Shikai-ni-Ashwie ni Nyɔŋmɔ Gbɛi Yɔɔ Nɔ

KWƐMƆ shikai ni onaa yɛ biɛ lɛ jogbaŋŋ. German maŋtsɛ Wilhelm V fee yɛ enɔyeli beaŋ, kɛjɛ 1627 kɛyashi 1637. No mli lɛ Afii Nyɔŋmai Etɛ Tawuu, ni ji mpleshii ni ka Katolikbii kɛ Protestantbii ateŋ lɛ miiya nɔ yɛ Europa teŋgbɛ. Wilhelm V yafi Protestant kuu lɛ sɛɛ. Bɔni afee ni enyɛ ewo tawuu lɛ he nyɔmɔ babaoo lɛ, ejie jwiɛtɛi ni eyɔɔ lɛ fɛɛ ni ekɛshwie shikai.

Nɔ ni yɔɔ miishɛɛ ji akɛ, mfonirii ni yɔɔ shikai ni ashwie lɛ pii anɔ lɛ tsɔɔ hulu ni miibɔle Nyɔŋmɔ gbɛi, Yehowa, ni yɔɔ Hebri Tetragrammaton mli lɛ he. Tɛŋ tso, ni damɔ shi kɛha hewalɛ hu yɛ nɔ. Nɔ ni etsɔɔ ji akɛ, eyɛ mli akɛ kɔɔyɔɔ eha tso lɛ edɔ moŋ, shi eyɛ lolo akɛ nɔ ni ekũko, yɛ Nyɔŋmɔ hebuu naa. Gbɛi Yehowa lɛ yɛ Latin niŋmaai ni yɔɔ shika lɛ nɔ lɛ mli, ni etsɔɔ hekɛnɔfɔɔ yɛ ehebuu mli.

Yɛ nɔ najiaŋ ni eeetsɛ Nyɔŋmɔ gbɛi lɛ, Nyɔŋmɔ gbɛi kɛ nitsumɔ yɛ nɛkɛ gbɛ nɔ lɛ feɔ efolo, ejaakɛ Yehowa damɔɔɔ afa ko yɛ adesai atawuu mli. Yɛ anɔkwale mli lɛ, Nyɔŋmɔ nɔkpɛlɛmɔ bɛ Afii Nyɔŋmai Etɛ Tawuu lɛ nɔ. Funk & Wagnalls New Encyclopedia lɛ kɛɛ, “kɛ akɛ hiɛshikamɔ bu naa lɛ, aaafee German bii lɛ fa kpotoo hiɛ kpata yɛ tawuu lɛ mli. Ni afite German maŋtiase, maji bibii, akrowai, kɛ ŋmɔshi babaoo ni anyɛŋ akane. Kɛ abu naa lɛ, Germany guɔyeli nibii afeemɔ hei, okwaayeli nitsumɔ hei, kɛ jarayeli nitsumɔi lɛ amlijaa etɛ mli enyɔ fite kwraa.

Yehowa gbɛi ni akɛtsu nii yɛ shikai ni ashwie nɛɛ anɔ lɛ kaiɔ mɔ ko kita ni akɛha Israel lɛ: “Kaahiɛ Yehowa, o-Nyɔŋmɔ lɛ gbɛi amli yakayaka.” (2 Mose 20:7) Fɛɛ sɛɛ lɛ, shikai ni ashwie nɛɛ yeɔ odase akɛ, German bii le gbɛi krɔŋkrɔŋ lɛ, ni ji Yehowa, kɛjɛ jeeŋmɔ. Te ole Nyɔŋmɔ ni hiɛ nakai gbɛi lɛ jogbaŋŋ ha tɛŋŋ?