“Kaashwie Amɛ!”

“KƐJI Yehowa Odasefonyo kome, loo mɛi enyɔ po, batswa oshinaa naa ŋmɛlɛ lɛ, kaashwie amɛ!” taakɛ Corriere della Sera woɔ ŋaa lɛ. Adafitswaa wolo lɛ miiwie sane ko ni ba yɛ Treviso, yɛ Italy kooyigbɛ, ni nitsumɔtsɛ ko fee nɔ ko ni kulɛ ebaaha elaaje shika fe lire akpeiakpe kome (fe U.S. dɔlai 600) yɛ shwiemɔ ni eshwie Odasefoi enyɔ ni ba eŋɔɔ hewɔ lɛ he.

Taakɛ adafitswaa wolo lɛ tsɔɔ lɛ, Odasefoi enyɔ komɛi kɛ wiemɔi nɛɛ jie amɛhe kpo amɛtsɔɔ nuu lɛ akɛ: “Ŋmɛnɛ efee gbi kpakpa kɛha bo. Yehowa Odasefoi ji wɔ, ni wɔhiɛ nɔ ko ni jara wa waa ni wɔkɛbaaha bo.” Nɛkɛ ni amɛwie pɛ, kɛkɛ ni nitsumɔtsɛ ni sumɔɔɔ ni mɛi aba eŋɔɔ nɛɛ ŋa shinaa lɛ, ni eŋmɛɛɛ gbɛ ni amɛwie amɛgbe naa.

Eji nuu lɛ bo toi kulɛ, ebaana ele akɛ Odasefoi lɛ ba eshia ni amɛkɛ eshika kotoku bibioo, ni amɛna yɛ shisheramɔ he ko sɛ̃i nɔ lɛ abaha lɛ. No hewɔ lɛ Odasefoi lɛ nyɛɛɛ nɔ ko amɛfee, fe akɛ amɛkɛ shika kotoku bibioo lɛ kɛ nibii ni yɔɔ mli lɛ fɛɛ tee polisifoi anitsumɔ he ni bɛŋkɛ jɛmɛ lɛ. Enɔ jetsɛremɔ lɛ, polisifoi lɛ kɛtee amɛkɛyaha mɔ ni nɔ ni ji lɛ.

“Eji mɔ kroko yaje [Odasefoi] enyɔ ni he bɛ nii nɛɛ ashihilɛ nɛɛ mli kulɛ,” taakɛ Il Gazzettino di Treviso wolo lɛ wie lɛ, “ekolɛ . . . ekɛ shika kotoku bibioo lɛ mli shika saŋŋ ni yɔɔ mli lɛ baato. Shi jeee Yehowa Odasefoi, ni esa akɛ amɛye anɔkwa kɛmɔ shi lɛ.”

Mɛni tsirɛɔ Yehowa Odasefoi ni “amɛye anɔkwa kɛmɔ shi lɛ”? No ji suɔmɔ ni amɛyɔɔ kɛha Nyɔŋmɔ kɛ amɛnaanyo gbɔmɔ, yɛ Yesu Kristo tsɔɔmɔi lɛ kɛ gbeekpamɔ naa lɛ. (Mateo 22:37-39) No hewɔ hu ni Yehowa Odasefoi yaa shia kɛ shia ni amɛyajajeɔ “shikpɔŋ hee” ni yɔɔ nyam ni Yehowa ewo shi yɛ he lɛ he sanekpakpa lɛ. Nɛkɛ shɛɛ sane ni haa mɔ hiɛnɔkamɔ nɛɛ jara wa kwraa fe heloonaa nii fɛɛ ni mɔ ko aaana!—2 Petro 3:13.