Ekɛ Heshibaa Sɔmɔ Yehowa

“JEEE he ni osɔmɔɔ yɛ lɛ tsɔ̃, shi mɔ ni osɔmɔɔ lɛ lɛ ji nɔ ni he hiaa diɛŋtsɛ.” John Booth fɔɔ nɛkɛ saji nɛɛ awiemɔ, ni ehi shi yɛ naa. Eshikpɔŋ nɔ shihilɛ, ni ba naagbee yɛ Ju, January 8, 1996 lɛ, shiii sanebimɔ ko yɛ mɔ ni ehala akɛ eeesɔmɔ lɛ lɛ he.

Akɛ obalanyo yɛ 1921 mli lɛ, John Booth miitao yiŋtoo ni yɔɔ shihilɛ mli. Etsɔɔ nii yɛ Hɔgbaa skul yɛ Dutch Reformed Sɔlemɔ lɛ mli, shi ekpɛlɛɛɛ nɔ akɛ atsɔse lɛ ni ebatsɔ sɔɔlɔ, ejaakɛ enuɔ he akɛ osɔfoi lɛ hiɔ shi akɛ pɛsɛmkunyatsɛmɛi. Beni ena adafitswaa wolo bibioo ko ni miitswa maŋshiɛmɔ ko ni eyitso ji ‘Akpekpei ni Yɔɔ Wala Mli Bianɛ lɛ Gboiŋ Gbi ko Gbi Ko’ lɛ he adafi lɛ, efiteee be ko kwraa ni etsu koni enine ashɛ wolo ni etswaa he adafi lɛ nɔ. Akɛni etsui mɔ nɔ ni ekane lɛ hewɔ lɛ, etsɛɛɛ ni ebɔi baisekel nɔ tamɔ kɛmiiya kilomitai 24 koni eya Biblia Kaselɔi, taakɛ atsɛɔ Yehowa Odasefoi yɛ nakai be lɛ mli lɛ akpee. Abaptisi lɛ yɛ 1923, ni eje shiɛmɔ yɛ shinaai anaa shishi yɛ Wallkill niiaŋ, yɛ New York, he ni eweku lɛ yɔɔ tsinai aŋmɔ yɛ lɛ.

Nyɛminuu Booth kɛ ehe wo be-fɛɛ sɔɔmɔ lɛ mli yɛ April, 1928. Eshiɛ yɛ emaŋ shikpɔŋkuku lɛ mli kɛ agbɛnɛ yɛ akrowaiaŋ yɛ Wuoyigbɛ, ni ekɛ Biblia kasemɔ he woji tsake niyenii kɛ wɔɔhe. Ehe bahia ni ekɛ ekãa kɛ dãa ni wa ni mla eŋmɛɛɛ gbɛ lɛ afeelɔi ni hiɛ tũi lɛ akpe yɛ amɛ dãahoomɔ hei, he ni amɛteŋ mɔ kome tswa John Booth hefatalɔ gbɛgbalɔ ko tũ ni epila lɛ yɛ lɛ. Ahala Nyɛminuu Booth akɛ nɔkwɛlɔ gbɛfalɔ yɛ 1935, ni ebɔi asafoi kɛ kui bibii ni yɔɔ maŋ lɛ mli lɛ asaramɔ. Eto kpeei ahe gbɛjianɔ, ni eye ebua nyɛmimɛi hii kɛ yei lɛ koni amɛŋmɛ amɛtsui shi yɛ shitee kɛ woo fɛɛ sɛɛ. Enyɛ edamɔ asafoi ni mli efu hiɛ ekɛ amɛ taa saji anaa, akɛ lɛ tee kojomɔ he, ena tsuŋwoo mli amanehulu, ni enɛɛmɛi fɛɛ bafee nii ni ba Nyɛminuu Booth nɔ shii abɔ. Eŋma be ko akɛ, “Ebaahe wolo muu ni aŋmala nakai bei ni hiɛdɔɔ yɔɔ mli lɛ amli nibii awo mli.”

Yɛ 1941 mli lɛ, Joseph F. Rutherford, ni no mli lɛ eji Buu Mɔɔ Asafo lɛ sɛinɔtalɔ lɛ kɛ nitsumɔ wo Nyɛminuu Booth dɛŋ koni etsu nii yɛ Kingdom Farm, yɛ Ithaca masɛi, yɛ New York. Ekɛ afii 28 tsu nii yɛ jɛmɛ yɛ anɔkwayeli mli. Akɛni miishɛɛ ni eyɔɔ yɛ sɔɔmɔ nitsumɔ lɛ he lɛ baaa shi hewɔ lɛ, ena miishɛɛ yɛ afii lɛ amli yɛ Gilead Buu-Mɔɔ Biblia Skul, ni no mli lɛ eyɔɔ Kingdom Farm lɛ mli nikaselɔi akpei abɔ ni atsɔseɔ amɛ akɛ maŋsɛɛ sanekpakpa shiɛlɔi yɛ jɛmɛ ni ekɛ ehe bɔ amɛhe aahu kɛbashi 1961 mli lɛ ahewɔ. Yɛ 1970 mli lɛ, abi ni Nyɛminuu Booth asɔmɔ yɛ Watchtower Farms yɛ Wallkill, New York, no hewɔ lɛ ebana ehe yɛ he ni eje gbɛgbamɔ shishi yɛ afii 45 ni eho lɛ ekoŋŋ.

Ahala Nyɛminuu Booth akɛ Yehowa Odasefoi a-Nɔyeli Kuu ni yɔɔ Brooklyn, New York, lɛ mli nyo yɛ 1974. Esɔmɔ yɛ gbɛhe nɛɛ mli yɛ anɔkwayeli mli aahu kɛyashi egbo beni eye afii 93. Asumɔɔ John Booth waa yɛ e-Kristofoi asubaŋ ni ji heshibaa kɛ mlihilɛ lɛ hewɔ. Eshiɛ yɛ shia kɛ shia kɛ gbɛjegbɛi anɔ yɛ anɔkwayeli mli aahu kɛyashi be mli ni hela kɛ egbɔmɔtsoŋ hewalɛ haaa enyɛ efee nakai dɔŋŋ.

Yɛ be mli ni mɛi ni kɛ lɛ sɔmɔ lɛ yeɔ egbele he awerɛho lɛ, amɛnaa miishɛjemɔ kɛjɛɔ Biblia mli shiwoo ni kɔɔ Kristofoi ni afɔ amɛ mu ni tamɔ nɛkɛ lɛ ahe, ákɛ ateeɔ amɛ shi kɛyaa ŋwɛi shihilɛ mli, ni ákɛ “amɛ nitsumɔi lɛ nyiɛɔ amɛsɛɛ.” (Kpojiemɔ 14:13; 1 Korintobii 15:51-54) Eji shihilɛ he hee lɛlɛŋ, shi nɔ̃ mli ni John Booth baanyɛ asɔmɔ Yehowa yɛ kɛya naanɔ!

[Mfoniri ni yɔɔ baafa 32

John Booth 1903-1996

[Mfoniri ni yɔɔ baafa 32]

HERALD-AMERICAN, ANDOVER 1234

76 Jehovites Jailed in Joliet

[He ni Sane lɛ Jɛ]

Chicago Herald-American