Amɛjara Wa Kwraa Fe Tɛŋɛlɛo

Gbɔi ni faa gbɛ daa lɛ nyaa nibii ni anaa tamɔ enɛ yɛ Ŋshɔ Tsuru lɛ mli nui lɛ ashishi lɛ he waa.

Looi ni fa babaoo ni amɛhewolo nɔ sui sɔrɔtoi lɛ efee tamɔ kwaabuɛtɛ sui lɛ feɔ mɛi ni sereɔ yɛ nui ni mli tse keŋkeŋ nɛɛ amli lɛ fɛo waa diɛŋtsɛ. Shi kadimɔ akɛ anaa ŋshɔ shishi naakpɛɛ nii krokomɛi ni anyɛɛɛ atsi hiŋmɛi lɛ naa koni ekakwɛ lɛ kɛfataa looi ni hiɛ hewolo nɔ sui sɔrɔtoi ni yɔɔ biɛ lɛ ahe, ni nɔ ni fata he ji tɛŋɛlɛoi ni hiɛ sui sɔrɔtoi ni yɔɔ fɛo waa.

Tɛŋɛlɛo fɛfɛji lɛ hiɛ henɔi kɛ sui sɔrɔtoi. Taakɛ ooonyɛ osusu he okwɛ lɛ, yɛ blema beaŋ po lɛ abuɔ tɛŋɛlɛo sɔrɔtoi abɔ lɛ waa akɛ amɛjara wa. Ŋaa nitsulɔi kɛfeɔ hewulamɔ nii fɛfɛji, ni Biblia ŋmalɔi tsiɔ shika, jwiɛtɛi, kɛ rubi-tɛi ata kɛfataa tɛŋɛlɛo ahe. (Abɛi 3: 14, 15; Ezekiel 27:16) Shi nɛkɛ niŋmalɔi nɛɛ yeɔ buaa wɔ koni wɔna nii kɛteke tɛŋɛlɛo lɛ diɛŋtsɛ afɛo kɛ amɛjara ni wo lɛ.

Amɛmaa nɔ mi akɛ nibii komɛi yɛ ni jara wa waa, ni akɛ esa okɛ wɔbu nomɛi waa diɛŋtsɛ. Ŋa kpakpa ni tsuɔ nii jogbaŋŋ lɛ ji amɛteŋ ekome, ejaakɛ wɔkaneɔ okɛ: ‘Yoo kpakpa lɛ, namɔ ooona? Ejara wa aahu fe tɛŋɛlɛo.’ (Abɛi 31 :10) Ani oji nuu ni abote gbala- shihilɛ mli? Saamɔ okwɛ tɛŋɛlɛo ni sa jogbaŋŋ ni yɔɔ biɛ lɛ ekoŋŋ, ni osusu he akɛ ani oobu oŋa lɛ waa akɛ ejara wa waa nakai lo.

Kɛji hii loo yei ji wɔ jio, wɔbote gbalashihilɛ mli loo wɔji oshijafoi jio lɛ, esa akɛ jwɛŋmɔ ni wɔɔna yɛ tɛŋɛlɛo ni kpɛ́lɛɔ waa nɛɛ ahe lɛ aye abua wɔ ni wɔhiɛ asɔ anɔkwa ŋaalee, sanesɛɛkɔmɔ, kɛ nilee ni jara wa fe enɛ kwraa lɛ. Nyɔŋmɔ Wiemɔ lɛ kɛɔ akɛ: ‘Ajɔɔ gbɔmɔ ninaa nilee kɛ gbɔmɔ ni naa jwɛŋmɔ [sanesɛɛkɔmɔ] lɛ] Ejaakɛ no namɔ hi fe jwiɛtɛi namɔ, ni emli sɛɛnamɔ lɛ fe shika krɔŋŋ. Ejara hu wa fe tɛŋɛlɛo, ni onii ni jara wa fɛɛ onyɛŋ okɛto he. ’’ —Abɛi 3:13-15;8:11.

No hewɔ lɛ kɛji wɔna amɛkɛtsɔ seremɔ loo kɛtsɔ mfoniri ni asha nɔ jio lɛ, esa akɛ tɛŋɛlɛo ni yɔɔ Ŋshɔ Tsuru lɛ mli lɛ afee nɔ ko ni yɔɔ fɛo kɛ nɔ ni sa kɛha nii ahe susumɔ ni he baa sɛɛnamɔ.