Ooya Ŋwɛi loo Hɛl?
“MƐƐ ŋwɛi-yaa loo hɛl-yaa he hegbɛi oyɔɔ?”
Abi Amerikabii ni jɛ shihilɛi sɔrɔtoi amli sane ni tamɔ nɛkɛ yɛ saji amlipɛimɔ ko ni afee yɛ nyɛsɛɛ nɛɛ lɛ mli. Princeton Religion Research Center lɛ ŋma nɔ ni jɛ mli ba lɛ yɛ Religion in America 1992-1993 lɛ mli.
Kulɛ te obaaha sane nɛɛ hetoo oha tɛŋŋ? Mɛɛ hegbɛi ohefatalɔ lɛ loo osuɔlɔi krokomɛi yɔɔ akɛ amɛaaya ŋwɛi yɛ gbele sɛɛ? Ani osusuɔ akɛ eeenyɛ eba akɛ yɛ naagbee lɛ bo, loo amɛ baaya hɛl?
Saji amlipɛimɔ lɛ tsɔɔ akɛ mɛi oha fɛɛ mli 78 susu akɛ hegbɛ ni amɛyɔɔ akɛ amɛaaya ŋwɛi lɛ hi loo ehi jogbaŋŋ, babaoo fe bɔ ni aha hetoo ni tamɔ nɛkɛ nɔŋŋ aaafee afii 40 ni eho nɛ. Ni hɛl hu? Aaafee oha fɛɛ mli 77 tsɔɔ akɛ amɛkpaaa shi akɛ amɛaaya jɛmɛ.
Ani amɛ hetooi lɛ damɔ Biblia mli anɔkwa nilee nɔ? Ojogbaŋŋ, amɛteŋ mɛi 4 yɛ 10 fɛɛ mli kpɛlɛ nɔ akɛ amɛfɔɔɔ sɔlemɔyaa taakɛ amɛfee yɛ afii enumɔ ni eho lɛ mli lɛ. Oha fɛɛ mli 28 pɛ kɛɛ amɛkɛ amɛhe woɔ Biblia kasemɔ kui amli ni oha fɛɛ mli 27 kɛ amɛhe woɔ Nyɔŋmɔ jamɔ he nikasemɔ klaas sɔrɔtoi amli.
Kɛ okase Biblia lɛ jogbaŋŋ lɛ, obaana anɔkwalei komɛi ni baafee bo naakpɛɛ. Akɛ nɔkwɛmɔ nɔ lɛ, Biblia lɛ kɛɔ yɛ faŋŋ mli akɛ beni Yesu gbo lɛ, etee “hɛl,” taakɛ Biblia shishitsɔɔmɔi komɛi tsɔɔ mli lɛ. (Bɔfoi lɛ Asaji 2:31, King James Version; “Hades,” New World Translation) Nyɔŋmɔ Wiemɔ lɛ hu yeɔ odase akɛ Maŋtsɛ David kɛ Yohane Baptisilɔ lɛ ateŋ mɔ ko eyaaa ŋwɛi yɛ amɛgbele be mli. (Mateo 11:11; Bɔfo lɛ Asaji 2:29) Anɔkwa saji ji enɛɛmɛi fɛɛ, jeee susumɔi komɛi ni jɛ jamɔ mli saji amlipɛimɔ mli.
Anɔkwa saji krokomɛi ni baanyɛ asa ohe: Biblia lɛ tsɔɔ akɛ abaaŋɔ Yesu bɔfoi lɛ kɛ mɛi krokomɛi akuu fioo ko kɛya ŋwɛi ni amɛkɛ Yesu ayaye maŋtsɛ. Shi mɛi ni egboi lɛ ateŋ mɛi ni fa tee adesai akwamaŋ gbonyo bu mli. Nyɔŋmɔ baatee amɛ shi, ni ekɛ amɛ aba wala mli yɛ shikpɔŋ nɔ, kɛ gbɛkpamɔ akɛ amɛbaana miishɛɛ ni yeɔ emuu yɛ wala ni bɛ naagbee mli yɛ shikpɔŋ nɔ paradeiso ni aku sɛɛ akɛba ekoŋŋ mli.
Yehowa Odasefoi baasumɔ ni amɛye amɛbua bo koni ona bɔ ni nakai hiɛnɔkamɔ lɛ ji anɔkwale ni anyɛɔ akɛ he fɔɔ nɔ ha lɛ kɛjɛ bo diɛŋtsɛ o-Biblia mli.