Ojamɔ lɛ—Ani Eji Lɛlɛ ni Esaaa ni Ashĩɔ Mli Kɔkɔɔkɔ?
LƐLƐ ko kɛ ahum ni naa wa waa ekpe yɛ ŋshɔ hiɛ. Lɛlɛ lɛ mli nitsulɔi, ni miibɔ mɔdɛŋ waa ni amɛbaa amɛlɛlɛ lɛ yi lɛ, kɛ yiŋkpɛɛ ko ni he hiaa waa ekpe: no ji akɛ, amɛhi lɛlɛ lɛ mli, aloo amɛshi lɛlɛ lɛ ni amɛbaa amɛ wala yi. Ani ole akɛ akɛ nɛkɛ shihilɛ ni yɔɔ gbeyei nɛɛ miitsu nii akɛ Nyɔŋmɔ jamɔ mli mfoniri feemɔ ko?
Bei pii lɛ, Nyɔŋmɔ jamɔ he nilelɔi, titri lɛ Katolik woloŋlelɔi, kɛ amɛ jamɔ lɛ toɔ lɛlɛ ko ni kɛ ahum ekpe yɛ ŋshɔ hiɛ he. Amɛkɛɔ akɛ nɛkɛ lɛlɛ nɛɛ, ni Yesu loo Petro ji mɔ ni kudɔɔ lɛ lɛ, feɔ yiwalaheremɔ gbɛ koome pɛ ni yɔɔ lɛ he mfoniri. Shidaamɔ ni osɔfoi lɛ ekɔ ji akɛ, ‘Kaashĩ lɛlɛ lɛ mli kɔkɔɔkɔ. Sɔlemɔ lɛ kɛ jaramɔ shihilɛi ni mli wawai ekpe dã, shi eji lɛlɛ ni enyɛ ekpee yinɔsane mli shihilɛi ni tamɔ ahum ni naa wa waa lɛ fɛɛ naa.’ Mɛi komɛi kɛɔ akɛ, ‘Mɛni hewɔ esa akɛ ashĩ mli? Mɛɛ hei krokomɛi yɔɔ ni abaanyɛ aya? Mɛni hewɔ ahĩii mli koni aye abua ni akudɔ lɛ kɛya nui ni bɛ hamahama mli?’
Yɛ mfoniri feemɔ ni akɛtsu nii nɛɛ kɛ gbeekpamɔ naa lɛ, gbɔmɛi babaoo, ni yɔɔ jamɔi sɔrɔtoi fɛɛ amli susuɔ nii ahe akɛ, ‘Mile akɛ mijamɔ lɛ etɔ̃ yɛ nibii pii amli moŋ, shi mihiɛ kã nɔ akɛ ebaatsake. Misumɔɔɔ ni mashĩ jɛmɛ. Masumɔ ni mana yelikɛbuamɔ ni akɛaaha lɛ ni ekɛye enaagbai lɛ anɔ lɛ mli gbɛfaŋnɔ.’ Ekolɛ nɔ ni kɛ nɛkɛ susumɔ nɛɛ baa ji suɔmɔ ni mli wa ni mɔ lɛ yɔɔ kɛha eblematsɛmɛi ajamɔ, aloo ekolɛ gbeyei ni esheɔ po akɛ “eeekwa” nakai jamɔ lɛ.
Enɛ he nɔkwɛmɔ nɔ ni sa kadimɔ waa ji Hans Küng, ni ji Katolik jamɔ he nilelɔ ko ni teɔ shi woɔ amɛ, ni ma nɔ mi akɛ: “Ani esa akɛ mashĩ lɛlɛ lɛ mli yɛ ahum lɛ mli, ni mashĩ mɛi ni mikɛ amɛ efã gbɛ yɛ lɛlɛ nɛɛ mli aahu kɛbashɛ biɛ lɛ ni amɛ koome pɛ amɛkpee kɔɔyɔɔ lɛ naa, ni amɛloo nu ni dũɔ kɛbaa lɛlɛ lɛ mli lɛ, ni ekolɛ amɛpele amɛhe po kɛha yiwalaheremɔ?” Eha hetoo akɛ: “Miŋmɛŋ bɔ ni mitsuɔ nii waa kɛmɔɔ shi yɛ sɔlemɔ lɛ mli lɛ he kɔkɔɔkɔ.” Gbɛ kroko hu ni yɔɔ ji ni “atsi he kwraa kɛjɛ sɔlemɔ nɛɛ he, yɛ ehemɔkɛyeli kwamɔ lɛ hewɔ, kɛha sui kpakpai ni nɔ kwɔlɔ ni asumɔɔ, kɛ ekolɛ, bɔni afee ni atsɔmɔ anɔkwale Kristofoi jogbaŋŋ kɛmɔ shi.”—Die Hoffnung bewahren.
Shi ani mɔ ko baanyɛ ahi lɛlɛ ni ji lɛ diɛŋtsɛ ejamɔ mli kɛ hiɛnɔkamɔ akɛ, Nyɔŋmɔ baajɛ mɔbɔnalɛ mli eha jamɔi fɛɛ be ni sɛɛ efooo ni amɛkɛfee tsakemɔ? Eji sanebimɔ ko ni hiɛdɔɔ yɔɔ he waa. Taakɛ mfoniri feemɔ lɛ tsɔɔ lɛ, oyaiyeli ni akɛaashĩ lɛlɛ ni he eba oshara lɛ mli, ni akɛbote lɛji bibii ni akɛjieɔ mɛi, ni bɛ shweshweeshwe mli lɛ yɛ oshara nakai nɔŋŋ, tamɔ beni oyɔɔ lɛlɛ ni shiuɔ lɛ mli lɛ nɔŋŋ pɛpɛɛpɛ. Ani nilee yɛ mli akɛ gbɛ fɛɛ gbɛ nɔ lɛ, aya nɔ ahi sɔlemɔ ko mli, ni bɔ ni eshihilɛ ji lɛ kɔɔɔ he eko? Mɛɛ gbɛkpamɔi jamɔi ni yɔɔ ŋmɛnɛ lɛ kɛhaa yɛ tsakemɔ gbɛfaŋ? Be enyiɛ Nyɔŋmɔ baaŋmɛ amɛ gbɛ ni amɛte shi amɛwo esuɔmɔnaa nii kɛyashi?
[He ni Mfoniri ni yɔɔ baafa 3 lɛ Jɛ]
Chesnot/Sipa Press