“Tamɔ Tsei Agbii”

NƆ NI fe afii akpei etɛ nɛ, ni Mose ŋma akɛ: “Wɔfii amli gbii lɛ, afii nyɔŋmai kpawo ni, ni kɛ efa aahu lɛ, afii nyɔŋmai kpaanyɔ, ni amɛmli shwaa nii lɛ, tɔlɛ kɛ yakayaka nii ni.”—Lala 90:10.

Yɛ tsofafeemɔ mli hiɛyaa lɛ fɛɛ sɛɛ lɛ, adesai awala sɛɛtsɛlɛ tamɔ bɔ ni eji yɛ Mose gbii lɛ amli lɛ nɔŋŋ pɛpɛɛpɛ. Shi kɛlɛ, adesai eyaŋ nɔ amɛhiŋ nɛkɛ fɔbuu shihilɛ be kukuoo nɛɛ mli sɔŋŋ daa nɛɛ. Nyɔŋmɔ wie, yɛ Biblia mli wolo ni ji Yesaia lɛ akɛ: “Mimaŋ lɛ gbii aaatamɔ tsei agbii, ni mɛi ni mihala lɛ aaaye amɛninenaa nitsumɔ lɛ mli nii aahu po.”—Yesaia 65:22.

Tsei ni tsɛɔ waa yɛ Biblia beaŋ shikpɔji anɔ lɛ ateŋ ekome ji mu tso. Tso ni afee he mfoniri yɛ biɛ lɛ ji mu tsei ni eye afii akpe, ni woɔ yibii lolo yɛ Galilea lɛ ateŋ ekome. Mɛɛ be adesai hu baahi shi be kakadaŋŋ tamɔ nakai? Nakai gbalɛ lɛ nɔŋŋ tsɔɔ mli akɛ enɛ baaba yɛ be mli ni Nyɔŋmɔ bɔɔ “ŋwɛi hee kɛ shikpɔŋ hee” lɛ.—Yesaia 65:17.

Kpojiemɔ wolo lɛ hu gbaa “ŋwɛi hee kɛ shikpɔŋ hee”—ni ji ŋwɛi nɔyeli hee, kɛ adesai ashihilɛ gbɛjianɔtoo hee ni abaato ama shi lɛ he sane efɔɔ shi, beni Nyɔŋmɔ “aaatsumɔ amɛhiɛaŋ yaafo nui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ [lɛ].”—Kpojiemɔ 21:1, 4.

Etsɛŋ ni nɛkɛ ŋwɛi shiwoo nɛɛ baaba mli. Nakai beaŋ lɛ, mu tso gbii po baafee tamɔ gbi kome ni hoɔ yɛ ŋmɛlɛtswai 24 mli. Ni wɔbaahi shi be babaoo ni wɔkɛye wɔninenaa nitsumɔi lɛ amli ŋɔɔmɔ aahu kɛmɔ shi.