Ekɛ Blɔfo Nɔ Lɛ Enyiɛ Aahu Afii Nyɔŋma!

BENI abi lɛ bɔ ni enuɔ he ehaa afii nyɔŋma nɛ beni abɔi Buu-Mɔɔ lɛ kalamɔ yɛ Spanish wiemɔ mli, ni ekɛ Blɔfo nɔ lɛ nyiɛ pɛpɛɛpɛ lɛ, suɔmɔ Spanish nyɛmiyoo nɛɛ ha hetoo akɛ: ‘Wɔnuɔ he akɛ eji jɔɔmɔ diɛŋtsɛ ejaakɛ wɔkɛ Blɔfo nɔ lɛ yaa, aloo te akɛɔ tɛŋŋ po lɛ, wɔkɛ lɛ nyiɛ pɛpɛɛpɛ. Kɛ mikɛɛ Blɔfo lɛ, be fɛɛ be lɛ misusuɔ asafo lɛ he. Wɔtsɛɔ asafo lɛ akɛ “Awo.” Wɔnuɔ he akɛ wɔbɛŋkɛ lɛ kpaakpa. Eyɛ fɛo waa. Eyɛ naakpɛɛ hu!’

Nɛkɛ nyɛmiyoo anɔkwafo nɛɛ jie bɔ ni mɛi babaoo ni kaneee Blɔfo nɔ lɛ nuɔ he amɛhaa lɛ kpo. Afii saŋŋ ni eho lɛ, saji ni jeɔ kpo yɛ Spanish Buu-Mɔɔ lɛ mli lɛ baa yɛ be mli ni eje kpo momo yɛ Blɔfo nɔ lɛ mli lɛ sɛɛ aaafee nyɔji ekpaa. Wiemɔi krokomɛi lɛ hu anɔ mli saji tsɛɔ nakai nɔŋŋ. No hewɔ lɛ, anuɔ shishi akɛ aasumɔ waa ni aŋmala saji koome lɛ nɔŋŋ, yɛ be kometoo mli, yɛ wiemɔi babaoo mli.

No hewɔ lɛ, kɛjɛ April 1, 1984 nɔ̃ lɛ nɔ kɛbaa lɛ, Spanish nɔ lɛ bafee klɛŋklɛŋ nɔ ni kɛ Blɔfo nɔ lɛ nyiɛɔ pɛpɛɛpɛ. Etsɛɛɛ kɛkɛ ni wiemɔi krokomɛi hu nyiɛ sɛɛ. Beni shɛɔ 1985 shishijee gbɛ lɛ, no mli lɛ sɔrɔtoi ni akalaa yɛ wiemɔi 23 mli lɛ fɛɛ nyiɛ pɛpɛɛpɛ. Ní ana wiemɔi ashishitsɔɔlɔi ni atsɔse amɛ lɛ, eha wiemɔi krokomɛi babaoo amli nɔ hu kɛ Blɔfo nɔ lɛ nyiɛ.

Buu-Mɔɔ mli nɔ ni eje kpo nɛɛ feɔ afii nyɔŋma pɛpɛɛpɛ ni ekɛ blɔfo nɔ lɛ enyiɛ. Amrɔ nɛɛ akalaa Buu-Mɔɔ yɛ wiemɔi 116 mli, ni emli 85 nyiɛ pɛpɛɛpɛ. Enɛ tsɔɔ akɛ aŋmaa Buu-Mɔɔ 16,100,000 ni kɛ aja mli lɛ akalaa daa lɛ mli oha mlijaa 99.3 kɛ esɛɛ mfoniri kɛ emli sane koome lɛ nɔŋŋ. Yɛ mɛi ni yaa daa otsi Buu-Mɔɔ Nikasemɔ lɛ agbɛfaŋ lɛ, amɛteŋ mɛi ni fa fe oha mlijaa 95 kaseɔ emli sane kome lɛ nɔŋŋ yɛ be kometoo mli.

Akalaa Awake!, ni ji wolo tɛtrɛɛ ni fata Buu-Mɔɔ lɛ he lɛ hu ni emli sane lɛ nyiɛ pɛpɛɛpɛ yɛ wiemɔi 74 ni akalaa yɛ mli lɛ amli 37 mli. Akalaa Yearbook of Jehovah’s Witnesses ni baa daa afi lɛ yɛ wiemɔi 18 mli. Nɛkɛ woji akalamɔ ni fɛɛ mli saji nyiɛɔ pɛpɛɛpɛ nɛɛ feɔ Nyɔŋmɔ webii ekome ‘ni amɛ fɛɛ amɛyitsoŋ kɛ amɛjwɛŋmɔ feɔ ekome.’—1 Korintobii 1:10.