Hewalɛ ni Mlihilɛ Wiemɔ Yɔɔ

“Tsui ni edɔ kɔmɔɔ kɛ ŋkɔmɔyeli lɛ, kwɛ bɔ ni mlihilɛ wiemɔ baaha emii ashɛ ehe aha!”—Abɛi 12:25, Knox.

KRISTOFOI yeko amɛhe kɛjɛko jaramɔ shihilɛi ahe. Bei komɛi lɛ, amɛkɛ yeyeeye-feemɔ kpeɔ ejaakɛ amɛyɛ nɛkɛ “jaramɔ bei” nɛɛ amli.—2 Timoteo 3:1.

Kɛ akɛ amanehulu miikpe lɛ, kwɛ jɔɔmɔ ni eji akɛ aaanu mlihilɛ wiemɔi kɛjɛ naanyo anɔkwafo ko naa! Biblia lɛ kɛɔ akɛ: “Naanyo sumɔɔ mɔ bei fɛɛ mli, ni afɔ lɛ akɛ nyɛmi ha haomɔ be.” (Abɛi 17:17) Ale nuu anɔkwafo Hiob waa akɛ eji nɛkɛ naanyo ni atsɔɔ nɛɛ eko. Elifaz po wie yɛ ehe akɛ: “Beni mɔ ko etɛ ni eyaagbee shi, ni egbɔjɔ ni etɔ lɛ lɛ, owiemɔi lɛ wo lɛ hewalɛ ni edamɔ shi.”—Hiob 4:4, Today’s English Version.

Shi, beni hewalɛwoo he hiaa Hiob diɛŋtsɛ lɛ, Elifaz kɛ enanemɛi lɛ kɛ lɛ ewieee mlihilɛ wiemɔi. Amɛshwa Hiob yɛ amanehulu ni eba enɔ lɛ he, ni amɛkɛtsɔɔ akɛ ekolɛ etɔ̃ tɔ̃mɔ̃ ko ni ekɛtee. (Hiob 4:8) The Interpreter’s Bible lɛ wieɔ enɛ he akɛ: “Nɔ ni Hiob taoɔ ji adesa tsui ni nuɔ nii ahe ehaa mɔ. Nɔ ni ena ji wiemɔ ni tamɔ ‘anɔkwale’ kɛ jamɔ he wiemɔ kɛ jeŋba he wiemɔi ni enu ni ena aahu.” Hiob hao waa yɛ ejwɛŋmɔ mli beni enu Elifaz kɛ enanemɛi lɛ awiemɔi lɛ, aahu akɛ enɛ nyɛ enɔ ni ewie kɛ gbee ni wa waa akɛ: “Mɛɛ beyinɔ nyɛaagba misusuma naa ni nyɛkɛ wiemɔi aaakumɔ mi dukuduku kɛyashi?”—Hiob 19:2.

Ekaba kɔkɔɔkɔ akɛ wɔɔha wɔnaanyo Nyɔŋmɔ tsulɔ ko kɛ dɔlɛ babaoo awie waa yɛ wɔwiemɔi ni mɔ hesusumɔ, kɛ mlihilɛ bɛ mli hewɔ. (Okɛto 5 Mose 24:15 he.) Biblia mli abɛbua ko bɔɔ kɔkɔ akɛ: “Nɔ ni owieɔ baanyɛ abaa wala yi loo ekpata hiɛ; no hewɔ lɛ esa akɛ okpɛlɛ nibii ni jɛɔ owiemɔi amli baa lɛ nɔ.”—Abɛi 18:21, TEV.

Akɛni wɔyooɔ hewalɛ ni wiemɔ yɔɔ hewɔ lɛ, nyɛhaa wɔnyiɛa bɔfo Paulo nɔkwɛmɔ nɔ lɛ sɛɛ. Beni eyɔɔ Makedonia lɛ, “ekɛ wiemɔi pii wo amɛ ŋaa.”—Bɔfoi lɛ Asaji 20:2.