Gbohii Ahe Gbeyeishemɔ Egbɛ Eshwa
Hulu eyanyɔ shi jeeŋmɔ. Ooku osɛɛ kɛmiiba shia shi okpe sɛɛ fe bɔ ni obaasumɔ. Yɛ be mli ni onyiɛɔ kɛhoɔ maŋ lɛ gɔɔ lɛ he lɛ, otsui bɔi tswaa kpalakpala. Bɔ ni jenamɔ duŋ lɛ ehã nɔ fɛɛ nɔ efee diŋŋ lɛ haa onuɔ gbɛɛmɔ fioo ni aaafee he. Kɛkɛ ni onu gbɛɛmɔ ko ni naa wa, ni hɛleɔ mɔ shi kɛjɛ shɔŋŋ. Obɔi nyiɛmɔ oyayaayai—otsui-tswaa hu tee hiɛ—yɛ be mli ni okɛ ohiɛ etsɔɔ shia gbɛ kɛha hebuu lɛ.
ANI otsui efa pɛŋ yɛ be mli ni oyɔɔ gɔɔ ko mli loo obɛŋkɛ eko he lɛ? Kɛji nakai ni lɛ, belɛ ekolɛ jamɔ mli susumɔ ko ni ale yɛ jeŋ fɛɛ—ákɛ gbohii lɛ amumɔi baanyɛ aye abua loo aye hiɛkalɔi awui lɛ ena onɔ hewalɛ.
Kusumii ni ji apasa hemɔkɛyelii pii eba yɛ he ni aheɔ ayeɔ akɛ hiɛkalɔi ayelikɛbuamɔ he miihia gbohii lɛ aloo ekolɛ amɛbaaye hiɛkalɔi awui kɛ akpataaa amɛ lɛ hewɔ. Akɛ nɔkwɛmɔ nɔ lɛ, yɛ Latin-Amerika maji komɛi amli lɛ, nɔ ni mɛi pii fɔɔ feemɔ ji ni amɛkɛ krɔɔs afee shihilɛ he fioo ko yɛ he ni mɔ ko egbo oshara gbele yɛ lɛ. Gbɔmɛi suɔ kɛnɛrɛi ni amɛkɛ fɔfɔii shwieɔ jɛmɛ koni amɛkɛtsɔɔ miishɛɛ ni amɛyɔɔ loo ni amɛkɛye amɛbua mɔ ni egbo lɛ susuma loo mumɔ lɛ. Yɛ saji lɛ ekomɛi amli lɛ, agbaa amaniɛbɔi ni kɔɔ “naakpɛɛ” hetooi kɛha sɔlemɔi ahe saji kɛfoɔ shi, ni gbɔmɛi jeɔ shishi akɛ amɛaaya he ni animita lɛ, ni ji mɔ lɛ susuma loo emumɔ lɛ yɔɔ lɛ. Amɛfeɔ mandas, loo amɛwoɔ shi, akɛ kɛ mɔ ni egbo lɛ baaye abua amɛ ni amɛtsu nɔ ko loo amɛnine ashɛ nɔ ko nɔ—ekolɛ naakpɛɛ helatsamɔ ko nɔ lɛ—amɛbaajie amɛ shidaa kpo yɛ gbɛ krɛdɛɛ ko nɔ. Yɛ gbɛ kroko nɔ lɛ, ekolɛ abaabɔ amaniɛ akɛ mɔ ni egbo lɛ susuma jieɔ ehe kpo gbɛkɛ yɛ duŋ mli, ni ewoɔ mɛi ni yɔɔ jɛmɛ lɛ ahe gbeyei. Afɔɔ kɛɛmɔ akɛ susumai ni tamɔ nɛkɛ lɛ ji penando, amɛmiigbá hiɛkalɔi anaa yɛ tsutsu nibii komɛi ahewɔ.
Gbɔmɛi ni yɔɔ shikpɔji pii anɔ bɔɔ mɔdɛŋ babaoo koni amɛkpata mɛi ni egboi lɛ “amumɔi” lɛ. Aŋmɛɔ okpɔlɔi wuji, ashaa afɔlei, awieɔ wiemɔi ni shɛjeɔ mɔ mii—fɛɛ lɛ, koni akɛbɛɛ oweletɔɔ ni aaajɛ mɔ ni egbo lɛ mumɔ lɛ ŋɔɔ aba lɛ ashwie. Asusuɔ akɛ, nɔ ni baajɛ mumɔ lɛ fai ni aaakpa lɛ mli aba ji nyɔmɔwoo kɛ jɔɔmɔi kɛha mɛi ni ashi amɛ yɛ sɛɛ lɛ.
Amaniɛbɔɔ ko ni jɛ Afrika kɛɔ akɛ: “Mɛi pii heɔ yeɔ akɛ nɔ ko nɔ ko baaa ‘efolo loo yɛ adebɔɔ naa.’ Nɔ fɛɛ nɔ ni baaba—kɛ eji hela, amanehulu, kene-feemɔ, ohia, nugbɔnɛmɔ loo hulutsoo babaoo, osharai, weku mligbalamɔ, gbele lɛ—asusuɔ akɛ mumɔi ni anaaa amɛ, ni amɛyɔɔ hewalɛ fe adesai lɛ feɔ.” Amaniɛbɔɔ kroko hu kɛɔ akɛ: “Gbɔmɛi lɛ heɔ yeɔ akɛ amɛ blematsɛmɛi lɛ amumɔi yɛ gbɛhe ko yɛ ŋwɛi ni amɛkwɛɔ amɛ wekumɛi ni yɔɔ shikpɔŋ nɔ lɛ anɔ be fɛɛ be. Aheɔ ayeɔ akɛ blematsɛmɛi nɛɛ yɛ hewalɛi ni fe adebɔɔ mli nɔ̃, ni amɛbaanyɛ ni amɛkɛ enɛ atsu nii ni amɛkɛjɔɔ ni amɛkɛbu amɛwekumɛi ni yɔɔ shikpɔŋ nɔ lɛ ahe loo ni amɛkɛgbala amɛtoi, ni enɛ damɔ bɔ ni wekumɛi lɛ woɔ gbohii lɛ ahiɛ nyam loo amɛkuɔ amɛhiɛ amɛshwieɔ amɛnɔ lɛ nɔ.”
Shi ani enɛ kɛ Nyɔŋmɔ Wiemɔ lɛ kpaa gbee? Te osusuɔ tɛŋŋ?
[Mfoniri ni yɔɔ baafa 4]
“Animita” ko ni yɔɔ Chile