Nyɔŋmɔ, Maŋ lɛ, kɛ Bo
“Sɔlemɔ kɛ Maŋ Ete Shi Ewo Amɛhe yɛ Gbala Mlitsemɔ he Oshiki ni Afɔ̃ yɛ Ireland lɛ Mli”
NƐKƐ saneyitso ni aŋma yɛ The New York Times lɛ mli nɛɛ feɔ bɔ ni gbɔmɛi kɛ halamɔ ni amɛaahala nɔ ni Maŋ lɛ taoɔ, kɛ nɔ ni amɛ sɔlemɔ lɛ tsɔɔ lɛ ateŋ ekome kpeɔ ŋmɛnɛ lɛ he nɔkwɛmɔ nɔ.
Sane ni aŋma lɛ kɛɛ akɛ: “Yɛ nɔ ni shɛɛɛ nyɔŋ kome mli, beni abaafɔ̃ oshiki yɛ kɛji esa akɛ afo mla gbɛjianɔtoo ni guɔ gbala mlitsemɔ lɛ he lɛ, Ireland maŋ ni emli bii babaoo diɛŋtsɛ ji Roma Katolikbii lɛ miiye mpleshii ko ni mli wa, ni efɔɔɔ kaa, ni kã e-Nɔyeli lɛ hiɛnyiɛlɔi kɛ ejamɔ lɛ hu hiɛnyiɛlɔi ateŋ lɛ he odase.” Maŋ lɛ wo ŋaa akɛ afo mla ni guɔ gbala mlitsemɔ lɛ mli kwraa, yɛ be mli ni Katolik Sɔlemɔ lɛ teɔ shi ewoɔ gbala mlitsemɔ kɛ gbalashihilɛ mlibotemɔ ekoŋŋ lɛ waa. Esa akɛ Ireland Katolikbii ahala Sɔlemɔ lɛ kɛ Maŋ lɛ nɔ̃ lɛ ateŋ ekome. Taakɛ nibii ba lɛ eha lɛ, Maŋ lɛ ye kunim kɛ mɛi ayibɔ ni fa fioo pɛ kɛkɛ.
Nɔ ni sa kadimɔ fe enɛ ji akɛ, afii babaoo eho ni gbɔmɛi ni yɔɔ Northern Ireland lɛ kɛ béi ni mli wa, ni kɔɔ amɛ maŋ nɔyeli hegbɛ namɔ he lɛ ekpe. Agbe mɛi babaoo. Roma Katolikbii kɛ Protestantbii ehiɛ susumɔi ni teɔ shi woɔ amɛhe yɛ Maŋ ni amɛbaahi
shishi lɛ he: Britania nɔyeli ni baaya nɔ yɛ Northern Ireland loo maŋ nɔyeli kome kɛha Ireland maŋ muu lɛ fɛɛ.
Nakai nɔŋŋ, yɛ tsutsu Yugoslavia lɛ, nɔyelɔi lɛ ebi ni hemɔkɛyelii sɔrɔtoi, ni Katolik kɛ Orthodɔks jamɔi lɛ amli bii fata he lɛ, kɛ amɛhe anɔ̃ yɛ ta ni awuɔ kɛha shikpɔŋkuku lɛ mli. Yɛ maŋbii foji agbɛfaŋ lɛ, mɛni ji amɛ klɛŋklɛŋ gbɛnaa nii yɛ jeŋba gbɛfaŋ? Ani esa akɛ amɛnyiɛ mɛi ni kɛɔ akɛ amɛdamɔ Maŋ lɛ najiaŋ lɛ asɛɛ, aloo ani esa akɛ amɛbo Nyɔŋmɔ, mɔ ni kɛɔ akɛ: “Kaagbe gbɔmɔ . . . Suɔmɔ onaanyo taakɛ bɔ ni osumɔɔ bo diɛŋtsɛ ohe” lɛ toi?—Romabii 13:9.
Ekolɛ obaasusu akɛ shihilɛ ni tamɔ nɛkɛ esaŋ ohe kɔkɔɔkɔ. Shi ekolɛ ebaanyɛ. Yɛ anɔkwale mli lɛ, ekolɛ ekɔɔ ohe bianɛ po. Nyɔŋmɔ jamɔ he nilelɔ Oscar Cullmann wieɔ “wala-kɛ-gbele yiŋkpɛi ni esa akɛ ŋmɛnɛŋmɛnɛ beaŋ Kristofoi afee, loo ekolɛ abaabi ni amɛfee, yɛ jaramɔ shihilɛi amli yɛ be mli ni yiwalɛ nɔyelii woɔ amɛhe gbeyei lɛ” he yɛ ewolo ni gbɛi ji The State in the New Testament lɛ mli. Shi kɛlɛ, ewieɔ “Kristofonyo fɛɛ Kristofonyo gbɛnaa nii diɛŋtsɛ ni he hiaa tamɔ nakai nɔŋŋ—kɛ Kristofonyo shihilɛ yɛ nɔ ni atsɛɔ lɛ shihilɛ ‘ni yɔɔ daa,’ ‘daa gbi’ shihilɛi amli—ni ji akɛ, ní ekɛ naagba ni hiɛdɔɔ yɔɔ mli ni ekɛkpeɔ yɛ Kristofonyo ni eji lɛ hewɔ kɛkɛ lɛ akpe ni ena enaa tsabaa” lɛ hu he.
No hewɔ lɛ, ani esa akɛ Kristofoi ana tsakpaa ni kã jamɔ kɛ Maŋ lɛ teŋ lɛ he miishɛɛ ŋmɛnɛ? Eka shi faŋŋ akɛ esa nakai. Kristofoi ejɛ jeeŋmɔ beebe amɛbɔ mɔdɛŋ akɛ amɛaana susumɔ ni ŋmɛɔ pɛpɛɛpɛ yɛ maŋ nɔyelii ahe. Roma Maŋ lɛ kojo amɛ Hiɛnyiɛlɔ, Yesu Kristo, ni amɛbu lɛ gbele fɔ, ni amɛgbe lɛ. Ehe bahia ni ekaselɔi lɛ aha amɛ Kristofoi agbɛnaa nii kɛ sɔ̃i ni jwere amɛ nɔ yɛ Roma Maŋtsɛyeli lɛ gbɛfaŋ lɛ aŋmɛ pɛpɛɛpɛ. No hewɔ lɛ, amɛkɛ nɔyelɔi lɛ ateŋ wekukpaa lɛ hesusumɔ kɛ gbɛtsɔɔmɔi baaha Kristofoi ŋmɛnɛ.
[He ni Mfoniri ni yɔɔ baafa 3 lɛ Jɛ]
Tom Haley/Sipa Press