Bibioo Shi Eyɛ Hewalɛ

ROBERT, obalanyo fioo ni jɛ Canada lɛ tsɔ gbɛfaa nɔ ekpa shi kɛtsɔ Europa ni eetao egbɛhe yɛ shihilɛ mli. Ena nibii pii ni ha elaaje ehiɛnɔkamɔ yɛ wɔsɛɛ be he.

Beni eta niyeli he bibioo ko yɛ Seville, ni yɔɔ Spain lɛ, ni akɛ dɛhiɛmɔ wolo ko ni Yehowa Odasefoi ŋma ha Robert. Klɛŋklɛŋ lɛ, Robert yiŋ fee lɛ kɔshikɔshi yɛ he. Ekɛɛ: “Shi kɛlɛ, mikane. Minyɛŋ matsɔɔ mli, shi minu he akɛ jwɛŋmɔ yɛ nɔ ko mli yɛ biɛ. Mina adesa nɔnyɛɛ kɛ shitswiamɔi sɔrɔtoi babaoo yɛ migbɛfaa lɛ mli, ni bɔ ni minyɛɛɛ matsake nibii maha lɛ ha minijiaŋ je wui. Beni mikane dɛhiɛmɔ wolo lɛ, misusu akɛ, ‘Ani “jeŋ hee” nɛɛ baanyɛ aba shihilɛ mli?’ Kɛkɛ ni misusu akɛ, ’Hɛɛ, ekolɛ ebaanyɛ eba.’ ”

Robert kɛ hiɛnɔkamɔ hee ni ena lɛ ŋma wolo kɛtee Yehowa Odasefoi anitsumɔ he ni yɔɔ Canada lɛ, ni ebi ni mɔ ko abasara lɛ, ni ebaye ebua lɛ ni enu Biblia lɛ shishi, kɛ eku esɛɛ kɛba shia.

Ŋwanejee ko bɛ he akɛ, wiemɔi ni akɛ naabu wieɔ lɛ yɛ hewalɛ. Shi kaabu hewalɛ ni shɛɛ sane ni akala lɛ yɔɔ lɛ akɛ nɔ ko bibioo. Bɔ fɛɛ bɔ ni eyɔɔ bibioo ha lɛ, Biblia kasemɔ he woji lɛ yɛ hewalɛ ni gbalaa mɔ waa. Amɛsaa jwɛŋmɔ lɛ kɛ tsui lɛ he, ni amɛkɛ wɔsɛɛ be he hiɛnɔkamɔ ni ma shi shiŋŋ haa.—Hebribii 4:⁠12.