Mɛɛ Wɔsɛɛ Be Yɔɔ Kɛha Wɔbii Lɛ?

NUKLEA he gbeyeiwoo lɛ—kɛji ejɛ hegbeyeiwolɔi okpɛlɛmii jio, ejɛ nuklea hewalɛ nitsumɔ hei osharai jio—eewo mɔ fɛɛ mɔ he gbeyei. Ekolɛ ohaoɔ waa yɛ gbekɛbii ahe titri, ni ekolɛ bo diɛŋtsɛ obii kɛ onabii fata he. Kwɛ bɔ ni eyɔɔ mɔbɔ waa akɛ wɔɔyoo akɛ nuklea hegbeyeiwoo haa gbekɛ ko hewalɛnamɔ kɛ ewɔsɛɛ be fɛɛ bajeɔ oshara mli.

Shi onijiaŋ akaje wui. Yiŋtoo kpakpa yɛ ni baaha ona gbɛkpamɔ kpakpa yɛ gbekɛbii awɔsɛɛ be he. Jeee mɔdɛŋ ni adesai bɔɔ ni amɛkɛbu wɔbii lɛ ahe lɛ nɔ nɔdaamɔ nɔ kɛha hiɛnɔkamɔ lɛ damɔ, shi moŋ edamɔ wɔsɛɛ be ni yɔɔ wɔ-Bɔlɔ lɛ dɛŋ lɛ nɔ.

Beni Nyɔŋmɔ Bi, Yesu, tsɔɔ nii yɛ Boka Teŋgbɛ lɛ, ejie bɔ ni esusuɔ gbekɛbii ahe ehaa lɛ kpo. (Marko 9:36, 37, 42; 10:13-16) Biblia lɛ tsɔɔ akɛ abaajie mɔ hesusumɔ ni tamɔ nakai kpo beni Nyɔŋmɔ kɛ nuklea hegbeyeiwoo lɛ baa naagbee kwraa, ni etoɔ jeŋ muu fɛɛ paradeiso shishi lɛ. Wɔbii lɛ baanyɛ ana mli ŋɔɔmɔ, kɛ bo hu.

Kɛ obaasumɔ ni onine ashɛ saji babaoo nɔ loo mɔ ko aba ni ekɛ bo abakase Biblia lɛ yɛ oshia ni aheee bo nɔ ko lɛ, ofainɛ ŋmaa kɛya Watch Tower, Box 760, Accra, Ghana, aloo kɛya adrɛs ni atsɔɔ yɛ baafa 2 lɛ mli nɔ ni sa.