“Yehowa Odasefoi Bu Mihe!”

MƐI babaoo efee amɛhe “mɛi ni hiɛ yɔɔ la, mɛi ni sumɔɔɔ ekpakpa” yɛ naagbee gbii nɛɛ amli. (2 Timoteo 3:1, 3) Isaac, sɔɔlɔ ni kɛ ehe eha ni yɔɔ Buu Mɔɔ Asafo lɛ nitsumɔ he nine yɛ Afrika Anaigbɛ lɛ, na enɛ akɛ eji anɔkwale. Ekɛɛ akɛ:

“Yɛ January 1992 lɛ, mikɛ gbɛfalɔi krokomɛi enumɔ tara taxi ko mli ni wɔmiifa gbɛ kɛmiitsɔ gbɛjegbɛ kakadaŋŋ ni afɔ̃ɔ nɔ tsɔmɔ lɛ nɔ. Mibɔi yoo ko ni ta mimasɛi lɛ kɛ sanegbaa, ni ekɛ miishɛɛ he Biblia kasemɔ wolo bibioo ko kɛjɛ midɛŋ.

“Beni atswa aaafee shwane ŋmɛji ejwɛ lɛ, kar hee ko ni bɛ kadimɔ nɔmba lɛ hiɛ foi waa kɛbama wɔhiɛ trukaa, ni wɔ-kar lɛ bɔi gbɛɛmɔ kɛ hoofeemɔ ni ebawa trukaa. Hii kakalɔi agboi etɛ, ni amɛ fɛɛ amɛhiɛ tú lɛ tumɔ kɛjɛ kar kroko lɛ mli ni amɛbagbele wɔ shinaai lɛ gidigidi kɛ ekaa. Amɛteŋ mɔ kome bo kɛ gbee waa akɛ, ‘Nyɛ fɛɛ nyɛjea kpo.’

“Hii lɛ ateŋ mɔ kroko kɛ eniji kata mibaagi ni woji yɔɔ mli lɛ. Beni ena akɛ Biblia kasemɔ woji pɛ yɔɔ mli lɛ, ekɛ ekaa shɛ baagi lɛ efɔ. Beni etaa tu lɛ kɛmaa mihiɛ lɛ, ebi akɛ, ‘Mɛni ekoŋŋ oyɔɔ?’ Oya nɔŋŋ kɛkɛ ni mijie shika ni hɔ midɛhiɛmɔ kotoku lɛ mli lɛ miha lɛ. Ebi mi akɛ, ‘Ani fɛɛ nɛ?’ Mikɛɛ lɛ akɛ Yehowa Odasefoi ateŋ mɔ kome ji mi ni akɛ Odasefoi lɛ maleee. Eshɔ midɛhiɛmɔ kotoku lɛ kɛjɛ midɛŋ, ni ena mi-Buu Mɔɔ kadimɔ wolo lɛ ni ekɛɛ akɛ, ‘Yoo, Buu-Mɔɔ. Mɛɛ yɛ biɛ.’

“No sɛɛ lɛ, etsɔ ehiɛ eha awula lɛ ni mikɛ lɛ gba sane yɛ taxi lɛ mli lɛ. Oya nɔŋŋ kɛkɛ ni yoo lɛ jie ekuɛnii lɛ ni ekɛ shika ni hɔ eshika-kotoku lɛ mli lɛ ha lɛ. Beni gbɛjegbɛ nɔ ojotswalɔ lɛ na wolo bibioo lɛ yɛ yoo lɛ dɛ ni kpokpoɔ lɛ, esusu akɛ mikɛ lɛ nyiɛ, no hewɔ lɛ etsi lɛ koni ebadamɔ mimasɛi.

“Yɛ nakai beaŋ nɔŋŋ lɛ, ojotswalɔi krokomɛi ni hiɛ tui lɛ tutua wɔnanemɛi gbɛfalɔi lɛ bɔ ni aaaha amɛshe gbeyei. Amɛyi tsɔne-kudɔlɔ lɛ kɛ nuu kroko ni kɛ wɔ faa gbɛ lɛ ni amɛtswa amɛ ojo. Ojotswalɔi lɛ ekome kɛ enine mɔ̃ yoo ni ji enyɔ lɛ kuɛnii lɛ. Beni ete shi wo enɛ lɛ, amɛkɛ tui lɛ asɛɛ tsei lɛ tswia eyitso kɛ etsitsi kɛ yiwalɛ aahu kɛyashi egbo. Amɛgbala yoo ni ji etɛ lɛ kɛjɛ tsɔne lɛ mli ni amɛtswa etsitsi mli tu. Dɔlɛ sane ji akɛ, lɛ hu egbo. Mikɛ obalayoo ni damɔ mimasɛi lɛ pɛ shwɛ ni ayeee wɔ awui ko.

“Beni mɔ ko ni kɛ tsɔne miiho hole wɔ sɛɛ mli lɛ, yoo ni naa ekpɛ ehe lɛ tee nɔ eti mli ewie akɛ, ‘Yehowa Odasefoi bu mihe!’ ”