Maŋtsɛyeli Jajelɔi Bɔ Amaniɛ
Greenland Shihilɛ Hei ni Yɔɔ Shɔŋŋ lɛ ni Aaashɛ
AFII nyɔŋmai abɔ nɛ ni Yehowa Odasefoi kɛ Buu-Mɔɔ kɛ Awake! woji tɛtrɛbii lɛ etsu nii yɛ sanekpakpa lɛ shiɛmɔ mli aahu. Nɛkɛ woji nɛɛ wóɔ Yehowa nilee, taakɛ ajie lɛ kpo yɛ e-Wiemɔ, Biblia lɛ mli lɛ nɔ gojoo. Amɛyaa nɔ amɛkwɛɔ nibii ni yaa nɔ yɛ je lɛŋ ni kɔɔ Biblia gbalɛ he lɛ, ni amɛkɛ Biblia ŋaawoo ni nilee yɔɔ mli lɛ toɔ be ni amɛyɔɔ mli lɛ amli naagbai ahe.—Yakobo 3:17.
Yɛ 1994 mli lɛ, Odasefoi ni yɔɔ Greenland lɛ bɔ mɔdɛŋ yɛ gbɛ krɛdɛɛ nɔ akɛ amɛkɛ Buu-Mɔɔ kɛ Awake! lɛ baaha gbɔmɛi babaoo bɔ ni amɛaanyɛ. Yɛ latsaa be mli lɛ, amɛto gbɛjianɔ akɛ amɛbaaya shihilɛ hei ni yɔɔ shɔŋŋ fe fɛɛ yɛ Greenland lɛ ekomɛi. Maŋtsɛyeli jajelɔi akuu ko kɛ lɛlɛ fã gbɛ ni jekɛmɔ fe kilomitai 4,000, yɛ Qaanaaq (Thule) anaigbɛ ŋshɔ lɛ naa, ni amɛyashɛ shihilɛ hei ni yɔɔ kooyigbɛ fe fɛɛ yɛ shikpɔŋ nɛɛ nɔ lɛ ekomɛi amli. Amɛ gbɛfaa lɛ he otsii kpawo. Yɛ bokagbɛ ŋshɔ lɛ naa lɛ, Odasefoi gbalashihilɛ mli hefatalɔi komɛi yashɛ shihilɛ he ni yɔɔ Ittoqqortoormiit lɛ, ni no fee klɛŋklɛŋ kwraa ni amɛto naa amɛkɛ sanekpakpa lɛ tee mɔ fɛɛ mɔ ŋɔɔ yɛ jɛmɛ.
Mra mli yɛ nakai afi lɛ mli, yɛ April nyɔŋ lɛ nɔ lɛ, akɛ Buu-Mɔɔ kɛ Awake! lɛ ekomekomei 7,513 ha gbɔmɛi ni yɔɔ Greenland lɛ. No tsɔɔ akɛ, kɛ aja mli lɛ, Maŋtsɛyeli shiɛlɔi 127 lɛ ateŋ mɔ fɛɛ mɔ kɛ woji tɛtrɛbii 59 ha—wolo tɛtrɛɛ 1 kɛha mɛi 7 fɛɛ kpawo ni yɔɔ jɛmɛ. Nakai nyɔŋ lɛ nɔ lɛ, Awake! wie saneyitso ko he kɛtsara nɔ, yɛ yitso ni yɔɔ hiɛ ni ji “Breast Cancer—Every Woman’s Fear” lɛ shishi. Odasefonyo ko, ni ha woji tɛtrɛbii 140 lɛ, shi nakai Awake! lɛ eko eha tɛlivishin nɔ adafitswalɔ ko. Gbii enyɔ sɛɛ lɛ, tɛlivishin nɔ adafitswaa ko wie saji ni aŋmala yɛ kansa ni feɔ fufɔ nɛɛ he. Adafitswalɔ lɛ kɛ wolo tɛtrɛɛ lɛ tsɔɔ yɛ tɛlivishin lɛ nɔ, ni egbele ebaafai pii beni ejieɔ bɔ ni atsɔɔ shishi yɛ Greenland wiemɔ mli jogbaŋŋ lɛ yi lɛ. Ema ŋaawoi ni anyɛɔ atsuɔ he nii, ni Awake! lɛ kɛha lɛ anɔ mi waa akɛ gbɛ ni atsɔɔ nɔ atsiɔ hela lɛ naa.
Abibii Odasefonyo ni kɛ woji tɛtrɛbii lɛ ha adafitswalɔ lɛ saji yɛ nakai TV nɔ nifeemɔ lɛ nɔŋŋ mli. Eha saji saŋŋ ni abi lɛ yɛ Yehowa Odasefoi ahe lɛ hetoo ni ewie bɔ ni aja wolo tɛtrɛbii lɛ waa yɛ nakai nyɔŋ lɛ nɔ lɛ hu he. Ewie nilee ni anyɛɔ atsuɔ he nii, ni anaa yɛ Biblia lɛ mli lɛ hu he, ni etsɔɔ mli akɛ ŋaawoo ni nilee yɔɔ mli ni tamɔ nɛkɛ baanyɛ aye abua wɔ ni wɔkpee ŋmɛnɛ naagbai nɛɛ anaa.
Nifeemɔ lɛ ba naagbee kɛ saji ni abibii Greenland Kansa Kuu lɛ sɛinɔtalɔ lɛ. Ewie akɛ enako sane ko ni aŋma jogbaŋŋ, ni tsɔɔ mɔ nii hu yɛ nakai sane lɛ he, yɛ emaŋ wiemɔ mli dã. Kɛkɛ ni efɔ̃ mɛi fɛɛ ni yɔɔ kansa ni feɔ fufɔ he sane lɛ he miishɛɛ lɛ ni amɛkane saji ni yɔɔ Awake! lɛ mli lɛ. Ewie akɛ ayɛ yiŋtoo kpakpa ni aaadamɔ nɔ ada Yehowa Odasefoi ashi waa yɛ hegbɛ ni amɛŋɔ amɛkɛŋma enɛ lɛ he.
Taakɛ eyɔɔ Greenland lɛ, Yehowa Odasefoi ni yɔɔ je lɛŋ fɛɛ lɛ yaa nɔ amɛshiɛɔ sanekpakpa lɛ “[amɛtsɔɔ] bɔɔ nii fɛɛ ni yɔɔ ŋwɛi shishi lɛ.” (Kolosebii 1:23; Bɔfoi lɛ Asaji 1:8) Kɛtsɔ Biblia kasemɔ woji, ni Buu-Mɔɔ kɛ Awake! fata he lɛ kɛ nitsumɔ nɔ lɛ, amɛyeɔ amɛbuaa gbɔmɛi sɔrɔtoi fɛɛ ni amɛkpeeɔ ŋmɛnɛŋmɛnɛ beaŋ naagbai anaa, ni amɛhaa amɛ hiɛnɔkamɔ hu kɛha wɔsɛɛ be kpakpa.
[Shikpɔŋ he mfoniri ni yɔɔ baafa 8]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Qaanaaq (Thule)
Ittoqqortoormiit
Nuuk (Godthåb)