Ani Amɛhe Baanyɛ Aba Sɛɛnamɔ Aha Bo?

ATO wolo tɛtrɛɛ ni ohiɛ nɛɛ he gbɛjianɔ koni efee hewalɛwoo jɛɛhe, ni egbala jwɛŋmɔ kɛya Biblia mli gbɛtsɔɔmɔi ni haa weku lɛ maa shi shiŋŋ, ni ahiɛɔ anɔkwayeli mli lɛ nɔ. Etsɔɔ akɛ agba ŋmɛnɛ beaŋ haomɔ be nɛɛ afɔ shi yɛ Biblia lɛ mli, ni emaa enaa tsabaa nɔ mi—Nyɔŋmɔ Maŋtsɛyeli nɔyeli lɛ. Ani Buu-Mɔɔ kɛ ehefatalɔ wolo tɛtrɛɛ, Awake! lɛ he aaanyɛ aba sɛɛnamɔ aha bo?

Yoo ko ni atsɛɔ lɛ Vilma ŋma wolo kɛjɛ Philippines akɛ: “Kɛji wiemɔ ko yɛ ni akɛaatsɔɔ bɔ ni nyɛwoji lɛ ji lɛ mli lɛ, misusuɔ akɛ makɛɛ akɛ ‘amɛhe yɛ sɛɛnamɔ waa.’ Mina ni mikane nyɛ Awake! kɛ Buu-Mɔɔ lɛ klɛŋklɛŋ kwraa beni mita bɔs mli ni miiba shia, kɛjɛ Manila. Kɛ miifa gbɛ lɛ, bei pii lɛ mihiɛɔ adafitswaa woji, shi ni mifaa gbɛ lɛ, mikɛ eko eyaaa.

“Beni wɔfaa gbɛ lɛ, nuu ko ni hiɛ efã saŋŋ ta mimasɛi ni ehiɛ nyɛwoji lɛ eko. Ni ekane Awake! lɛ egbe naa lɛ, ejie wolo tɛtrɛɛ kroko hu, Buu-Mɔɔ. Miŋɔ hegbɛ nɛɛ ni mikɛma Awake! lɛ. Yɛ anɔkwale mli lɛ, mina nakai woji tɛtrɛbii lɛ akanemɔ he miishɛɛ waa ejaakɛ amɛmli saji lɛ yɛ miishɛɛ, eba yɛ ebe naa, ni ewoɔ mɔ hewalɛ waa hu.”

Yoo lɛ mu naa akɛ: “Miisumɔ ni minine ashɛ nyɛ woji tɛtrɛbii lɛ anɔ. Nyɛfainɛ nyɛhaa malea bɔ ni mafee ni minine ashɛ nɔ.” Yehowa Odasefoi anitsumɔ he nine ni yɔɔ Philippines lɛ na he miishɛɛ akɛ amɛaakpɛlɛ nɔ, ni amɛkɛ yoo nɛɛ fata mɛi ni amɛkɛ woji majeɔ amɛ lɛ ahe.