Yehowa Odasefoi ni Yɔɔ Jeŋ Fɛɛ—New Zealand
ANI ŋshɔkpɔi baanyɛ ajie Yehowa yi? Hɛɛ, taakɛ Yesaia 42:10 tsɔɔ lɛ: “Nyɛlaa lala hee nyɛhaa Yehowa, nyɛlaa nyɛjiea eyi kɛjɛa shikpɔŋ lɛ naagbee he lɛ! Nyɛ, . . . ŋshɔkpɔi lɛ kɛ mɛi ni hiɔ nɔ lɛ!” Ŋshɔkpɔi ni feɔ New Zealand lɛ jieɔ Yehowa yi lɛlɛŋ. Akɛni ekpaakpoi, ŋshɔŋ nui ni boteɔ enujɔɔi amli, egɔji somromoi, ais ni tamɔ ŋshɔkpɔ ni hoɔ blɛoo yɛ ŋshɔŋ, ŋshɔnaai, ekooi ni nugbɔ fɔɔ nɛmɔ yɛ mli ni kwɛ̃ɛ nii eyi mli obɔ lɛ ehe gbɛi yɛ jeŋ fɛɛ hewɔ lɛ, New Zealand kɛ naatselɛ wieɔ ŋwɛi kɛ shikpɔŋ Bɔlɔ lɛ agbojee kɛ efɛo he.
Kɛjɛ afii ohai 20 lɛ shishijee lɛ sɛɛ kɛbaa nɛɛ, mɛi ni yɔɔ New Zealand lɛ ateŋ mɛi pii kɛ amɛgbeei ebafata he koni amɛjie Yehowa yi, kɛtsɔ eŋɔɔ ni amɛtee yɛ anɔkwa jamɔ kɛ Nyɔŋmɔ Maŋtsɛyeli lɛ he sanekpakpa lɛ shiɛmɔ mli kɛ mɛi krokomɛi ahamɔ mli gbɛfaŋnɔ ni amɛnaa lɛ nɔ. Nyɛsɛɛ nɛɛ, Odasefonyo ko ni nu niiashikpamɔ kpakpa ni kɔɔ odase ni ayeɔ wekumɛi ahe lɛ kpɛ eyiŋ akɛ ebaabɔ enɛ feemɔ he mɔdɛŋ yɛ ewekumɛi ahe. Ekɛ Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ eko ha ewekumɛi pii. Mɛni ejɛ mli eba? Ebɔ amaniɛ akɛ enyɛmi yoo kome kɛ enyɛmi nuu kome miikase Biblia lɛ bianɛ, abaptisi enyɛmi bi ko akɛ Yehowa Odasefoi lɛ ateŋ mɔ kome, ni mɛi krokomɛi boɔ Nyɔŋmɔ Wiemɔ lɛ mli anɔkwale lɛ toi jogbaŋŋ bianɛ. Eyɛ ŋmɔ ni da lolo ni ebaatsu mli nii; yɛ efɔlɔi asɛɛ lɛ, eyɛ nyɛmimɛi hii ekpaa kɛ nyɛmimɛi yei nɛɛhu!
Yijiemɔ kɛha Yehowa hu baa kɛ Odasefoi lɛ fee ekome kɛmamɔ Maŋtsɛyeli Asai. Akɛ nɔkwɛmɔ nɔ lɛ, adafitswaa wolo mli niŋmalɔ, Roy Perkins ŋma yɛ May 17, 1994 Opotiki News lɛ mli akɛ: “Mijeee heyelilɔ moŋ, shi mihiɛ sɔ nitsulɔi ni amɛjɔɔ amɛhe nɔ lɛ fɛɛ anitsumɔi kɛ mɔdɛŋbɔɔ kɛ be kɛ mɔdɛŋ babaoo ni amɛbɔ yɛ tsumaa lɛ mli yɛ amɛ Nyɔŋmɔ lɛ he suɔmɔ ni amɛyɔɔ hewɔ lɛ waa.
“Yɛ ŋmɛlɛtswai abɔ ni amɛkɛtsu nii yɛ otsi lɛ naagbee nɛɛ fɛɛ mli lɛ, minaaa ni minuuu naataomɔ ko he . . . Yei tara akpalei anɔ yɛ tsu lɛ yiteŋ amɛkɛ hii lɛ miitsu nii, amɛkɛ amɛniji miitsɔɔ nɔ ko nɔ, amɛmiihole nibii anɔ, amɛmiitere nibii, fɛɛ yɛ miishɛɛ henumɔ mli.
“Ni nitsulɔ ko bɛ ni fite be yɛ zigaret ni eshɛreɔ hewɔ. Kɔɔyɔɔ lɛ mli tse keŋkeŋ kɛha mɛi fɛɛ ni tsuɔ nitsumɔi sɔrɔtoi lɛ fɛɛ, ja ekolɛ pɛnte ŋma kɛ ŋtayaa he mlu pɛ.”
Opotiki Asafo lɛ mli onukpai akuu lɛ ŋma akɛ: “Tsumaa nitsumɔ muu lɛ fɛɛ ena maŋ lɛ mli bii anɔ hewalɛ kpakpa. Etamɔ nɔ ni mɔ fɛɛ mɔ miiwie he. Aje Biblia mli nikasemɔi pii ashishi. Ekome ni wɔnaa he miishɛɛ waa ji gbalashihilɛ mli hefatalɔi enyɔ ko ni sumɔɔ nyɔŋmɔjamɔ waa ni sumɔɔɔ ni wɔyaa amɛŋɔɔ afii pii nɛ lɛ. Amɛbaa he ni amaa tsu lɛ yɛ lɛ daa gbi kɛ kpee hu. Wu lɛ wie yɛ sɛɛ mli akɛ, ‘Miina akɛ Nyɔŋmɔ gbɔmɛi ji nyɛ. Mikɛ afii pii eshwe yɛ mimligbɛ ni mikɛ gbɔmɛi ni tamɔ nɛkɛ abɔ.’ ”
Yɛ nyɛsɛɛ afi lɛ mli lɛ, Otago Daily Times lɛ mli niŋmalɔ ko wie nɔ ni nyiɛ sɛɛ nɛɛ yɛ Maŋtsɛyeli Asa ni ama lɛ oyayaayai yɛ Dunedin lɛ he: “Eji nifeemɔ ni yɔɔ naakpɛɛ, kanyamɔ kɛ he ni ayeɔ abuaa he nɔkwɛmɔ nɔ ni sa kadimɔ waa.” Nakai adafitswaa wolo lɛ nɔŋŋ wie akɛ: “Maŋtiase lɛ mli bii kɛ kafomɔ kwɛ bɔ ni tsu ni da nɛɛ yaa ŋwɛi yɛ amɛhiɛ lɛ, ni ekolɛ mɛi pii miisusu nɔ̃ tsakemɔi kɛ tsũi kpakpai ni abaanyɛ ama kɛ ajɛ suɔmɔ mli akɛ he ha babaoo nɛkɛ, ni gbeekpamɔ mumɔ hu yɛ lɛ he. Maŋtsɛyeli Asa ji mɔdɛŋbɔɔ yɛ ekomefeemɔ ni woɔ yibii lɛ he okadi ni adamɔɔ nɔ ashwãa.”
Nuu ko ni ji gbɔmɛi ohai abɔ ni ba tsumaa he lɛ ateŋ mɔ kome kɛɛ akɛ, Odasefoi lɛ miimamɔ “sɔlemɔtsũi” yɛ be mli ni jamɔ ni eyɔɔ mli lɛ miihɔɔ enɔ̃, yɛ asafoŋ bii ni amɛyifalɛ baa shi hewɔ. Ekɛ ekãa wie akɛ: “Eji nyɛmɛ nyɔji nyɔŋma kɛ enyɔ kroko kulɛ, nyɛbaanyɛ nyɛhé wɔ nɔ̃ lɛ ekome. Esa akɛ wɔhɔ̃ɔ ekome ejaakɛ wɔnyɛɛɛ wɔwo nyɔmɔi. Shi nyɛ lɛ, nyɛbɛ osɔfoi ni awoɔ amɛ nyɔmɔ. . . . Ni agbɛnɛ nyɛfiteee shika tsɔ̃ yɛ nyɛ tsũi ahe, amɛjeee tsũi ni kwɔlɔ kɛ amɛyiteŋ somromoo ni anyɛɛɛ asaa.”
Eyɛ faŋŋ akɛ, ŋshɔkpɔi baanyɛ ajie Nyɔŋmɔ yi diɛŋtsɛ. Eba akɛ Yehowa yijiemɔ aaaya nɔ ajije yɛ Pasifik ŋshɔkpɔ fɛfɛo nɛɛ nɔ—kɛ jeŋ fɛɛ!
[Akrabatsa ni yɔɔ baafa 9]
MAŊ LƐ HE SANE:
1994 Sɔɔmɔ Afi
YIFALƐ NI FE FƐƐ NI YAA SHIƐMƆ: 12,867
EMLIJAA: Odasefonyo 1 kɛha mɛi 271
MƐI NI BA KAIMƆ LƐ: 24,436
GBƐGBALƆI AMLIJAA: 1,386
BIBLIA KASEMƆI AMLIJAA: 7,519
MƐI NI ABAPTISI: 568
ASAFOI SƆRƆTOI AYIBƆ: 158
NITSUMƆ HE NINE: MANUREWA
[Mfoniri ni yɔɔ baafa 9]
Gbɛgbalɔi ni miiya shiɛmɔ yɛ 1930 mli
[Mfoniri ni yɔɔ baafa 9]
Nitsumɔ he nine tsũi ni yɔɔ Manurewa
[Mfoniri ni yɔɔ baafa 9]
Maŋtsɛyeli sane lɛ shiɛmɔ yɛ Devonport, Auckland