Tsofafeelɔi ni He Esa Susu Nɔ ni Akɛbaato Lá Najiaŋ He

AAAFEE tsofafeelɔi 200 ni he esa ni jɛ United States fɛɛ kpe yɛ Cleveland, Ohio, yɛ Hɔɔ, October 7, 1995, koni amɛsusu sane ko ni efee nɔ ni he hiaa waa yɛ tsofafeemɔ nitsumɔ mli lɛ he: tsofafeemɔ kɛ opireshɛn ni lá bɛ mli.

Amɛsusu shihilɛi ni mli wawai pii ahe. Akɛ nɔkwɛmɔ nɔ lɛ, kɛji akɛ helatsɛ ko bɛ la kwraa hu? Te aaafee tɛŋŋ ni aaafee fufɔo ko ni ebe shɛɛɛ kwraa ni afɔ lɛ lɛ tsofa ni la bɛ mli? Ani abaanyɛ afee tsui opireshɛn ni akɛ lá tsuuu nii kwraa? Nɔ ni yɔɔ miishɛɛ ji akɛ, opireshɛn ni lá bɛ mli—ni bei pii lɛ ebiɔ ni afee nibii krokomɛi ni baaye abua ni gbɔmɔtso lɛ diɛŋtsɛ ana elá ni fa lɛ—akɛtsu nii momo yɛ shihilɛi nɛɛ fɛɛ mli kɛ omanyeyeli.a

Mɛni hewɔ ehe hiaa ni akɛ nibii krokomɛi ato lá ni agbalaa awoɔ mɔ mli lɛ najiaŋ lɛ? Sharon Vernon, onukpa ni kwɛɔ Center for Bloodless Medicine and Surgery ni yɔɔ St. Vincent Charity Hospital yɛ Cleveland lɛ kɛɛ akɛ: “Wɔkase akɛ, bei pii lɛ, lá ni agbalaa awoɔ mɔ mli lɛ kɛ helai haa mɛi, titri lɛ mlɛbo mli hela.” Etee nɔ ewie akɛ: “Kɛji akɛ lá kɛ hela haaa po lɛ, ebaanyɛ enyɛ̃ helatsɛ lɛ gbɔmɔtsoŋ hefãmɔ gbɛjianɔtoo lɛ nɔ.” Eyɛ mli akɛ anyɛ aba mɛi ni naa AIDS lɛ ayifalɛ shi kɛtsɔ lá mli ni akwɛɔ lɛ nɔ moŋ, shi kɛlɛ, helai pii yɛ ni tsɔɔ mli ni kaai ni tamɔ nɛkɛ enaaa. Ni yɛ bɔ ni ehe hiaa ni asaa he jogbaŋŋ lɛ fɛɛ sɛɛ lɛ, helatsamɔ hei lɛ fiteee shika tsɔ yɛ opireshɛn ni lá bɛ mli nɛɛ mli, ejaakɛ ejieɔ mla mli naagbai ni baanyɛ aba, kɛ akɛ lá ni hela yɔɔ mli hã helatsɛ lɛ, kɛjɛɔ mli.

Kɛha Yehowa Odasefoi lɛ, nɔ ko yɛ ni he hiaa waa ni haaa amɛhe lá amɛwo amɛmli lɛ: Nyɔŋmɔ mla guɔ enɛ. (Bɔfoi lɛ Asaji 15:29) Ni kɛlɛ, amɛmiisumɔ ni amɛna tsofafeemɔ ni hi fe fɛɛ. No hewɔ lɛ, amɛkɛ datrɛfoi ni nyiɛ tsofafeemɔ ni lá bɛ mli lɛ amlipɛimɔ hiɛ lɛ ekpã gbee. Enɛ he baaa sɛɛnamɔ kɛhaaa Yehowa Odasefoi pɛ, shi moŋ mɛi krokomɛi babaoo ni susuɔ osharai ni yɔɔ lá ni agbalaa awoɔ mɔ mli lɛ he lɛ.

[Shishigbɛ niŋmaa]

[He ni Mfoniri ni yɔɔ baafa 32 lɛ Jɛ]

WHO photo ni P. Almasy fee