Niŋmaai ni Hiɛ Shishinumɔ Krɛdɛɛ Ko
“IEHOVA SIT TIBI CUSTOS”
NƐKƐ wiemɔi ni aŋmala yɛ shia ko ni ama yɛ afii ohai 17 lɛ mli yɛ Celerina, Switzerland bokagbɛ lɛ gbogbo he nɛɛ, shishi ji “Yehowa afee ohebulɔ.” Ejeee nɔ ni efɔɔɔ kaa akɛ ooona ni akpɛ́ Nyɔŋmɔ gbɛi loo ni akɛ pɛnte eŋma yɛ shiai, sɔlemɔ tsui, kɛ osɔfoi ashiai ni eye afii ohai abɔ lɛ ahe yɛ gɔji ashikpɔŋ nɛɛ nɔ. Te afee tɛŋŋ abale gbɛi Yehowa lɛ jogbaŋŋ nɛkɛ?
Blema Rhaetia (ni hei ni abale amrɔ nɛɛ akɛ Germany wuoyi-bokagbɛ, Austria, kɛ Switzerland bokagbɛ fa bii fata he lɛ) batsɔ maŋ ni Roma yeɔ nɔ yɛ afi 15 D.Ŋ.B. Maŋbii lɛ babɔi Romansh, ni ji wiemɔ ni ajie kɛjɛ Latin wiemɔ mli ni ana wiemɔi sɔrɔtoi babaoo kɛjɛ mli, ni awieɔ lolo yɛ Alpine jɔɔi ni yɔɔ Switzerland lɛ ekomɛi amli, ni awieɔ yɛ Italy kooyigbɛ hu lɛ wiemɔ.
Etsɛɛɛ tsɔ ni atsɔɔ Biblia lɛ fai komɛi ashishi kɛtee Romansh wiemɔ mli. Lalai lɛ kɛ Kristofoi a-Hela Ŋmalɛi lɛ yɛ ekome ni aŋma ni ji Biblia Pitschna lɛ mli. Gbɛi Iehova lɛ je kpo shii abɔ yɛ Lalai lɛ amli yɛ Biblia ni aŋma yɛ afi 1666 nɛɛ mli. Akɛni Biblia lɛ ji wolo titri ni afɔɔ kanemɔ yɛ shiai amli hewɔ lɛ, Biblia Pitschna kanelɔi babaoo bale Bɔlɔ lɛ gbɛi.
Shi kɛlɛ, yinɔbii ni ba yɛ sɛɛ lɛ naaa Biblia mli saji ahe miishɛɛ. Mɛi babaoo ebɔɔɔ mɔdɛŋ akɛ amɛaabi ni atsɔɔ amɛ nɔ ni wiemɔ “Iehova” lɛ shishi ji, asaŋ osɔfoi lɛ hu ebɔɔɔ mɔdɛŋ ko kwraa akɛ amɛaatsɔɔ shishi. Enɛ hewɔ lɛ, nɛkɛ niŋmaai nɛɛ batsɔ blema bei amli nii ahewulamɔ nibii komɛi kɛkɛ.
Tsɔsemɔ ko ni akɛhaa ekoŋŋ ni sa kadimɔ waa miiya nɔ yɛ afii nyɔŋmai abɔ nɛɛ amli yɛ nyɛsɛɛ afii nɛɛ amli. Yehowa Odasefoi efa gbɛ kɛjɛ shikpɔji ni yɔɔ Switzerland lɛ anɔ kɛba, ni amɛmiiye gbɛhamɔi yɛ jɔɔi fɛfɛji nɛɛ amli, ni amɛkɛfee oti ni ma amɛhiɛ akɛ amɛaatsɔɔ maŋbii lɛ Nyɔŋmɔ ni egbɛi ji Yehowa lɛ he nii. Odasefoi komɛi po ebahi jɛmɛ koni amɛnyɛ amɛye bei pii ni amɛkɛgba mɛi Bɔlɔ lɛ yiŋtoo ni yɔɔ naakpɛɛ ni eyɔɔ kɛha shikpɔŋ lɛ kɛ gbɔmɔ hu lɛ he sane. No hewɔ lɛ, nɛkɛ Romansh blema niŋmaai nɛɛ miina shishinumɔ hee yɛ be mli ni gbɔmɛi lɛ kaseɔ anɔkwa Nyɔŋmɔ, ni ji Yehowa he nii lɛ.
[Mfoniri ni yɔɔ baafa 32]
IEHOVA PORTIO MEA: Yehowa ji migbɛfaŋnɔ.—Kwɛmɔ Lala 119:57