“Efe Maŋ ni Wa”
“YƐ AMRƆ nɛɛ akɔntaabuu naa lɛ, U.S. gbekɛbii amlijaa oha mli 40 baana amɛfɔlɔi agbalashihilɛ fitemɔ dani amɛbaaye afii 18.” (Science, June 7, 1991) Mɛɛ akɔntaabuu ni yɔɔ gbeyei nɛ! Mɛni hewɔ enɛ baa lɛ nakai?
Weku kɛ shamaŋsheo saji akojolɔ Edward M. Ginsburg tsɔɔ ejwɛŋmɔ yɛ saji ni The Boston Globe bi lɛ lɛ mli. Ewie akɛ: “Gbɔmɛi ni sumɔɔ pɛsɛmkunya ji wɔ. Wɔmiitao wɔha ‘mi.’ Wɔbiɔ akɛ, ‘Mɛni yɔɔ mli kɛha mi bianɛ?’ Wɔmiitao nɔ ni wɔtsui sumɔɔ lɛ amrɔ nɔŋŋ.”
Nɛkɛ pɛsɛmkunya ni esaaa nɛɛ kɛ mlifu kɛ bei baa yɛ gbalashihilɛ mli. Kojolɔ Ginsburg wie akɛ kɛji gbalashihilɛ mli hefatalɔi yashɛ gbalamlitsemɔ saneyeli he lɛ, wu lɛ kɛ ŋa lɛ fɛɛ taoɔ ni abu amɛ bem. Amɛmiitao ni mɔ ko akɛɛ amɛ akɛ amɛsane ja, ni amɛhefatalɔ lɛ sane ejaaa. Amɛmiitao mɔ ko ni baakɛɛ akɛ: “Oye kunim.”
Ewiemɔi lɛ haa wɔkaiɔ mumɔ naa abɛbua ko: “Nyɛmi ni afee lɛ efɔŋ lɛ efe maŋ ni wa.” (Abɛi 18:19) Hɛɛ, kɛ bei fɛ yɛ gbalashihilɛ ko mli lɛ, fãi enyɔ ni kɛ amɛhe wuuɔ nɛɛ baanyɛ aku amɛhiɛ amɛshwie nifeemɔ ni nilee yɔɔ mli nɔ ni amɛaafee keketee. Bei komɛi lɛ, amɛkɛ shɛiifeemɔ kpooɔ akɛ amɛaaŋmɛɛ saji ahe, tamɔ “maŋ ni wa” ni awo he ka.
Ani esa akɛ nibii abalɛ nɛkɛ? Dabi, nɔ kroko yɛ ni abaanyɛ afee. Gbalashihilɛi amli waa ni ehiɔ shi daa kɛji, kɛjɛ shishijee lɛ, mɛi enyɔ lɛ fɛɛ bo bɔfo Paulo wiemɔi nɛɛ atoi lɛ, akɛ: “Nyɛmli ahia ahaa nyɛhe, nyɛmusuŋ atsɔa nyɛ yɛ nyɛhe, nyɛŋɔfafaa nyɛhe, taakɛ bɔ nɔŋŋ ni Nyɔŋmɔ ŋɔfa nyɛ yɛ Kristo mli lɛ.” (Efesobii 4:32) Ani nɛkɛ sui nɛɛ anamɔ yɛ mlɛo? Jeee be fɛɛ be. Shi te gbalamlitsemɔ yɔɔ mlɛo ha tɛŋŋ? Te henumɔŋ kɛ shika gbɛfaŋ jatsui ni jɛɔ gbalashihilɛ ni efite mli baa lɛ tsii ha tɛŋŋ? Ni gbekɛbii lɛ, ni bei pii lɛ amɛfɔlɔi agbalamlitsemɔ hiɔ amɛjwɛŋmɔi amli aahu kɛyaboteɔ amɛdaramɔ beaŋ tɔ̃ɔ lɛ hu?
Ehi kwraa akɛ mɛi enyɔ lɛ fɛɛ aaabɔ mɔdɛŋ waa ni amɛkɛbaa gbalashihilɛ lɛ yi, shi jeee ni aŋmɛɛɛ mɔ kroko lɛ tɔmɔ he, tamɔ “maŋ ni wa.” Paulo ŋaawoo kɛha Kristofoi lɛ kɔɔ gbalashihilɛ mli hefatalɔi ahe titri, akɛ: “Nyɛwoa suɔmɔ ni ji emuuyeli kpaa lɛ.”—Kolosebii 3:14.
[He ni Mfoniri ni yɔɔ baafa 32 lɛ Jɛ]
The Complete Encyclopedia of Illustration/J. G. Heck