‘Tamɔ Bɔ ni Dade Jɔɔ Dade Naa Lɛ’

KƐBAA Ŋ.B. afii ohai etɛ lɛ naagbee gbɛ lɛ, obalanyo ko ni yɔɔ ekaa waa, ni atsɛɔ lɛ Anthony, ni awieɔ ehe akɛ eji “Koptik Kristofonyo” lɛ, tsi ehe kɛjɛ je lɛ he ni eyaye afii 20 yɛ he ko banee yɛ shia ŋa nɔ. Mɛni hewɔ? Enu he akɛ no ji gbɛ ni hi fe fɛɛ ni eeetsɔ nɔ esɔmɔ Nyɔŋmɔ. Lɛ ji Kristendom klɛŋklɛŋ mɔ ni yatee ehe, loo ehiii gbɔmɛi ateŋ yɛ jamɔ hewɔ, ni ena mɛi anɔ hewalɛ waa.

Ŋmɛnɛ, Kristendom yɛ mɛi ni ehiii gbɔmɛi ateŋ yɛ jamɔ hewɔ nɛɛ fioo pɛ. Shi aŋkroaŋkroi babaoo miitao amɛtsi amɛhe kwraa yɛ gbɛ kroko nɔ. Amɛsumɔɔɔ ni amɛkɛ mɛi krokomɛi wieɔ jamɔ he saji ahe, ejaakɛ amɛnuɔ he akɛ wiemɔi ni tamɔ nɛkɛ kɛ gbeekpamɔ ni baaa kɛ béi baa. Nɔ ni yɔɔ amɛjamɔ mli titri ji ni amɛkafee amɛnaanyo efɔŋ ko.

Lɛlɛŋ, efɔŋ ni mɔ ko efeee enaanyo lɛ fata anɔkwa jamɔ he, shi babaoo he miihia. Blema abɛbua ko kɛɔ akɛ: “Dade jɔɔ dade naa, ni gbɔmɔ haa enaanyo nɔ tseɔ.” (Abɛi 27:17) Anɔkwale lɛ ji akɛ, Biblia lɛ woɔ Kristofoi hewalɛ ni amɛkpe kutuu, shi jeee ni amɛtsi amɛhe banee kwraa kɛjɛ je lɛ he aloo kɛjɛ Kristofoi krokomɛi ahe. (Yohane 17:14, 15) Ekɛɔ akɛ: “Nyɛhaa wɔyɔseyɔsea wɔhe, koni wɔhiɛ adɔ suɔmɔ kɛ nitsumɔi kpakpai ahe, ni wɔkakwa wɔhe naabuamɔ.” (Hebribii 10:24, 25) Yehowa Odasefoi nyiɛɔ nakai ŋaawoo lɛ sɛɛ. Amɛbuaa amɛhe naa kutuu shii abɔ yɛ otsi mli, koni ‘amɛkɛha amɛnanemɛi anɔ atse,’ ni amɛkɛtswa amɛnanemɛi heyelilɔi lɛ ahemɔkɛyeli amɛma shi. Amɛnaa akɛ anɔkwayeli mli ni ajɛɔ asusuɔ Biblia mli saji ahe lɛ kɛ béi kɛ nɔmɔi baaa. Shi moŋ, ekɛ gbeekpamɔ kɛ toiŋjɔlɛ baa. Eji anɔkwa jamɔ fã ni he hiaa waa.