Aasusu Lá-Hamɔ He Ekoŋŋ
NƆ NI woɔ helatsɛ ni kã helatsamɔ he lɛ hewalɛnamɔ he gbeyei fe fɛɛ, yɛ nɛkɛ AIDS yinɔ ni yɔɔ gbeyei waa nɛɛ mli lɛ baanyɛ atee ehe yɛ opireshɛn tsu lɛ mli. “Gbɛ ko kwraa bɛ ni wɔɔtsɔ nɔ wɔha lá ni wɔkɛhaa mɛi lɛ afee nɔ ni muawa ko kwraa bɛ mli,” taakɛ Dr. Richard Spence, ní kɛ nɔ ni fe afii nyɔŋma sɔŋŋ ekwɛ Tsofafeemɔ He ni Afeɔ Opireshɛn ni Akɛ Lá Tsuuu Nii lɛ nɔ yɛ Cooper Hospital-University Medical Center ni yɔɔ Camden, New Jersey, U.S.A. lɛ kɛɛ lɛ.
Ebɛ naakpɛɛ akɛ tsofafeemɔ he nɛɛ kwɛɔ Yehowa Odasefoi, ní ale bɔ ni amɛdamɔɔ Biblia lɛ nɔ amɛkpooɔ lá ni agbalaa awoɔ mɔ mli lɛ waa lɛ ateŋ mɛi babaoo. (3 Mose 17:11; Bɔfoi lɛ Asaji 15:28, 29) Shi kɛlɛ, helatsɛmɛi ni amɛjeee Odasefoi hu saŋŋ baa tsofafeemɔ he nɛɛ nakai nɔŋŋ, ni amɛsusuɔ osharai ni baanyɛ ajɛ lá ni agbalaa awoɔ mɔ mli lɛ mli aba, tamɔ mlɛbo mli helai, AIDS, kɛ helai krokomɛi ni ebaanyɛ ekɛba lɛ he waa. Courier-Post Weekly Report on Science and Medicine lɛ wie akɛ: “Bɔ ni AIDS hela lɛ efa babaoo lɛ tsɔɔ akɛ esa akɛ akwɛ lá lɛ mli jogbaŋŋ. Shi kɛlɛ, lá lɛ ekomɛi baanyɛ atsɔ emlikwɛmɔ nɛɛ mli ni anaaa akɛ muawai yɛ mli, ejaakɛ mɔ ko baanyɛ ahi muawai nɛɛ eko be saŋŋ dani sɛɛ mli lɛ abaana yɛ lá mlikwɛmɔ lɛ mli.”
Yɛ osharai nɛɛ ahewɔ lɛ, Tsofafeemɔ He ni Afeɔ Opireshɛn ni Akɛ Lá Tsuuu Nii lɛ kɛ nibii krokomɛi yeɔ lá ni agbalaa awoɔ mɔ mli lɛ najiaŋ, tamɔ helatsɛ lɛ diɛŋtsɛ la ni asaa akɛwoɔ emli ekoŋŋ—ni ji gbɛ ko ni Odasefoi komɛi eteee shi amɛwooo yɛ shihilɛi komɛi ashishi lɛ.a Tsofafeemɔ lɛ mli gbɛ kroko hu ji tsofai komɛi ni haa helatsɛ lɛ lá falɛ yaa hiɛ lɛ kɛ nitsumɔ. Kɛfata he hu lɛ, bei komɛi lɛ akɛ tsofai ni nyɛɔ eyeɔ lá najiaŋ tsuɔ nii koni eha kɔɔyɔɔ ni ji oxygen ni yaa gbɔmɔtso lɛ mli lɛ afa ni ehe ehiaaa ni agbala lá awo mɔ lɛ mli. “Yehowa Odasefoi sumɔɔ tsofafeemɔ ni hi fe fɛɛ,” taakɛ Dr. Spence wie lɛ, “shi amɛsumɔɔ ni akɛ tsofai krokomɛi aye lá ni akɛaawo amɛmli lɛ najiaŋ.”
Yehowa Odasefoi daa shi waa yɛ ekomefeemɔ kɛ yelikɛbuamɔ ni amɛna kɛjɛ datrɛfoi ni buɔ amɛ jamɔ mli hemɔkɛyelii lɛ adɛŋ lɛ waa diɛŋtsɛ. Nɔ ni ejɛ mli eba ji akɛ, amɛna “tsofafeemɔ ni hi fe fɛɛ” lɛlɛŋ, ni amɛtee nɔ amɛhiɛ henilee ni mli tse mli yɛ Yehowa Nyɔŋmɔ hiɛ.—2 Timoteo 1:3.
[Shishigbɛ niŋmai]
a Akɛ nɛkɛ gbɛ nɛɛ mlitsɔɔmɔ ni mɔɔ shi jogbaŋŋ, kɛ otii ni he hiaa yɛ mɔ diɛŋtsɛ yiŋkpɛɛ-feemɔ mli, yɛ lɛ diɛŋtsɛ ehenilee naa lɛ eha yɛ Buu-Mɔɔ ni je kpo yɛ March 1, 1989 lɛ, baafai 30-1.