Maŋtsɛyeli Jajelɔi Bɔ Amaniɛ

“Okitai lɛ Fɛɛ lɛ Anɔkwale Ni”

BENI eshwɛ fioo ni ebaagbo lɛ, Mose wo Israelbii lɛ ŋaa akɛ amɛbo Yehowa kitai ni ewo amɛ lɛ fɛɛ toi. Ekɛɛ amɛ akɛ: “Nyɛŋɔa nyɛtsuii nyɛfɔ̃a wiemɔi nɛɛ fɛɛ ni miye he odase mitsɔɔ nyɛ ŋmɛnɛ gbi nɛɛ lɛ nɔ, ni nyɛwo nyɛbii lɛ akita, ni amɛjwɛŋ nɛkɛ mla nɛɛ mli wiemɔi lɛ fɛɛ nɔ ni amɛye nɔ. Ejaakɛ jeee wiemɔ folo ji ha nyɛ, shi moŋ nyɛyiwala ni.”—5 Mose 32:46, 47.

Afii ohai abɔ sɛɛ lɛ, lalatsɛ lɛ ma bɔ ni Nyɔŋmɔ nitsɔɔmɔi fɛɛ ahe hiaa lɛ nɔ mi ni ewie akɛ: “Shi bo, Yehowa hu obɛŋkɛ, ni okitai lɛ fɛɛ lɛ anɔkwale ni.” (Lala 119:151) Yɛ klɛŋklɛŋ afii oha lɛ mli lɛ, Yesu diɛŋtsɛ wie bɔ ni “wiemɔ fɛɛ wiemɔ ni jɛɔ [Yehowa] Nyɔŋmɔ daaŋ lɛ” he hiaa lɛ hu he. (Mateo 4:4) Ni bɔfo Paulo ŋma yɛ Nyɔŋmɔ gbɛtsɔɔmɔ naa akɛ “ŋmalɛ fɛɛ ŋmalɛ ni jɛ Nyɔŋmɔ mumɔ lɛŋ lɛ ehi.”—2 Timoteo 3:16.

Eyɛ faŋŋ akɛ, Yehowa Nyɔŋmɔ kpaa gbɛ akɛ ejalɔi aaasusu shɛɛ saji fɛɛ ni akɛha wɔ yɛ e-Wiemɔ lɛ baafai amli lɛ he jogbaŋŋ diɛŋtsɛ. Ŋmalɛ kuku kome folo po bɛ Biblia lɛ mli ni ehe bɛ sɛɛnamɔ. Nakai ji bɔ ni Yehowa Odasefoi nuɔ Nyɔŋmɔ Wiemɔ lɛ he amɛhaa, taakɛ niiashikpamɔ ni nyiɛ sɛɛ, ni jɛ Maritius nɛɛ feɔ he nɔkwɛmɔ nɔ lɛ.

Ow. D—— hi akrowa ko ni etse ehe banee, ni etsuɔ nii yɛ jɛmɛ akɛ nyɔɔŋ bulɔ. Be babaoo nɛ ni ekɛ anɔkwayeli etao gbɛ ni ja ni eeetsɔ nɔ eja Nyɔŋmɔ. Be ko nyɔɔŋ mli beni ebuɔ lɛ, ekɔ Biblia ni ebɔi kanemɔ. Yɛ be ko sɛɛ lɛ, enyɛ ekane fɛɛ kɛjɛ shishijee kɛyashi naagbee. Ebana ele akɛ Nyɔŋmɔ gbɛi ji Yehowa—ni ji gbɛi ko ni pueɔ shii abɔ yɛ e-Hindi Biblia lɛ mli. Ebana hu akɛ Kpojiemɔ wolo lɛ ji wolo ni mli saji yɔɔ miishɛɛ fe fɛɛ.

Kɛkɛ ni ebi ehe akɛ ani jamɔ ko yɛ ni nyiɛɔ Biblia muu lɛ fɛɛ sɛɛ pɛpɛɛpɛ lo. Eyoo akɛ, kɛ amɛbɔ mɔdɛŋ aahu lɛ, jamɔ ni ele jogbaŋŋ lɛ nyiɛɔ Biblia lɛ fãi fioo komɛi pɛ sɛɛ. Jamɔi komɛi kpɛlɛɔ Hebri Ŋmalɛi lɛ anɔ ni amɛkpooɔ Kristofoi a-Hela Ŋmalɛi lɛ. Jamɔi krokomɛi hu yɛ ni kpooɔ Hebri Ŋmalɛi lɛ, ni amɛkɛɔ akɛ Kristofoi a-Hela Ŋmalɛi lɛ pɛ ji nɔ ni abaanyɛ akɛtsu nii ni ehe aba sɛɛnamɔ.

Gbi ko lɛ Ow. D—— na gbalashihilɛ mli hefatalɔi komɛi ni nugbɔ miiyi amɛ, ni efɔ̃ amɛ nine akɛ amɛba eshia lɛ ni amɛbamɛ ni nugbɔ lɛ akpa. Yehowa Odasefoi ji amɛ. Yoo lɛ hiɛ Kpojiemɔ—Enaagbee Kwraa lɛ Ebɛŋkɛ! wolo lɛ ekome.a Amrɔ nɔŋŋ kɛkɛ ni Ow. D—— bi amɛ akɛ eetao wolo lɛ eko. Odasefoi nɛɛ nu he akɛ emli saji ni kɔɔ Kpojiemɔ gbalɛ lɛ he lɛ mli wa tsɔ̃ kɛha lɛ, no hewɔ lɛ amɛkɛɛ lɛ akɛ amɛbaaha lɛ wolo kroko. Shi Ow. D—— ma nɔ mi doo akɛ eesumɔ Kpojiemɔ wolo lɛ nɔŋŋ.

Ni enine shɛ nɔ lɛ, ekane wolo muu lɛ fɛɛ egbe naa oya nɔŋŋ. Kɛkɛ ni ekpɛlɛ nɔ akɛ ekɛ Yehowa Odasefoi baakase Biblia lɛ. Etsɛɛɛ kɛkɛ ni ebaná bɔ ni Odasefoi buɔ Biblia muu lɛ fɛɛ akɛ ehe hiaa waa lɛ he miishɛɛ jogbaŋŋ diɛŋtsɛ. Ebɔi kpeei yaa daa yɛ Yehowa Odasefoi a-Maŋtsɛyeli Asa lɛ nɔ, he ni akaseɔ Hebri Ŋmalɛi lɛ kɛ Kristofoi a-Hela Ŋmalɛi lɛ fɛɛ jogbaŋŋ yɛ lɛ. Amrɔ nɛɛ eji Maŋtsɛyeli shiɛlɔ kɛ Kristofoi asafo lɛ mli nyo ni abaptisi lɛ.

[Shishigbɛ niŋmaa]