛ sha foi kɛtee helatsamɔ he ko yɛ Taormina, Messina. Antonino ŋa, Catena ha helatsamɔ he nitsulɔi akuu lɛ le akɛ, ákɛ Yehowa Odasefoi lɛ, lɛ kɛ ewu lɛ ekpɛlɛŋ lá ni agbalaa awoɔ mɔ mli akɛ akɛmiitsa hela lɛ nɔ. (Bɔfoi lɛ Asaji 15:20, 28, 29) Akɛ bulɛ ha nɔ ni amɛbiɔ koni afee lɛ.
Shi kɛlɛ, beni akɛ Antonino yaa helatsɛmɛi akwɛmɔ he kroko lɛ, enyɛɛɛ emu ni eshihilɛ lɛ mli bawo wu. No sɛɛ lɛ, etsɛɛɛ ni egbo. Catena fee basaa, shi ena miishɛjemɔ babaoo yɛ shiwoo ni Biblia lɛ kɛhaa yɛ gbohiiashitee he lɛ mli. (Bɔfoi lɛ Asaji 24:15) Kɛkɛ ni, nɔ ni ha enaa kpɛ ehe waa diɛŋtsɛ ji akɛ, kojolɔi—ni ekolɛ saji ni ejaaa ni nibii ni akɛtswaa adafi lɛ gbɛɔ shwaa elaka amɛ lɛ—folɔ enaa akɛ lɛ egbe ewu lɛ, akɛni etsĩ opireshɛn ni datrɛfoi lɛ na akɛ ehe miihia ni akɛha lɛ lɛ naa hewɔ.
Nɔ ni fe afi kome sɛɛ, yɛ July 11, 1995 lɛ, abu Catena bem akɛ eyeko awui ko. Yɛ anɔkwale mli lɛ, odaseyeli ni mɛi ni he esa yɛ tsofafeemɔ mli lɛ kɛha lɛ ha ale akɛ, kɛ asusu helatsɛ lɛ hela lɛ he lɛ, kulɛ opireshɛn nyɛŋ nɔ ko kwraa afee yɛ he.
Shi sanejajemɔi ni kojolɔ lɛ kɛha ji nɔ ni mu sane lɛ naa kwraa. Etsɔɔ mli akɛ, ewa akɛ aaahe jwɛŋmɔ ni ahiɛ akɛ, esa akɛ tsofafeemɔ mli nitsulɔi kɛ amɛhe awo mli lɛ aye, kɛ́ helatsɛ lɛ loo mɛi ni damɔ enajiaŋ lɛ kpoo helatsamɔ lɛ. Ekɛfata he akɛ, tsofafeemɔ mli jeŋba he mla ni yɔɔ Italy lɛ “tsɔɔ hiɛ enaa bɔ ni ehe hiaa ni nine ashɛ gbeekpamɔ ni mɔ ni ekɔɔ ehe lɛ kɛhaa lɛ nɔ dani helatsamɔ he lɛ afee he nɔ ko.” No hewɔ lɛ, ejaje akɛ Catena “kɛ mla tsu nii ni ekɛtsĩ opireshɛn ni tamɔ nɛkɛ ni abaafee ewu lɛ naa.”
Kojomɔ nɛɛ ma nɔ mi ekoŋŋ akɛ, mɔ ni eda lɛ yɛ hegbɛ akɛ ekpoɔ tsofafeemɔ mli tsamɔ ni teɔ shi eshiɔ esuɔmɔnaa nii.