Biblia Lɛ—Mɛni Ji Ehe Sɛɛnamɔ Diɛŋtsɛ?
“BIBLIA lɛ ji teemɔŋ sane, wolo ko ni asumɔɔɔ ni mɛi anu shishi,” nɛkɛ ji bɔ ni shiatsɛ ko wie. Mɔ kroko hu wie akɛ: “Mile akɛ Biblia lɛ ji wolo ko ni he hiaa waa, shi mileee ehe sane babaoo tsɔ̃ ko. Eshishinumɔ wa waa.”
The Toronto Star lɛ wie akɛ: “Kristofoi pii le . . . Biblia lɛ he nɔ ko bibioo pɛ.” Katolik yoo ko wie akɛ: “Eŋɔɔ minaa waa akɛ miyɛ Biblia lɛ eko. Ehaa minaa mligbɛ toiŋjɔlɛ.” Wolɛɛnyo ko wie akɛ: “Biblia lɛ tamɔ kɔmpas ni kudɔɔ mɔ kɛtsɔɔ wala shihilɛ ŋshɔ ni efee hamahama lɛ mli kɛyaa he ni yɔɔ shweshweeshwe.” Yɛ tsutsu Hindunyo ko hu wiemɔ mli lɛ, “Biblia lɛ ji Nyɔŋmɔ Wiemɔ kɛ nikeenii kɛha adesai, ni eji tsofa kɛha mumɔŋ amanehului.”
Susumɔi ni ayɔɔ yɛ Biblia lɛ he sɛɛnamɔ diɛŋtsɛ he lɛ fa babaoo ni eyɛ sɔrɔtoi hu. Shi, kɛlɛ, mɛni ji ehe sɛɛnamɔ diɛŋtsɛ?
Biblia lɛ ji wolo ni he hiaa fe fɛɛ, kɛ wolo ni aja fe fɛɛ ni yɔɔ shihilɛ mli. Naagbai ni haoɔ mɔ fe fɛɛ ni adesai kɛkpe, aloo nɔ ni amɛkɛbaakpe wɔsɛɛ lɛ ahetoo yɛ ebaafai lɛ amli. Wolo ko kɛ lɛ yeee egbɔ yɛ bɔ ni anyɛɔ atsuɔ eŋaawoo he nii ahaa lɛ gbɛfaŋ. Jeŋba he tɛi ni ewoɔ he hewalɛ lɛ anɔ kwɔlɔ waa. Eshɛɛ sane lɛ yɛ hewalɛ ni ehe yɛ sɛɛnamɔ hu. Esa akɛ wɔkɔ nɛkɛ wolo ni he yɔɔ sɛɛnamɔ waa nɛɛ kɛjɛ wɔ woji atoohe lɛ ni wɔsusu he waa, ni wɔpɛi mli jogbaŋŋ hu kɛmɔ shi.
Wɔbaanyɛ wɔgbele Biblia lɛ kɛ hekɛnɔfɔɔ kwraa akɛ eja jogbaŋŋ kɛmɔ shi, anyɛɔ akɛ he fɔɔ nɔ, ni ajeee he ŋwane. Je lɛŋ yinɔsane maa yinɔsane mli nibii ni ba ni aŋmala yɛ mli lɛ anɔ mi. Shitsalɔi ni kaseɔ blema nibii ahe nii eye he odase shii abɔ akɛ Biblia lɛ ja kɛmɔ shi ni eji anɔkwale hu. Biblia ŋmalɔi 40 loo nɔ lɛ anɔkwayeli lɛ haa anaa amɛ faŋŋ akɛ hii ni yeɔ anɔkwa, ni amɛhiɛɔ emuuyeli mli hu. Bɔ ni Biblia lɛ mli saji kɛ ehe kpaa gbee lɛ tsɔɔ akɛ jeee adesai aŋɔɔ ejɛ. Nibii ni ba ni aŋmala yɛ mli lɛ ji nibii diɛŋtsɛ. Gbɔmɛi ni ewieɔ amɛhe lɛ ji gbɔmɛi diɛŋtsɛ. Hei kɛ maji ni ewieɔ he lɛ hu ji hei ni hi shi diɛŋtsɛ. Kɛfata he lɛ, gbalɛi ni sa kadimɔ waa yɛ Biblia lɛ mli ni tsɔɔ faŋŋ akɛ Yehowa Nyɔŋmɔ ji Biblia lɛ Ŋmalɔ.—2 Petro 1:21.
Wɔ Tsɔɔlɔ Kpeteŋkpele lɛ kwɛ koni esuɔmɔnaa nii kɛ eyiŋtoi ahe nilee anyɛ ahi shi kɛha mɛi ni taoɔ ni amɛle enɛɛmɛi ahe nii lɛ. Yɛ anɔkwale mli lɛ, Yehowa kɛɔ wɔ yɛ faŋŋ mli akɛ esuɔmɔnaa nii ji akɛ, mɛi sɔrɔtoi fɛɛ akase e-Wiemɔ lɛ “koni amɛshɛ anɔkwale lɛ lee mli.” (1 Timoteo 2:3, 4; Abɛi 1:5, 20-33) Enɛ ji nibii ni he hiaa fe fɛɛ ni wɔbaanyɛ wɔkɛ wɔwala afee lɛ ateŋ ekome. Eji kaa ko ni sɔ̃ ka wɔnɔ akɛ wɔkɛkpe. Mra be mli Kristofoi lɛ nu enɛ shishi. Enɛ tsirɛ amɛteŋ mɔ kome ni ewie akɛ: “Ni enɛ he fai mikpaa, akɛ nyɛsuɔmɔ lɛ afa kɛya nɔ, ni eteke nɔ fe tsutsu lɛ yɛ nilee kɛ sɛɛyoomɔ fɛɛ gbɛfaŋ, ni nyɛyoo nii ni hi titri lɛ.”—Filipibii 1:9, 10; Kolosebii 1:9, 10.
Biblia lɛ ji Bɔlɔ lɛ gbɛ titri ni etsɔɔ nɔ ekɛ adesai aweku lɛ gbaa esuɔmɔnaa nii kɛ eyiŋtoo he sane, ni etsɔɔ bɔ ni wɔhe baa nakai yiŋtoo lɛ mli aŋkroaŋkro lɛ mli jogbaŋŋ. Aŋmala nibii ni ba yɛ blema beaŋ lɛ yɛ mli, ni ehaa wɔnyɛɔ wɔfeɔ nɔ ni baaba wɔsɛɛ lɛ he mfoniri ni mli tse yɛ wɔjwɛŋmɔ mli. Biblia lɛ tsɔɔ tsɔɔmɔi ni ja, ni ekɛ wɔ nyiɛɔ gbɛ ni ja nɔ, yɛ nɔ ni sa akɛ wɔhe wɔye aloo wɔkahe wɔye lɛ gbɛfaŋ. (Bɔfoi lɛ Asaji 17:11; 2 Timoteo 3:16, 17) Ekɛ jeŋba he mlai ni sa akɛ gbɔmɔ ahi shi yɛ naa lɛ haa, ni ekudɔɔ adesai yɛ gbɛ ni baaha amɛye omanye ni amɛna miishɛɛ nɔ. (Mateo, yitsei 5 kɛyashi 7) Emaa Nyɔŋmɔ Maŋtsɛyeli lɛ nɔ mi akɛ adesai fɛɛ ahiɛnɔkamɔ kome pɛ ni yɔɔ, ni etsɔɔ bɔ ni enɔyeli lɛ ji dɛŋdade ni ekɛbaatsu nii ni ekɛtse egbɛi lɛ he ni ebu emaŋtsɛyeli lɛ hu bem. Biblia lɛ tsɔɔ gbɛ ni ehe hiaa ni wɔkɔ koni wɔna wɔkɛ wɔ Wala-Halɔ, Yehowa teŋ wekukpaa ni bɛŋkɛ kpaakpa, ni suɔmɔ yɔɔ mli lɛ mli ŋɔɔmɔ.
Kɛfata he lɛ, Biblia lɛ pɛ ji wolo ni baanyiɛ ohiɛ kɛya nyɔmɔwoo ni da fe fɛɛ ni adesai anine baashɛ nɔ lɛ he—naanɔ wala yɛ paradeiso shikpɔŋ nɔ akɛ adesai ni eye emuu. (Romabii 6:23) Yehowa Bi koome lɛ kɛɔ wɔ akɛ: “Enɛ ji naanɔ wala lɛ, akɛ amɛaana bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ he nilee.” (Yohane 17:3, New World Translation) Eka shi faŋŋ akɛ, esa akɛ wolo ni he yɔɔ sɛɛnamɔ babaoo tamɔ nɛkɛ lɛ akanya wɔ ni wɔkase nɔ ni esa akɛ wɔfee koni wɔnine ashɛ nyɔmɔwoo ni ji naanɔ wala lɛ nɔ. Biblia lɛ ji wolo ko ni aasumɔ ni wɔnu shishi, taakɛ sane ni nyiɛ sɛɛ lɛ baatsɔɔ lɛ.