Maŋtsɛyeli Jajelɔi Bɔ Amaniɛ
Nyɔŋmɔ Webii Jɛɔ Amɛsuɔmɔ Mli Amɛkɛ Amɛhe Haa
EGBƐI ji Yose, ni Kipro ŋshɔkpɔ lɛ nɔ nyo ji lɛ. Efata klɛŋklɛŋ afii oha lɛ mli Kristofoi ni hɔ̃ɔ amɛ shikpɔji kɛ shiai koni amɛkɛye amɛbua yɛ shika gbɛfaŋ, kɛha Kristojamɔ shweremɔ lɛ ahe. Bɔ ni enaa mɔ he miishɛɛ ni ejieɔ mlihilɛ kpo waa lɛ hewɔ lɛ, abale lɛ akɛ Barnaba, ni eshishi ji “Miishɛjemɔ Bi.”—Bɔfoi lɛ Asaji 4:34-37.
Nɛkɛ anɔkwa miishɛɛ ni anaa yɛ mɛi krokomɛi ahe nɛɛ efee Yehowa anɔkwa jalɔi akadimɔ nii be fɛɛ be. Esorooo Yehowa Odasefoi ŋmɛnɛ, taakɛ niiashikpamɔ ni nyiɛ sɛɛ, ni jɛ Solomon Islands lɛ maa nɔ mi lɛ.
Odasefoi akuu ko ni yi fa fe mɛi 60, ni jɛ Australia kɛ New Zealand fa gbɛ kɛtee Honiara, ni ji Solomon Islands maŋtiase lɛ yɛ Guadalcanal. Amɛba koni amɛbaye amɛbua ni akɛma Kpee Asa agbo ko kɛha Kristofoi ahenaabuamɔi. Ehe amɛ aaafee otsii enyɔ pɛ ni akɛma asa ko ni mɛi aaashɛ 1,200 baanyɛ atara shi yɛ mli!
Aaafee nakai beaŋ nɔŋŋ lɛ, nɔyelɔi ni yɔɔ maŋ bibioo ni atsɛɔ lɛ Munda lɛ mli, yɛ New Georgia ŋshɔkpɔ lɛ nɔ lɛ, ha Yehowa Odasefoi asafo lɛ shikpɔŋ ko yɛ maŋ lɛ teŋ tuuŋtu. Amɛmiitao amɛma Maŋtsɛyeli Asa, ni ji jamɔ hé. Ni eko he miihia amɛ waa lɛlɛŋ hu. Amɛkpeɔ yɛ asa bibioo ko nɔ yɛ jwɛi tsu shia ko mli, shi amɛbɛ shika kɛ nibii krokomɛi ni amɛkɛbaama Maŋtsɛyeli Asa lɛ eko.a Mɛi ni yɔɔ asafo lɛ mli ji mɛi ni edara yɛ afii amli, kɛ mɛi ni egbɔjɔ, kɛ gbekɛbii sɔŋŋ, ni mɔ ko kwraa bɛ amɛteŋ ni yɔɔ tsumaa he niiashikpamɔ.
Aaafee kilomitai 380, yɛ Guadalcanal ŋshɔkpɔ lɛ nɔ lɛ, Odasefoi ni yɔɔ Honiara maŋtiase lɛ mli lɛ jɛ amɛsuɔmɔ mli amɛkɛ amɛhe ha. (Lala 110:3) Bɔ ni amɛsusu ji akɛ: “Kɛ wɔnyɛmimɛi ni yɔɔ maji krokomɛi anɔ lɛ miisumɔ ni amɛma Kpee Asa amɛha wɔ yɛ otsii enyɔ pɛ mli lɛ, no lɛ wɔ hu wɔbaanyɛ wɔye wɔbua wɔnyɛmimɛi ni yɔɔ Munda lɛ, ni wɔkɛ otsii enyɔ ama Maŋtsɛyeli Asa wɔha amɛ.”
Enɛ ji nɔ ni ba. Gbi ko lɛ, lɛlɛ ko ni eyi obɔ kɛ Odasefoi ni kɛ amɛhe eha, ni yɔɔ miishɛɛ kɛ ekaa babaoo bashɛ Munda. Hii kɛ yei, onukpai kɛ gbekɛbii fɛɛ kɛ amɛhe wo mli ni akɛjie amɛ nibii kɛjɛ lɛlɛ lɛ mli, ni amɛfee klalo akɛ amɛaaje tsu lɛ maa shishi kɛ tsei, sɛmɛnti, tsɛŋsii ni akɛbaawo tsu lɛ, kɛ nibii krokomɛi ni akɛba Munda dani amɛ hu amɛbashɛ jɛmɛ lɛ.
Beni aje nitsumɔ lɛ shishi etsɛɛɛ nɔŋŋ kɛkɛ ni sarawa wulu ko gba ni efite sarawa hewalɛ tsɔne ni shiɔ nu kɛbaa maŋ lɛ mli lɛ. Shi kɛlɛ, enɛ ebafeee naagba ni anyɛɛɛ aye nɔ kunim. Odasefoi lɛ tsa nu bu ko, ni ana nu kɛjɛ mli aahu yɛ be ni amaa tsu lɛ mli fɛɛ. Shi niyenii kɛha nitsulɔi lɛ fɛɛ hu? No hu jeee naagba ko kwraa. Awo mɛi ni kɛ amɛhe eha, ni jɛ Honiara lɛ gbɛ kɛ niyenii babaoo ni jɛ Honiara asafoi lɛ aŋɔɔ. Amɛkɛ amɛ diɛŋtsɛ amɛ nihoolɔi po ba!
Maŋbii lɛ na bɔ ni tsu lɛ maa yaa nɔ oyayaayai lɛ ni efee amɛ naakpɛɛ. Amɛteŋ mɔ kome kɛɛ akɛ: “Kɛ abɔi tsũi wuji tamɔ nɛkɛ maa yɛ biɛ lɛ, jeee gbii fioo ko pɛ akɛgbeɔ naa. Eheɔ afii babaoo.” Akutso lɛ mli mɔ kroko hu, ni ji jamɔ mli hiɛnyiɛlɔ ko kpɛlɛ nɔ akɛ abɔi esɔlemɔ tsu ko maa nɛɛ, ena afii 20, ni kɛlɛ agbeko naa lolo. Nɔ ni tamɔɔɔ nakai lɛ, agbe Yehowa Odasefoi a-Maŋtsɛyeli Asa hee ni yɔɔ Munda lɛ naa yɛ gbii nyɔŋma pɛ mli!
[Shishigbɛ niŋmai]
a Eji shia ni akɛ koo mli nibii loo jwɛi sɔŋŋ ma. Akɛ tsei mamɔɔ shi ni akɛfeɔ bɔ ni tsu lɛ baaji, ni akɛ blɛoi ni alo tsɛrɛɔ tsei lɛ ateŋ ni akɛ no nɔŋŋ eko woɔ tsu lɛ, ni akɛ kpaai fimɔɔ akpɛtɛɔ tsei lɛ ahe.
[Shikpɔŋ he mfonirii babaoo ni yɔɔ baafa 24]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
South Pacific Ocean
SOLOMON ISLANDS
Munda
GUADALCANAL
Honiara
[Shikpɔŋ he mfoniri]
AUSTRALIA
NEW ZEALAND