Ani Okaiɔ?

Ani ósusu Buu-Mɔɔ komekomei ni ba nyɛsɛɛ nɛɛ lɛ ahe jogbaŋŋ? Kɛji nakai lɛ, obaanya saji ni nyiɛ sɛɛ nɛɛ akaimɔ he:

▫ Mɛni ji sɔrɔto-feemɔ titri ni ka gbɔmɔ kɛ kooloi ateŋ?

Sɔrɔto-feemɔ titri ni gbalaa gbɔmɔ kɛjɛɔ kooloi ateŋ lɛ damɔ bɔ ni ansɔ lɛ yɔɔ ha, enyɛmɔ, kɛ enitsumɔi anɔ. Yɛ kooloi agbɛfaŋ lɛ, etamɔ nɔ ni ato nɔ fɛɛ nɔ ni jwɛŋmɔ lɛ feɔ lɛ he gbɛjianɔ momo awo nɔ ni atsɛɔ lɛ henumɔŋ nilee lɛ mli. Shi jeee nakai adesai yɔɔ. Nyɔŋmɔ kɛ heyeli ni akɛfeɔ nɔ fɛɛ nɔ ni asumɔɔ he nyɛmɔ ha adesai. (Abɛi 30:24-28)—4/15, baafa 5.

▫ Mɛɛ gbɛfaŋnɔ lalai na yɛ Israelbii asɔlemɔwe jamɔ mli?

Lala, titri lɛ lalatsɛmɛi, yɛ gbɛhe ko ni he hiaa waa yɛ jamɔ mli, jeee doo akɛ ni amɛha akai Mla lɛ mli taomɔ nii wuji lɛ kɛkɛ, shi moŋ ni amɛha ana mumɔ ni sa kɛha jamɔ. Eye ebua Israelbii lɛ koni amɛja Yehowa yɛ gbɛ ni mumɔ yɔɔ mli lɛ nɔ. (1 Kronika 23:4, 5; 25:7)—5/1, baafai 10, 11.

▫ Mɛɛ kwɛmɔ nɛkɛ he hiaa gbekɛbii kɛjɛ amɛ gbekɛbiiashi?

Ehe miihia ni fɔlɔi agbala amɛjwɛŋmɔ kɛya fufuɔoo ni afɔ lɛ ehee lɛ nɔ be fɛɛ be. Paulo ŋma akɛ: “Ogbekɛbiiashi ojɛ ole ŋmalɛi krɔŋkrɔŋi lɛ, ni aaanyɛ aha ole nii . . . kɛya yiwalaheremɔ mli lɛ.” (2 Timoteo 3:15) No hewɔ lɛ fɔlɔi akwɛmɔ ni Timoteo nine shɛ nɔ, kɛjɛ egbekɛbiiashi lɛ, ji mumɔŋ nɔ̃ hu.—5/15, baafa 11.

▫ Mɛɛ odaseyeli gbɛi ejwɛ tsɔɔ akɛ Nyɔŋmɔ shɛɛ sane yɛ Biblia lɛ mli kɛha adesai fɛɛ?

(1) Nine shɛɔ nɔ be fɛɛ be. Je lɛŋ bii fɛɛ ayifalɛ mlijaa oha mli 98 nine shɛɔ Biblia lɛ nɔ. (2) Bɔ ni eji yinɔsane wolo ha. Yinɔsane mli anɔkwalei yɔɔ Biblia lɛ mli, shi jeee blema adesãi ni anyɛɛɛ ama nɔ mi. (3) Bɔ ni anyɛɔ akɛtsuɔ nii ahaa. Famɔi kɛ shishitoo mlai ni yɔɔ mli lɛ tsɔɔ shihilɛ gbɛ ni kɛ sɛɛnamɔ bahaa mɛi ni nyiɛɔ sɛɛ ni amɛkɛtsuɔ nii pɛpɛɛpɛ lɛ. (4) Gbalɛ. Eji wolo ni gbaa nɔ ni baaba yɛ wɔsɛɛ be mli lɛ fɛɛ fitsofitso.—6/1, baafai 8, 9.

▫ Mɛɛ gbɛnaa nii fata anɔkwale jamɔ ni aleɔ lɛ he?

Kɛ wɔna wɔle anɔkwale jamɔ lɛ nɔŋŋ pɛ lɛ, esa akɛ wɔtswa wɔshihilɛ kɛbɔle he. Eji shihilɛ gbɛ. (Lala 119:105; Yesaia 2:3)—6/1, baafa 13.

▫ Mɛni hewɔ Biblia lɛ kasemɔ yɛ teemɔŋ lɛ he hiaa waa nakai lɛ?

Ehe miihia ni Nyɔŋmɔ tsuji fɛɛ aha amɛ miishɛɛ kɛ hewalɛ lɛ afee ehee daa kɛtsɔ Nyɔŋmɔ Wiemɔ lɛ mli anɔkwale lɛ mli nibii heei loo nɔ ni mli kwɔlɔ ni amɛaatao daa lɛ nɔ. Yɛ nɛkɛ gbɛ nɔ lɛ amɛkanyaa amɛhe be fɛɛ be yɛ mumɔŋ.—6/15, baafa 8.

▫ Mɛni ji wiemɔ “esha” ni akɛtsuɔ nii yɛ Biblia mli lɛ shishi?

Hebri kɛ Hela feemɔ-wiemɔi ni bei pii lɛ akɛtsuɔ nii yɛ Biblia lɛ mli akɛtsɔɔ “esha” lɛ shishi tsɔɔ “nɔ ko he ni ashɛɛɛ,” kɛ shishinumɔ akɛ alaaje loo ashɛɛɛ oti, kadimɔ nii, loo yiŋtoo ko he. Nyɔŋmɔ anunyam lɛ bɔ klɛŋklɛŋ adesai enyɔ lɛ, ni yiŋtoo hewɔ ni abɔ amɛ yɛ Nyɔŋmɔ subaŋ nɔ lɛ je amɛdɛŋ. Yɛ gbɛ kroko nɔ lɛ, amɛfee esha. (1 Mose 2:17; 3:6)—6/15, baafa 12.

▫ Mɛni hewɔ nilee bɛ mli krwaa akɛ aaakane hemɔkɛyeli kwalɔi awoji?

Hemɔkɛyeli kwalɔi awoji lɛ ekomɛi wieɔ amale wiemɔi kɛtsɔɔ “naaŋɔɔmɔ” kɛ “kutumpɔo wiemɔi” anɔ. (Romabii 16:17, 18; 2 Petro 2:3) Hemɔkɛyeli kwalɔi aniŋmaai fɛɛ wieɔ shiɔ mɛi, ni efiteɔ nii kɛkɛ. Nɔ ko kwraa bɛ mli ni tswaa mɔ emaa shi.—7/1, baafa 12.

▫ Ani Hela ji demokrase shishijee he?

Akɛ blema Hela demokrase nɔyeli lɛ tsu nii yɛ maŋtiase maji fioo pɛ mli, ni maŋbii ni ji hii pɛ fɔ̃ɔ oshiki yɛ nɛkɛ maji nɛɛ amli. Enɛ tsɔɔ akɛ ajieɔ amɛyifalɛ ni shɛɔ maŋ muu lɛ mlijaa enumɔ mli ejwɛ yɛ mli. Enɛ jeee maŋbii ahewalɛ yɛ nɔyeli mli loo demokrase yɛ gbɛ ko kwraa nɔ!—7/1, baafa 16.

▫ Mɛni haa Kristofoi agbalashihilɛi shwereɔ?

Kɛ wu kɛ ŋa lɛ kɛ bulɛ haa bɔ ni Nyɔŋmɔ kwɛɔ gbalashihilɛ ehaa lɛ ni amɛbɔɔ mɔdɛŋ amɛhiɔ shi yɛ e-Wiemɔ lɛ shishitoo mlai anaa lɛ. (Efesobii 5:21-33)—7/15, baafa 10.

▫ Te ooofee tɛŋŋ oha oweku nikasemɔ lɛ afee nɔ ni ŋɔɔ?

Bɔɔ mɔdɛŋ ni oha gbekɛbii lɛ fɛɛ kɛ amɛhe awo mli. Feemɔ enɛ yɛ gbɛ kpakpa ni tswaa mɔ maa shi nɔ, ni okɛ miishɛɛ ajie obii lɛ ayi yɛ bɔ ni amɛkɛ amɛhe woɔ mli lɛ hewɔ. Nyɛkakasea kɛkɛ, bɔɔ mɔdɛŋ ni onine ashɛ tsuii lɛ anɔ.—7/15, baafa 18.

▫ Mɛni akɛ wiemɔ: “Be mli ni amɛaakɛɛ akɛ: ‘Hejɔlɛ yɛ ni wɔyɛ shweshweeshwe!’ ” lɛ tsɔɔ? (1 Tesalonikabii 5:3)

Kadimɔ akɛ Biblia lɛ ekɛɛɛ akɛ jeŋmaji lɛ anine baashɛ ‘hejɔlɛ kɛ shweshweeshwe shihilɛ’ nɔ. Shi kɛ hoo lɛ amɛbaawie he yɛ gbɛ ni ekaaa nɔ, kɛ jwɛŋmɔ kpakpa fe bɔ ni amɛnu pɛŋ. Hegbɛ akɛ amɛnine aaashɛ toiŋjɔlɛ kɛ shweshweeshwe shihilɛ nɔ lɛ baafee tamɔ nɔ ni ebɛŋkɛ waa fe be fɛɛ ni eho.—8/1, baafa 6.

▫ Tsii gbɛi sɔrɔtoi etɛ ni Yehowa tsɔɔ nɔ ejieɔ shishinumɔ kpo yɛ nɔ lɛ atã.

Yehowa ejie ehe kpo akɛ mɔ ni nyɛɔ ekɛ eshai faa. (Lala 86:5) Efee mɔ ni yɔɔ he miishɛɛ akɛ eeetsake gbɛ ni eto eyiŋ yɛ he lɛ kɛ shihilɛi tsake. (Kwɛmɔ Yona, yitso 3.) Agbɛnɛ Yehowa ejie ehe kpo akɛ ekɛ saneshishinumɔ tsuɔ hegbɛ ni eyɔɔ lɛ he nii. (1 Maŋtsɛmɛi 22:19-22)—8/1, baafai 12-14.