Abraham—Afu lɛ yɛ Biɛ, ni Kɛlɛ Ehiɛ Ka?

Afii ohai abɔ nɛ ni Yudafoi, Muslimbii, kɛ Kristofoi efa gbɛ kɛba biɛ.

Obaanyɛ obasara biɛ, yɛ blema Hebron maŋ lɛ mli, yɛ Yerusalem wuoyigbɛ. Atsɛɔ tsu nɛɛ akɛ Haram el-Khalil kɛ Blematsɛmɛi Agbonyo Bu fɛɛ. Hɛɛ, akpɛlɛɔ biɛ nɔ yɛ he fɛɛ he akɛ blematsɛmɛi Abraham, Isak, kɛ Yakob, kɛ agbɛnɛ amɛŋamɛi Sara, Rebeka, kɛ Lea afuu he.

Kaimɔ kɛjɛ Biblia lɛ mli akɛ beni Abraham ŋa ni esumɔɔ lɛ, Sara, gbo lɛ, ehe tɛkplo ko akɛ fuu he kɛ shikpɔŋ ko yɛ Makpela, ni bɛŋkɛ Hebron lɛ. (1 Mose 23:2-20) Yɛ sɛɛ mli lɛ, afu Abraham hu yɛ jɛmɛ, taakɛ afee eweku lɛ mlibii krokomɛi hu lɛ. Yɛ afii ohai abɔ sɛɛ lɛ, Herode Kpeteŋkpele lɛ ma tsu fɛfɛo ko yɛ blema fuu he nɛɛ masɛi, ni beni be hoɔ lɛ nɔyelɔi kunimyelɔi tsake tsu lɛ ni amɛlɛɛ mli, koni ekɛ amɛ diɛŋtsɛ amɛjamɔŋ hemɔkɛyelii akpa gbee.

Kɛ obote mli lɛ, obaana kaimɔ-tɛi ekpaa (blema tɛi loo gbonyo bui foji). Mfoniri ni akɛkpɛtɛ mli lɛ tsɔɔ Isak, Abraham bi lɛ nɔ̃ lɛ. Nɔ ni bɛŋkɛ no ji fɔji loo bui ni atsara, ni atsɔ mli akɛyana nibii ni hɔlɔ shishi lɛ. Nibii amlipɛilɔi ena piai ni akɛ blema wui babaoo eto mli.

Ni Abraham hu? Kɛ afu lɛ yɛ tɛkplo ko ni amrɔ nɛɛ ehɔ enɛ shishi lɛ mli lɛ, no lɛ amrɔ nɛɛ egbo etsɛ, aloo jeee nakai? Gbɔi loo saralɔi pii baakpɛlɛ nɔ nakai. Ni kɛlɛ gbalɔ ko ni da fe Abraham kɛɛ akɛ Abraham hiɛ ka lolo yɛ shishinumɔ ko naa. Yɛ mɛɛ gbɛ nɔ? Ni te enɛ baakɔ ohemɔkɛyeli he aha tɛŋŋ?

Ofainɛ kanemɔ sane ni aŋma ni ji “Osuɔlɔi ni Egboi lɛ—Nɛgbɛ Amɛyɔɔ?” lɛ. (Baafa 3) Etsɔɔ nɔ ni gbalɔ kpeteŋkpele lɛ wie yɛ Abraham ni hiɛ ka lɛ he lɛ mli, ni nɛkɛ sane nɛɛ he baaba sɛɛnamɔ babaoo aha bo kɛ oweku lɛ.