Te Wala Jara Wa Kɛha Bo Tɛŋŋ?

GBEKƐ nuu ko ni eye kɛjɛ afii nyɔŋma kɛ etɛ kɛyaa huru kɛjɛ ŋwɛitsu nsɔɔdoi kpaanyɔ nɔ kɛbagbee shi ni egbo. Ekane wolo ko ni tsɔɔ bɔ ni ahuruɔ ni akɛgbeɔ he, ni tsɔɔ akɛ eji “nii ni piŋmɔ loo naagba loo gbeyeishemɔ ko bɛ mli; shi moŋ onuɔ he akɛ oyɛ jogbaŋŋ.” Woloŋmalɔ nɛɛ ni ŋma ewolo lɛ yɛ Japan lɛ kɛɛ ekɛ hegbee miiha akɛ “shihilɛ mli nibii ni ahalaa mli lɛ ekome” kɛkɛ.

Jeee gbɔmɛi ni gbeɔ amɛ diɛŋtsɛ amɛhe lɛ pɛ jieɔ bulɛ ni abɛ kɛha wala lɛ kpo ŋmɛnɛ. Bulɛ bibioo pɛ tsɔne kudɔlɔi ni kudɔɔ tsɔne basabasa lɛ hu yɔɔ kɛha wala. Amɛteŋ mɛi komɛi po nuɔ daa ni wa ni amɛkɛkudɔɔ tsɔne, ni amɛteŋ mɛi pii woɔ tsɔne foi waa kɛyaa gbele mli.

Mɛi krokomɛi hu tsɔɔ bulɛ bibioo ko pɛ ni amɛyɔɔ kɛha amɛ wala yɛ miishɛɛ nɔ mi ni amɛmaa lɛ hewɔ. Zigaret shɛrelɔi sumɔɔɔ ni amɛkpa, eyɛ mli akɛ zigaret shɛremɔ baanyɛ agbe mɔ, ni awo lɛ gbɛi akɛ hegbee fiofio. Ni amɛaahiɛ hetsemɔ mli yɛ jeŋ ni eye bɔlɛnamɔ he sɛkɛ nɛɛ mli lɛ, mɛi pii diɔ nyenyeŋtswibɔɔ shihilɛ ni kɛ mɔ yaa gbele mli yɛ bei pii amli lɛ sɛɛ.

Mɛi komɛi hu laajeɔ wala shihilɛ mli afii babaoo kɛtsɔɔ fufeemɔ, dãatɔɔ, gbɔmɔtsoŋ gbɔlemɔ ni faaa, kɛ miishɛɛ sɛɛdii nɔ, ni amɛleee po. Japannyo woloŋmalɔ Shinya Nishimaru bɔ kɔkɔ akɛ: “Niyeli sui ni naatsii bɛ mli lɛ baanyɛ agba gbɔmɔtso lɛ nitsumɔ naa, ni miishɛɛ kɛ ŋɔɔmɔyeli sɛɛ kɛkɛ ni adiɔ lɛ fiteɔ gbɔmɛi ahewalɛ.” Mɛi komɛi hiɛ jwɛŋmɔ ni mɛi ni hi shi yɛ blema, ni kɛɛ: “Nyɛhaa wɔyea nii, ni wɔnu dãai; ejaakɛ wɔ́ benɛ wɔgboi!” lɛ hiɛ lɛ.—Yesaia 22:13; 1 Korintobii 15:32.

Hɛɛ, bulɛ ni abɛ kɛha wala egbɛ eshwa ŋmɛnɛ. No hewɔ lɛ, abaanyɛ abi yɛ gbɛ ni ja nɔ akɛ, Te wala jara wa kɛha bo tɛŋŋ? Ani esa akɛ abaa wala yi yɛ gbɛ fɛɛ gbɛ nɔ? Ni ani nɔ ko yɛ ni jara wa waa fe wɔ ŋmɛnɛ wala nɛɛ?